قطر سے اسلام آباد کے لئے روانہ ہونے والی قطر ایئر ویز کی پرواز خطرناک حادثے سے بال بال بچ گئی، ہنگامی لینڈنگ کے بعد پرواز کو واپس دوحہ اتار لیا گیا۔
ایوی ایشن ذرائع کا اس حوالے سے کہنا ہے کہ قطر ائیرویز کی شیڈول پرواز کیو ار 614 نے دوحا انٹرنیشنل ائیرپورٹ سے اسلام آباد کیلئے مقامی وقت کے مطابق صبح 3 بجکر 4 منٹ پر اڑان بھری، مگر طیارے میں فنی خرابی کا انکشاف ہوا۔
ذرائع کے مطابق قطر ایئرویز کی پرواز نے صبح 8 بجے اسلام آباد پہنچنا تھا تاہم روانگی کے 11 منٹ بعد پرواز 15 ہزار فٹ کی بلندی پر تھی کہ پائلٹ نے ائیر بس اے 330 میں فنی خرابی کے حوالے سے آگاہ کیا۔
پائلٹ نے ائیر ٹریفک کنٹرولر کی ہدایت پر طیارے کا رخ واپس دوحہ ایئر پورٹ کی جانب موڑ دیا۔ روانگی کے 22 منٹ بعد طیارہ الورکہ کے قریب سمندر پر گھوم رہا تھا کہ فلائٹ ریڈار کو طیارے سے ایمرجنسی کے سگنل موصول ہوئے اور ٹیک آف کے 34 منٹ بعد طیارہ واپس قطر کے دوحا انٹرنیشنل ائیرپورٹ پر لینڈ کر گیا۔
ایوی یشن حکام کا کہنا ہے کہ تمام مسافر خیریت سے ہیں اور انہیں طیارے سے آف لوڈ کر دیا گیا ہے، جبکہ مسافروں کو دوسری پرواز کے ذریعے اسلام آباد روانہ کیا جائے گا۔
اس سے قبل اومان میں دوران پرواز ایک افسوسناک واقعہ رونما ہوا تھا، جب بھارت سے تعلق رکھنے والا مسافر جو مسقط سے چنئی واپس جارہا تھا، دوران پرواز دل کا دورہ پڑنے سے انتقال کرگیا۔
ہندوستان سے تعلق رکھنے والے 38 سالہ مسافر جس کی شناخت دھینا سکیرن کے نام سے ہوئی، مبینہ طور پر مسقط سے چنئی واپس آتے ہوئے درمیانی پرواز کے دوران دل کا دورہ پڑنے سے انتقال کرگیا تھا۔
