لاہور: پاکستانی اداکار حمزہ علی عباسی اور نیمل خاور ہنی مون کے لیے اسپین پہنچ گئے۔
تفصیلات کے مطابق حال ہی میں ازدواجی بندھن میں بندھنے والا جوڑا ہنی مون کے لیے اسپین کےشہر بارسلونا پہنچا جس کی نیمل خاور نے تصاویر بھی شیئر کی ہیں۔
حمزہ علی عباسی اور نیمل خاور پہلے ہی مشہور تھے البتہ منگنی کی خبریں سامنے آنے کے بعد ان کی مشہوری میں مزید اضافہ ہوا۔ شادی کے بعد سوشل میڈیا پر دونوں کو آئیڈیل کپل کا اعزاز بھی دیا۔
نیمل خاور نے ایک روز قبل اپنے انسٹاگرام اکاؤنٹ پر تصاویر شیئر کرتے ہوئے بتایا کہ ’’ہم ہنی مون کے لیے بارسلونا جارہے ہیں‘‘۔
یاد رہے کہ چند روز قبل پاکستانی اداکار حمزہ علی عباسی نے ایک ٹویٹ کیا تھا جس کے بعد مختلف چہ مگوئیاں شروع ہوگئیں اور ساتھ ہی اُن کے مداح بھی تذبذب کا شکار ہوگئے۔
اداکار نے ٹویٹ میں لکھا تھا کہ ’’ایک دہائی سے زائد عرصے پر محیط سفر اپنے اختتام کو پہنچ گیا، رواں ماہ کے آخر میں بہت اہم اعلان کروں گا‘‘۔
انہوں نے یہ بھی لکھا تھا کہ ’’اکتوبر کے اواخر تک سوشل میڈیا سے دور رہوں گا اور امید کرتا ہوں کہ میری بات کو زیادہ سے زیادہ لوگ سنیں گے‘‘۔
یاد رہے کہ حمزہ علی عباسی اور نیمل خاور 25 اگست کو ازدواجی بندھن میں بندھے جس کے بعد اداکارہ نے شوبز انڈسٹری کو خیر باد کہہ دیا۔
یہ بھی یاد رہے کہ حمزہ علی عباسی نے اپنے کریئر کا آغاز 2006 میں تھیٹر سے کیا، بعد ازاں انہوں نے اے آر وائی ڈیجیٹل کے ڈرامے پیارے افضل میں مرکزی کردار ادا کر کے شہرت کی بلندیوں کو چھوا، اسی دوران انہوں نے مختلف فلمیں بھی کیں۔
