ARYNews.tv | Urdu – Har Lamha Bakhabar

Tag: ہنگری

  • یورپ میں تعلیم حاصل کرنے کے خواہشمند پاکستانی طلباء کے لیے بڑی خوشخبری

    یورپ میں تعلیم حاصل کرنے کے خواہشمند پاکستانی طلباء کے لیے بڑی خوشخبری

    اسلام آباد : یورپ میں تعلیم حاصل کرنے کے خواہشمند پاکستانی طلباء کے لیے بڑی خوشخبری آگئی ، یورپی ملک نے بڑا اعلان کردیا۔

    تفصیلات کے مطابق یورپی ملک نے پاکستانی طلباء کے لیے 400 مکمل فنڈڈ اسکالرشپس کا اعلان کردیا، یہ اعلان ہنگری کے وزیر خارجہ کے دورہ اسلام آباد کے دوران کیا گیا،جہاں دو طرفہ تعاون کو فروغ دینے کے لیے متعدد معاہدوں پر دستخط کیے گئے۔

    اسکالر شپ کا مقصد ہونہار پاکستانی طلباء کی مدد کرنا ہے اور ہنگری کے جاری تعلیمی تبادلہ پروگرام کا حصہ ہیں۔

    ہنگری کے وزیر خارجہ نے انکشاف کیا کہ پاکستان سے پہلے ہی 1,700 سے زائد درخواستیں موصول ہو چکی ہیں۔

    نائب وزیر اعظم اور وزیر خارجہ اسحاق ڈار کے ساتھ مشترکہ پریس کانفرنس میں پیٹر سیجارتو نے دونوں ممالک کے درمیان تعلقات کو گہرا کرنے میں تعلیم کی اہمیت پر زور دیا۔

    انہوں نے کہا کہ ہنگری پاکستان کو ایک مخلص پارٹنر کے طور پر دیکھتا ہے اور پاکستانی پیشہ ور افراد کے تعاون کو قدر کی نگاہ سے دیکھتا ہے۔

    اسحاق ڈار نے اسکالرشپس کا خیرمقدم کرتے ہوئے کہا کہ ان سے طلباء کو بین الاقوامی سطح پر ایکسپوز حاصل کرنے اور پاکستان کی ترقی میں مثبت کردار ادا کرنے میں مدد ملے گی۔

    انہوں نے تعلیم، تجارت اور سفارت کاری جیسے شعبوں میں ہنگری کی مسلسل حمایت پر شکریہ ادا کیا۔

    یہ اعلان پاکستان اور ہنگری کے سفارتی تعلقات کے 60 سال مکمل ہونے پر سامنے آیا ہے۔ دورے کے دوران دونوں ممالک نے تجارت، صنعت اور ثقافتی تبادلے کے معاہدوں پر بھی دستخط کیے۔

  • یورپی ملک کا ویزا حاصل کرنے کے خواہشمند افراد کےلیے خوشخبری

    یورپی ملک کا ویزا حاصل کرنے کے خواہشمند افراد کےلیے خوشخبری

    یورپی ملک ہنگری اور پاکستان نے بڑا فیصلہ کرتے ہوئے ایسے افراد کےلیے ویزا ریکوائرمنٹس ختم کردی ہیں جو ڈپلومیٹک پاسپورٹ کے حامل ہونگے۔

    ہنگری کے وزیرخارجہ ایک روزہ دورے پر جمعرات کو اسلام آباد پہنچے، جس کے بعد دونوں ممالک کے وزارئے خارجہ کے درمیان ویزا کےلیے درکار دستاویزات کو ختم کرنے کا معاہدہ کیا گیا، ہنگری کے وزیرخارجہ پیٹر سیزیجارٹو کے ہمراہ اعلیٰ سطح کا کاروباری وفد بھی پاکستان آیا ہے۔

    اسلام آباد میں پاکستان کے وزیر خارجہ اور نائب وزیراعظم اسحاق ڈار کے ہمراہ مشترکہ پریس کانفرنس کرتے ہوئے ہنگری کے وزیر خارجہ پپیٹر سیزیجارٹو نے کہا کہ ہم سفارتی پاسپورٹ کے حامل افراد کےلیے ویزا کی ضروریات ختم کرنے پر خوش ہیں۔

    ہنگری کے وزیر خارجہ نے کہا کہ ہم نے یہ اقدام اس لیے کیا ہے کہ ہم اپنے تعلقات میں مزید بہتری چاہتے ہیں، اس کے علاوہ ہم پاکستانی طلبا کو ہر سال 400 اسکالرشپس بھی آفر کررہے ہیں۔

    پیٹر سیزیجارٹو نے دونوں ملکوں کے درمیان تجارت کا حجم دوگنا ہونے پر بھی اظہار اطمینان کیا جبکہ ہنگری کی کمپنیوں کی جانب سے فوڈ سیکیورٹی اور واٹر مینجمنٹ پروجیکٹ کو بھی نشاندہی کی۔

    پاکستان کو قابل اعتماد پارٹنر قرار دیتے ہوئے ہنگری کے وزیر خارجہ نے کہا کہ ہنگری پاکستان کے جی ایس پی پلس کی معیاد 2027 کے بعد بھی بڑھانے کے لیے کوشش کرے گا۔

    https://urdu.arynews.tv/estonia-work-visa-2025-requirements-for-pakistan/

  • ہنگری کی صدر نے ٹی وی پر براہ راست آ کر استعفیٰ دیدیا

    ہنگری کی صدر نے ٹی وی پر براہ راست آ کر استعفیٰ دیدیا

    ہنگری کی صدر کاتالین نوواک نے مجرم کی سزا معاف کرنے پر افسوس کا اظہار کرتے ہوئے استعفیٰ دے دیا ہے۔

    غیر ملکی میڈیا رپورٹ کے مطابق ہنگری کی صدر کاتالین نوواک نے بچوں کے جنسی استحصال کے مجرم کی سزا معاف کرنے کے فیصلے پر افسوس کا اظہار کرتے ہوئے اپنے عہدے سے استعفیٰ دے دیا ہے۔

    رپورٹس کے مطابق مجرم کی سزا معاف کرنے کے فیصلے پر انہیں ملک بھر میں تنقید کا سامنا تھا اور عوام ان کے استعفے کا مطالبہ کررہی تھی، نوواک نے ٹی وی پر لائیو آ کر اپنے فیصلے پر افسوس کا اظہار کیا اور کہا کہ معافی دینے کے فیصلے میں مجھ سے غلطی ہوئی۔

    صدر نوواک نے قومی ٹیلی ویژن چینل پر کہا ’’میں صدر کی حیثیت سے آپ کو آخری بار مخاطب کر رہی ہوں، میں اپنے عہدے سے استعفیٰ دے رہی ہوں۔ میں ان لوگوں سے معافی مانگتی ہوں جن کو میری وجہ سے تکلیف پہنچی ہے‘‘۔

    واضح رہے کہ نوواک نے اپریل 2023 میں پوپ فرانسس کے دورے سے پہلے تقریباً دو درجن لوگوں کو معاف کرنے کا فیصلہ کیا تھا، ان میں چلڈرن ہوم کے ڈپٹی ڈائریکٹر بھی شامل تھے، جنہوں نے وہاں کے سابق ڈائریکٹر کو اپنے جرائم چھپانے میں مدد کی تھی۔

  • ویڈیو: ہنگری کی ہائی وے پر اچانک گرد و غبار کے طوفان سے دل دہلا دینے والا حادثہ

    ویڈیو: ہنگری کی ہائی وے پر اچانک گرد و غبار کے طوفان سے دل دہلا دینے والا حادثہ

    بڈاپسٹ: ہنگری کی ایک ہائی وے پر گرد و غبار کے طوفان سے لوگ خوف زدہ ہو گئے، اچانک طوفان نے ایک دل دہلا دینے والے حادثے کو جنم دیا۔

    تفصیلات کے مطابق ہنگری کی ہائی وے کی ایک خوفناک فوٹیج سامنے آئی ہے جس میں 42 گاڑیوں کا ڈھیر نظر آتا ہے، دراصل دارالحکوت بڈاپسٹ کی ہائی وے پر مٹی کا طوفان آنے کے بعد ڈرائیورز کی جان پر بن آئی تھی اور 42 گاڑیاں آپس میں ٹکرا گئیں، جس سے ایک شخص ہلاک اور 10 بچوں سمیت 39 افراد زخمی ہو گئے۔

    بڈاپسٹ میں موسم نے اچانک کروٹ بدلی اور تیز ہواؤں کے ساتھ اڑتی ریت، دھول مٹی سے نظام زندگی درہم برہم ہو گیا، ایم وَن موٹر وے پر گَرد کے طوفان کی وجہ سے راستہ اتنا دھندلا گیا تھا کہ حد نگاہ صفر ہو گئی تھی۔

    گرد و غبار کے طوفان نے لوگوں کو خوف زدہ کر دیا تھا، حکام کی جانب سے احتیاط برتنے کی وارننگ بھی جاری کی گئی۔

    یہ واقعہ 11 مارچ کو پیش آیا، اس خوفناک تصادم میں پانچ لاریاں اور 37 کاریں آپس میں ٹکرائیں، مقامی میڈیا رپورٹس کے مطابق 44 سالہ شخص جو ملبے کے درمیان سے مردہ پایا گیا تھا، کو حادثے کے بعد اگلی صبح تلاش کیا جا سکا تھا۔

    39 زخمیوں میں 10 بچے بھی شامل ہیں جب کہ 19 گاڑیاں اتنی خوف ناک طور سے تباہ ہوئیں کہ قابل مرمت نہیں رہی ہیں، دو افراد کو ایسے زخم آئے ہیں کہ ان کا بچنا بہت مشکل ہے، جب کہ مزید 12 کی حالت تشویش ناک بتائی جا رہی ہے۔

  • پاکستان کے پہلے وزیر خارجہ کا سرکاری دورہ، بلاول ہنگری پہنچ گئے

    پاکستان کے پہلے وزیر خارجہ کا سرکاری دورہ، بلاول ہنگری پہنچ گئے

    بڈاپسٹ: وزیر خارجہ بلاول بھٹو زرداری ایک روزہ دورے پر ہنگری پہنچ گئے، اس سے قبل کسی پاکستانی وزیر خارجہ نے ہنگری کا سرکاری دورہ نہیں کیا۔

    تفصیلات کے مطابق وزیر خارجہ پاکستان ہنگری پہنچ گئے، ہنگری میں پاکستان کے سفیر اور ہنگری کے اعلیٰ حکام نے وزیر خارجہ کا استقبال کیا۔

    وزیر خارجہ بلاول ہنگری کے ہم منصب سے ملاقات کریں گے، دونوں ہم منصب رہنماؤں کے درمیان ملاقات میں دوطرفہ تعلقات کا جائزہ لیا جائے گا۔

    وزرائے خارجہ پاکستان اور ہنگری کے درمیان تعاون کی یاداشتوں پر دستخط کریں گے، بلاول بھٹو ہنگری کے سفیروں کی سالانہ کانفرنس سے بھی خطاب کریں گے۔

    بلاول بھٹو پاکستان میں کام کرنے والی ہنگری کمپنیوں کے نمائندوں سے بھی ملیں گے، واضح رہے کہ کسی بھی پاکستانی وزیر خارجہ کی جانب سے ہنگری کا یہ پہلا سرکاری دورہ ہے۔

  • ہنگری کا یوکرین کو انکار

    ہنگری کا یوکرین کو انکار

    بڈاپسٹ: ہنگری نے یوکرین کو اپنی سر زمین سے ہتھیاروں کی فراہمی سے انکار کر دیا ہے۔

    تفصیلات کے مطابق ہنگری کے وزیر اعظم وکٹر اوربان نے پیر کو ایک حکم نامے پر دستخط کیے ہیں جس میں نیٹو فوجیوں کو ملک میں تعینات رہنے کی اجازت دی گئی ہے۔

    تاہم وزیر اعظم ہنگری نے ہنگری کے راستے یوکرین کو ہتھیاروں کی فراہمی پر پابندی عائد کرتے ہوئے سپلائی پر پابندی کے حکم نامے پر دستخط کر دیے۔

    حکم نامے میں وضاحت کی گئی ہے کہ یہ فیصلہ اپنے ملک کی سلامتی کے دفاع کے لیے ناگزیر ہے، موجودہ حالات میں ہمیں اپنے ملک اور قوم کا مفاد زیادہ عزیز ہے۔

    ہنگری کے وزیر اعظم نے کہا کہ یہ حکم یوکرین کی صورت حال کا جائزہ لینے کے بعد جاری کیا گیا ہے، جیسا کہ فوجی کارروائیاں ہنگری کی سرحد کے قریب سے قریب تر ہوتی جا رہی ہیں، اور ہم اپنے ملک کو اس جنگ کا حصہ نہیں بنانا چاہتے۔

    رپورٹس کے مطابق ہنگری نے پالیسی میں تبدیلی کر لی ہے، جس کے مطابق ہتھیاروں کی ترسیل نیٹو کے دیگر رکن ممالک کے ذریعے ہوگی، اور ہنگری مہلک ہتھیاروں کی براہ راست یوکرین کو منتقلی کی اجازت نہیں دے گا۔

  • آسمان پر چمکتے سبز گولے نے لوگوں کو حیران کردیا

    آسمان پر چمکتے سبز گولے نے لوگوں کو حیران کردیا

    یورپی ملک ہنگری کے آسمان پر روشنی کے چمکتے گولے نے لوگوں کو حیران کردیا، کئی علاقوں میں سینکڑوں افراد نے اس کا مشاہدہ کیا۔

    سماجی رابطوں کی مختلف ویب سائٹس پر پوسٹ کی گئی تصاویر اور ویڈیوز میں دیکھا جاسکتا ہے کہ ایک سبز رنگ کا روشن گولا آسمان میں ایک طرف سے ابھر کر دوسری طرف غائب ہوگیا۔

    یہ گولہ شام 6 بجے کے بعد دیکھا گیا جب آسمان پر روشنی اور اندھیرے کا امتزاج تھا۔

    کہا جارہا ہے کہ یہ ممکنہ طور پر شہاب ثاقب کا ٹکڑا تھا، یہ واضح نہیں ہوسکا کہ یہ زمین کی فضا میں داخل ہونے سے قبل ہی جل اٹھا تھا یا اس کا کچھ حصہ زمین سے ٹکرانے میں کامیاب رہا۔

  • یورپی یونین کون سی کرونا ویکسین خریدے گی؟

    یورپی یونین کون سی کرونا ویکسین خریدے گی؟

    برسلز: یورپی یونین نے 1.8 بلین کرونا ویکسینز خریدنے کا معاہدہ کر لیا ہے، تاہم ہنگری نے معاہدے کا حصہ بننے سے انکار کر دیا۔

    تفصیلات کے مطابق جمعرات کو یورپی یونین نے جرمن ویکسین بائیو این ٹیک۔فائزر کے ساتھ ایک ارب 80 کروڑ کرونا ویکسین ڈوز خریدنے کے معاہدے پر دستخط کر لیے۔

    ای یو کمیشن کی سربراہ اُرسلا وان ڈرلئین نے سوشل میڈیا پر جاری اپنے بیان میں کہا کہ ہم نے کرونا ویکسین کے حصول کے لیے بائیو این ٹیک۔فائزر کے ساتھ تیسرا معاہدہ کر لیا ہے۔

    ڈرلئین کا کہنا تھا کہ نئے معاہدے کے مطابق ویکسین بنانے والی کمپنی یورپی یونین کو 2023 تک 900 ملین اضافی خوراکوں کے ساتھ کُل 1.8 بلین اضافی ویکسین فراہم کرے گی۔

    انھوں نے مزید کہا کہ یورپی یونین دیگر کمپنیوں کے ساتھ بھی اسی طرح کے طویل المدت معاہدے کر سکتی ہے، اور یہ ویکسینز وبا کے خلاف جدوجہد میں اور وائرس کی تبدیل شدہ حالتوں کے علاج میں استعمال کی جائیں گی۔

    دوسری طرف یونین کے ملک ہنگری نے ویکسین خریدنے کے اس معاہدے کا حصہ نہ بننے کا فیصلہ کر لیا ہے۔

    واضح رہے کہ ہنگری مغربی ویکسینز کے ساتھ ساتھ چینی اور روسی کرونا ویکسینز بھی استعمال کر رہا ہے، اور اب تک 40 فی صد ہنگرین آبادی ویکسین کا پہلا ڈوز حاصل کر چکی ہے، جو یورپ میں دوسری بڑی ویکسی نیشن شرح ہے۔

  • روسی ویکسین حاصل کرنے والا یورپی یونین کا پہلا ملک

    روسی ویکسین حاصل کرنے والا یورپی یونین کا پہلا ملک

    ماسکو: ہنگری روسی ویکسین حاصل کرنے والا یورپی یونین کا پہلا ملک بن گیا ہے۔

    تفصیلات کے مطابق ہنگری نے کرونا وائرس سے بچاؤ کے لیے روس میں تیار کی جانے والی ویکسین اسپوتنک V وصول کر لی ہے، اس طرح ہنگری یہ ویکسین حاصل کرنے والا یورپی یونین کا پہلا ملک بن گیا ہے۔

    اسپوتنک ویکسین کے انجیکشنز ایک خصوصی فلائٹ پر ہنگری بھجوائے گئے، طیارے میں موجود فریج کا درجہ حرارت ویکسین کو محفوظ رکھنے کے لیے منفی 18 سینٹی گریڈ رکھا گیا۔

    اس ویکسین کے بارے میں گزشتہ ہفتے روسی کمپنی کا کہنا تھا کہ یہ انسانی صحت کو کرونا وائرس سے بچانے کے لیے 92 فی صد مؤثر ہے۔

    روسی ویکسین وینز ویلا پہنچ گئی

    ہنگری کے حکام نے سوشل میڈیا اکاؤنٹس کے ذریعے خبر دی کہ بڈاپسٹ کو روسی ساختہ ویکسین سمیت دیگر ادویات کے 10 نمونے موصول ہو چکے ہیں، ادویات کی افادیت جانچنے کے لیے لیبارٹری ٹرائلز کیے جائیں گے۔

    حکام کا کہنا تھا کہ لیبارٹری ٹیسٹس کی مدد سے اس بات کا تعین کیا جائے گا کہ ملک میں انھیں استعمال کے لیے کب تک منظور کیا جا سکتا ہے۔

    یاد رہے کہ گزشتہ ماہ روسی کرونا ویکسین لاطینی امریکی ملک وینز ویلا نے بھی حاصل کی تھی، جس پر وینز ویلا کے صدر نے روس کا شکریہ ادا کیا، وینرویلا اسپوتنک وی حاصل کرنے والا پہلا لاطینی امریکی ملک بنا تھا۔

  • کرونا وائرس کتنی مزاحمت کرسکتا ہے؟ نئی تحقیق نے ماہرین کو پریشان کردیا

    کرونا وائرس کتنی مزاحمت کرسکتا ہے؟ نئی تحقیق نے ماہرین کو پریشان کردیا

    کرونا وائرس کے حوالے سے نئی نئی تحقیقات جاری ہیں، حال ہی میں وائرس کی مزاحمت کی صلاحیت کا اندازہ لگانے کے لیے ایک تجربہ کیا گیا جس نے ماہرین کو پریشان کردیا۔

    یورپی ملک ہنگری میں ہونے والی ایک تحقیق میں محققین نے کرونا وائرس کو ایک سوئی کے سرے سے دبا کر جاننے کی کوشش کہ کتنی طاقت سے یہ کسی غبارے کی طرح پھٹ سکتا ہے، انہوں نے دریافت کیا کہ ایسا ہوتا ہی نہیں۔

    تحقیق کے دوران سارس کووڈ 2 کے ایک ذرے کو لیا گیا جو کہ محض 80 نینو میٹرز چوڑا تھا اور نینو سوئی کو استعمال کیا گیا جس کا سرا اس سے بھی چھوٹا تھا۔ اس سرے سے وائرس کو دبایا گیا اور دریافت ہوا کہ وہ کسی الاسٹک کی طرح کام کرتا ہے یعنی دبانے کے بعد جب چھوڑا جاتا ہے تو وہ ایک بار پھول جاتا ہے۔

    محققین نے 100 بار ایسا کیا اور ہر بار یہ ذرہ اپنی شکل برقرار رکھنے میں کامیاب رہا۔ تحقیق میں شامل ماہرین کا کہنا تھا کہ یہ وائرس حیران کن حد تک مزاحمت کرتا ہے۔

    اس تحقیق سے یہ عندیہ ملتا ہے کہ کرونا وائرس اب تک کے واقف وائرسز میں سب سے زیادہ لچکدار ہے اور اس کی شکل کو بگاڑنے سے اس کی ساخت اور اندر موجود مواد کو کوئی نقصان نہیں پہنچتا۔

    رواں ہفتے ایک چینی یونیورسٹی کی جانب سے اس وائرس کی ساخت کا سب سے تفصیلی خاکہ جاری کیا گیا جس میں بتایا گیا کہ اس میں بڑی مقدار میں نیوکلک ایسڈ کی مقدار ہوتی ہے جو بہت تنگ جگہ میں جینیاتی ڈیٹا کو اپنے ساتھ لے کر چلتی ہے۔

    محققین کا کہنا ہے کہ وائرس کی مکینیکل اور خود کو ٹھیک کرنے کی خصوصیات ممکنہ طور پر اسے مختلف ماحولیاتی عناصر میں ڈھلنے کی صلاحیت فراہم کرتی ہے۔