ARYNews.tv | Urdu – Har Lamha Bakhabar

Tag: ہوابازی

  • بارش میں اسلام آباد ایئرپورٹ کی چھت گرنے پر نوٹس، تین دن میں مستقل حل کی ہدایت جاری

    بارش میں اسلام آباد ایئرپورٹ کی چھت گرنے پر نوٹس، تین دن میں مستقل حل کی ہدایت جاری

    اسلام آباد: نیو اسلام آباد ایئر پورٹ کی چھت بارش سے گرنے سے متعلق اے آر وائی نیوز کی خبر پر وفاقی و زیر برائے ہوا بازی غلام سرور خان اور ڈی جی سی اے اے نے نوٹس لے لیا۔

    تفصیلات کے مطابق وفاقی وزیر غلام سرور اور ڈائریکٹر جنرل سول ایوی ایشن اتھارٹی نے نیو اسلام آباد ایئر پورٹ پر بارش سے نقصانات کا نوٹس لیتے ہوئے انتظامی افسران سے واقعے کی جامع رپورٹ طلب کر لی۔

    ایوی ایشن ڈویژن کے سینئر جوائنٹ سیکریٹری عبدالستار کھوکھر کا کہنا ہے کہ نیو اسلام آباد ایئر پورٹ کے پروجیکٹ منیجر اور ایئر پورٹ منیجر سے رپورٹ کے ساتھ ڈی جی نے 3 دن کے اندر ایئر پورٹ کی چھت کی ناقص تعمیر کا مسئلہ مستقل حل کرنے کی ہدایت جاری کی ہے، جس میں ایئر پورٹ میں پانی کی نکاسی اور نالوں کا ڈیزائن تبدیل کرنا شامل ہے۔

    نئے اسلام آباد ایئرپورٹ پر بارش سے گرتی سیلنگ کی ویڈیو منظر عام پر

    اس سلسلے میں وفاقی وزیر برائے ہوا بازی غلام سرور خان کل 17 اگست کو ایئر پورٹ کا دورہ بھی کریں گے۔

    ایوی ایشن ڈویژن ترجمان کا کہنا ہے کہ واقعے کے روز 14 اگست کی صبح تیز بارش کے دوران 90 منٹ سے بھی کم وقت میں 56 ملی میٹر بارش ریکارڈ کی گئی تھی، طوفانی بارش سے ایئر پورٹ کا ڈومیسٹک آمد کا لاؤنج، سی آئی پی لاؤنج اور بین الاقوامی روانگی لاؤنج کے مختلف مقامات پر پانی کے بھاری رساؤ کے باعث سیلنگ گر گئی تھی۔

    یاد رہے کہ آج اے آر وائی نیوز نے اسلام آباد ایئر پورٹ پر بارش کے دوران نقصانات کی خبر اور ویڈیو نشر کی تھی۔

  • سی اے اے جعلی لائسنس کے حامل کپتانوں کے خلاف کارروائی سے گریزاں

    سی اے اے جعلی لائسنس کے حامل کپتانوں کے خلاف کارروائی سے گریزاں

    کراچی: وفاقی وزیر ہوا بازی کی ہدایت کے باوجود سول ایوی ایشن اتھارٹی (سی اے اے) جعلی لائسنس کے حامل کپتانوں کے خلاف کارروائی سے گریزاں نظر آ رہی ہے۔

    اے آر وائی نیوز کے مطابق سول ایوی ایشن اتھارٹی کی جانب سے پی آئی اے کو تاحال جعلی لائسنس ہولڈر پائلٹس کی فہرست فراہم نہ کی جا سکی، قومی ایئرلائن کے سی ای و ایئر مارشل ارشد ملک اب تک 2 بار ڈی جی سی اے اے کو خط لکھ چکے ہیں۔

    ذرایع کا کہنا ہے کہ سی اے اے نے حکومت پاکستان کی ہدایت پر پی آئی اے کے 150 پائلٹس کے خلاف انکوائری کی مگر رپورٹ نہیں دی، ترجمان پی آئی اے کا کہنا ہے کہ قومی ایئرلائن نے اپنی انکوائری کے بعد 17 جعلی لائسنس کے حامل پائلٹس کو گراؤنڈ کر کے جہاز اڑانے سے روکا ہوا ہے۔

    طیارہ حادثے کی رپورٹ ، مبینہ جعلی لائسنس کے حامل پائلٹس کیخلاف تحقیقات کا دائرہ کار وسیع

    ترجمان کے مطابق 17 پائلٹس کو فروری 2019 میں گراؤنڈ کیا گیا تھا، ان 17 پائلٹس کو تقریباً 20 کروڑ روپے اب تک تنخواہوں کی مد میں ادا کیے جا چکے ہیں، تنخواہوں کی مد میں کروڑوں روپے پی آئی اے کو نقصان برداشت کرنا پڑا۔

    سپریم کورٹ کا جعلی ڈگری رکھنے والے پائلٹس کے معاملے کا نوٹس، ایئرلائنز سربراہان طلب

    پی آئی اے کے ترجمان نے بتایا کہ ایک طرف کروڑوں روپے نقصان برداشت کیا گیا، دوسری طرف دو بار خط لکھنے کے باوجود تاحال سی اے اے نے 150 پائلٹس کی فہرست پی آئی اے کو فراہم نہیں کی۔

    ترجمان کا کہنا تھا کہ سول ایوی ایشن اتھارٹی فہرست فراہم کرے گی تو فوری طور پر جعلی لائسنس والے پائلٹس کو گراؤنڈ کر دیا جائے گا۔

  • پالپا کا پروازیں آپریٹ کرنے سے انکار، اصل وجہ سامنے آ گئی

    پالپا کا پروازیں آپریٹ کرنے سے انکار، اصل وجہ سامنے آ گئی

    کراچی: پاکستان ایئر لائن پائلٹس ایسوسی ایشن (پالپا) کے پروازیں آپریٹ کرنے سے انکار کی اندرونی کہانی سامنے آ گئی۔

    اے آر وائی نیوز کے مطابق پالپا نے پی آئی اے کی پروازیں آپریٹ کرنے سے انکار کر دیا ہے، ذرایع کا کہنا ہے کہ پالپا انتظامیہ کے اختلافات کی اصل وجہ تنخواہ سے 3 فی صد کٹوتی ہے، کپتانوں نے پی آئی اے کی مالی مشکلات کے تناظر میں کٹوتی سے انکار کر دیا ہے۔

    ذرایع کا کہنا ہے کہ پالپا نے انتظامیہ کو خط میں لکھا کہ کٹوتی کی بجائے ان کی تنخواہوں میں اضافہ کیا جائے، انتظامیہ کی جانب سے مطالبہ نہ ماننے پر پائلٹس تنظیم نے پروزایں آپریٹ کرنے سے انکار کر دیا، آج عراق میں پھنسے پاکستانیوں کی واپسی کے لیے جانے والی پرواز بھی منسوخ کی گئی۔

    پائلٹوں کا انکار، عراق سے پاکستانیوں کو واپس لانے والی پرواز منسوخ

    ذرایع کا کہنا ہے کہ کرونا وائرس کی صورت حال کی وجہ سے مالی مشکلات پر کپتانوں کی مجموعی تنخواہ پر انتظامیہ نے 3 فی صد کٹوتی کی، دوسری طرف سی ای او ارشد ملک اور اعلیٰ افسران نے اپنی تنخواہوں سے 20 فی صد کٹوتی کرائی، پی آئی اے ہوا باز 3 فی صد ہونے کے باوجود تنخواہوں کا 36 فی صد لیتے ہیں، پائلٹس کی مراعات میں بزنس کلاس سفر، فائیو اسٹار ہوٹلز میں قیام بھی شامل ہے، کام نہ کرنے کے باوجود 75 گھنٹے کا فلائنگ الاؤنس ملتا ہے جو 9 ہزار فی گھنٹہ سے لے کر 14 ہزار فی گھنٹہ ہے۔

    ذرایع نے مزید بتایا کہ پائلٹس جب منزل پر پہنچتے ہیں تو وہاں قیام کا لازمی تقاضا کرتے ہیں اور اسی طیارے پر واپس آنے کے لیے تیار نہیں ہوتے، موجودہ حالات میں 20 پائلٹس نے لاہور یا اسلام آباد جانے کے لیے چارٹرڈ طیارے کا مطالبہ بھی کیا، ارشد ملک نے پائلٹس اور عملے کو سی 130 پر بھجوانے کی آفر بھی کی، پائلٹس نے کارگو طیارے میں جانے سے بھی انکار کر دیا تھا، پی آئی اے انتظامیہ نے این ڈی ایم اے سے حفاظتی سامان لے کر دینے کی بھی آفر کی۔

    پالپا کا کہنا تھا کہ سی ون تھرٹی طیارے میں سفر نہیں کر سکتے، اس میں انشورنس مسائل ہیں۔ بتایا گیا کہ پالپا نے بیرون ملک سے واپسی پر عملے کو قرنطینہ میں رکھنے کے سلسلے میں بھی فرمائش کی کہ انھیں قرنطینہ سینٹرز کی بجائے فرسٹ کلاس ہوٹل میں رکھا جائے۔ جب کہ سی ای او کے بارہا مذکرات کے لیے بلانے پر بھی پالپا صدر نے ملاقات سے انکار کیا۔

    پالپا صدر کا مؤقف ہے کہ صرف وزیر ہوابازی سے بات کریں گے۔

  • پاکستان کے ہوا بازی کے شعبے میں اہم ترین پیش رفت

    پاکستان کے ہوا بازی کے شعبے میں اہم ترین پیش رفت

    کراچی: پاکستان کے ہوا بازی کے شعبے میں اہم ترین پیش رفت سامنے آگئی، سی اے اے ایگزیکٹیو کمیٹی نے ایئرنیوی گیشن پلان 2025 کی منظوری دے دی۔

    تفصیلات کے مطابق سی اے اے نے ایئرنیوی گیشن پلان 2025 پر عمل درآمد شروع کردیا، ایئرنیوی گیشن پلان سے ریونیو میں 25سے30فیصد اضافہ ہوگا، سی اےاے نے بین الاقوامی ایوی ایشن قوانین کے تحت فلائٹ سیکٹر میں اضافہ کردیا۔

    پاکستانی فضائی حدود 7سیکٹر کے اضافے سے 14سیکٹر پر مشتمل ہوگی، ذرائع کا کہنا ہے کہ یورپ، کینیڈا، سعودی عرب اور خلیجی ممالک کی پروازوں میں مزید اضافہ ہوگا۔

    ذرائع کا کہنا تھا کہ سی اے اے نے ایئر ٹریفک کے بڑھتے رحجان کی وجہ سے عمل درآمد شروع کیا، ایئرنیوی گیشن پلان کے تحت کنٹرول ٹاور کو جدید ٹیکنالوجی سے آراستہ کیا جارہا ہے، سی اےاے نے 6جدید ریڈار سسٹم ایم او ڈی ایس بھی نصب کردیئے ہیں۔

    کراچی ایئرپورٹ پر 4 اور اسلام آباد ایئرپورٹ پر 2جدید ریڈار سسٹم نصب کردیا گیا، ذرائع کا مزید کہنا تھا کہ مختلف ایئرپورٹس پر اے ڈی ایس بی سسٹم بھی نصب کیے گئے، عالمی قوانین کے تحت پاکستان کی فضائی حدود کو مزید وسیع کیا جارہا ہے۔

  • آذربائیجان کا آیندہ سال سے پاکستان کے لیے پروازیں شروع کرنے کا اعلان

    آذربائیجان کا آیندہ سال سے پاکستان کے لیے پروازیں شروع کرنے کا اعلان

    باکو: جمہوریہ آذربائیجان نے آیندہ سال سے پاکستان کے لیے پروازیں شروع کرنے کا اعلان کر دیا ہے۔

    تفصیلات کے مطابق آذر بائیجان نے پاکستان کے لیے براہ راست پروازیں شروع کرنے کا اعلان کیا ہے، جس سے سیاحوں کے وقت اور پیسے کی بچت ہوگی۔

    مغربی وضع قطع کے حامل مشرقی ملک آذربائیجان میں پاکستانی سیاحوں کی تعداد میں بھی اضافہ ہو چکا ہے، نئے آسان ویزا سسٹم سے 3 مراحل میں گھر یا موبائل سے ای ویزا حاصل کیا جا سکتا ہے۔

    یاد رہے کہ رواں سال مئی میں اسلام آباد میں آذر بائیجان کے سفیر علی علیزادہ سے ملاقات کرتے ہوئے وفاقی وزیر برائے ہوا بازی غلام سرور خان نے کہا تھا کہ آذربائیجان اور پاکستان کے درمیان براہ راست پروازیں عن قریب شروع کی جائیں گی۔

    یہ بھی پڑھیں:  آذر بائجان کے وزیر خارجہ کا مقبوضہ کشمیر کی صورت حال پر تشویش کا اظہار

    دونوں ممالک کے درمیان ہوا بازی کے شعبے میں باہمی تعاون پر اتفاق رائے کیا گیا تھا، غلام سرور خان کا کہنا تھا پاکستان اور آذربائیجان کے تعلقات برادرانہ ہیں اور یہ ایک دوسرے پر بھروسے کی وجہ سے قائم ہیں۔

    سفیر علی علیزادہ نے کا کہنا تھا کہ آذربائیجان بھی پاکستان سے اپنے روابط بڑھانے پر یقین رکھتا ہے۔

    خیال رہے کہ اگست میں وزیر خارجہ شاہ محمود نے آذربائیجان کے وزیر خارجہ سے ٹیلی فونک رابطہ کر کے مقبوضہ کشمیر کی تشویش ناک صورت حال پر تبادلۂ خیال کیا تھا، آذربائجان کے وزیر خارجہ نے مقبوضہ کشمیر کی صورت حال پر تشویش کا اظہار کیا، انھوں نے خطے کو کشیدگی سے بچانے کے لیے تصفیہ طلب امور کے پُر امن حل کی ضرورت پر بھی زور دیا۔