بھارت اور نیوزی لینڈ کے درمیان پہلے سیمی فائنل سے قبل ٹکٹوں کی قیمتیں آسمان پر جاپہنچی، بڑی تعداد میں ٹکٹیں بلیک میں فروخت ہونے لگیں۔
غیرملکی میڈیا رپورٹس کے مطابق بھارتی پولیس نے سیمی فائنل سے قبل بلیک میں ٹکٹس فروخت کرنے والے شخص کو گرفتار کرلیا۔ ملزم واٹس ایپ گروپس کے ذریعے ٹکٹیں فروخت کررہا تھا جبکہ وہ سیمی فائنل کے ٹکٹس کے لیے لوگوں سے ڈھائی لاکھ روپے تک طلب کررہا تھا۔
ممبئی کے وانکھیڑے اسٹیڈیم میں 15 نومبر کو ہونے والے نیوزی لینڈ اور بھارت کے سیمی فائنل سے قبل پولیس نے بلیک میں ٹکٹس فروخت کرنے والے آکاش کوٹھاری نامی شخص کو حراست میں لے لیا ہے۔
کوٹھاری ملاڈ میں واقع ملزم کی رہائشگاہ سے اسے پکڑا گیا، ملزم مختلف واٹس ایپ گروپس کا استعمال کرتے ہوئے سیمی فائنل کے ٹکٹس 25 ہزار سے ڈھائی لاکھ روپوں تک میں فروخت کررہا تھا، جو کہ ٹکٹ کی اصل قیمت سے کافی زیادہ ہے۔
پولیس نے ملزم کے خلاف تعزیرات ہند کی دفعہ 420 اور 511 کے تحت دھوکہ دہی کے الزامات مقدمہ درج کیا ہے۔ اس کے بعد پولیس نے ٹکٹس بلیک میں فروخت کرنے والوں کیخلاف کارروائیاں مزید تیز کردی ہیں۔
آئی سی سی ورلڈکپ کے پہلے سیمی فائنل کے لیے بھارتی شائقین میں کافی جوش و خرودش پایا جاتا ہے کیوں کہ اس میں میزبان بھارت کو نیوزی لینڈ کا چیلنج درپیش ہے۔ دوسرا سیمی فائنل جمعرات کو آسٹریلیا اور جنوبی افریقا کی ٹیموں کے مابین شیڈول ہے۔