اواگادوگو: مغربی افریقا کے ملک برکینا فاسو میں غذا کی کمی کی وجہ سے مائیں اپنے بچوں کو دودھ پلانے سے قاصر ہیں۔
تفصیلات کے مطابق مغربی افریقی ملک برکینا فاسو میں نوزائیدہ بچے تغذیہ کی کمی سے دوچار ہیں، غذا کی قلت کے باعث مائیں بچوں کو دودھ نہیں پلا سکتیں۔
برکینا فاسو میں نومبر اور دسمبر میں فصلوں کی کٹائی ہوتی ہے لیکن رواں سال کرونا کی وجہ سے جب بویائی ہی نہیں ہوئی فصلوں کی کٹائی کیسے ہوگی، ایسی صورت حال میں غذائی قلت میں مزید اضافہ ہوگا۔
مغربی افریقی ملک میں 40 فیصد سے زائد بچے کم وزن کے پیدا ہوتے ہیں کیونکہ ان کی ماؤں کو مکمل غذا نہیں مل پاتی ہے۔
برکینا فاسو کے چیف مشن ڈاکٹر حسن مایاکی کا کہنا ہے کہ امدادی گروپ بدترین صورت حال سے بچنے کے لیے تیزی سے کام کر رہے ہیں۔
خیال رہے کہ اقوام متحدہ کے مطابق دنیا بھر میں عدم تغذیہ سے ہر ماہ 10 ہزار بچے جان کی بازی ہار جاتے ہیں۔
حال ہی میں اقوام متحدہ کے ورلڈ فوڈ پروگرام کے ایگزیکیویٹو ڈائریکٹر ڈیوڈ بیسلی نے سلامتی کونسل کو بتایا تھا کہ دنیا بھوک کی وبا کے دہانے پر ہے۔
