بھارت کی نیشنلسٹ کانگریس پارٹی (این سی پی) نے مودی حکومت سے سوال کیا ہے کہ اگر وہ دعویٰ کرتی ہے کہ ملک میں سب ٹھیک ہے تو بڑی تعداد میں ہندوستانی شہری ملک کیوں چھوڑ رہے ہیں۔
بھارتی میڈیا کے مطابق این سی پی ترجمان کلائیڈ کریسٹو کا یہ تلخ رد عمل اس وقت سامنے آیا ہے جب ایک دن قبل ہندوستانی شہریت چھوڑنے اور دنیا بھر کے تقریباً 135 ممالک کی شہریت اختیار کرنے والے ہندوستانیوں کی تعداد پر مبنی سالانہ ڈاٹا مرکزی وزیر خارجہ ایس جئے شنکر نے جاری کیا۔
این سی پی کے ترجمان کریسٹو نے سوال کیا ہے کہ اگر ہندوستان میں واقعی سب کچھ ٹھیک چل رہا ہے تو لوگ اپنی ہندوستانی شہریت کیوں چھوڑ رہے ہیں؟
بھارتی وزیر خارجہ ایس جے شنکر نے بھارت کو ہمیشہ کے لیے ملک چھوڑ کر جانے والے ہندوستانیوں کی تعداد کا سال در سال کا ڈیٹا پارلیمنٹ میں پیش کیا۔
وزیر نے پارلیمنٹ میں بتایا کہ 2011 کے بعد سے 16 لاکھ سے زیادہ ہندوستانیوں نے اپنی ہندوستانی شہریت چھوڑ دی ہے، جس میں صرف 2022 میں 2 لاکھ 25 ہزار 620 افراد نے ہندوستانی شہریت چھوڑی، یعنی اوسطاً روزانہ تقریباً 618 ہندوستانیوں ملک چھوڑ رہے ہیں۔
این سی پی کے لیڈر کا کہنا تھا کہ اگر بی جے پی کے اعلانات واقعی میں حقیقت پر مبنی ہیں، تو دنیا بھر میں بسنے والے ہندوستانیوں کو بڑی تعداد میں اپنے وطن واپس آنا چاہیے۔
انہوں نے کہا کہ مجھے پتا ہے حکومت دیگر ضروری ڈیٹا پیش نہیں کرے گی کیونکہ حقیقت یہ ہے کہ ہندوستانی اپنی شہریت چھوڑ رہے ہیں اور بڑھتی مہنگائی کے سبب یہاں سے جا رہے ہیں۔
