لاہور: وزیراعلیٰ پنجاب مریم نواز نے کہا ہے کہ محکمہ پولیس میں رشوت کے خاتمے کے لیے یونیفارم کے ساتھ کیم لگا رہے ہیں۔
تفصیلات کے مطابق وزیراعلیٰ پنجاب مریم نواز نے ہیلی کاپٹر میں صحافیوں سے گفتگو کرتے ہوئے کہا کہ محکمہ پولیس میں رشوت کے خاتمے کے لیے یونیفارم کے ساتھ کیمرا لگا رہے ہیں، کوئی بھی پولیس اہلکار اس یونیفارم کے بغیر ڈیوٹی نہیں کریگا۔
وزیراعلیٰ پنجاب نے کہا کہ وائس چانسلرز کی تعیناتی پر گورنر کو جس پر اعتراض تھا مسترد کر سکتے تھے، وائس چانسلر کی تعیناتی پر سارا معاملہ پنجاب یونیورسٹی کا ہے، گورنر اپنا وائس چانسلر لگوانا چاہتے ہیں لیکن میرٹ اور شفافیت پر وائس چانسلرز لگائے ہیں۔
مریم نواز نے کہا کہ ہر کام میرٹ پر کر رہی ہوں، سفارش بہت آتی ہیں ایم این اے ایم پی اے سب ہی سفارش لاتے ہیں لیکن میں کسی کی بھی نہیں سنتی، صبح 9 بجے سے رات 12 بجے تک میں کام کرتی ہوں۔
وزیراعلیٰ پنجاب نے کہا کہ کالجز یونیورسٹیز میں منشیات کی روک تھام کے لیے بڑے گینگ پکڑے گئے ہیں، بڑے گینگز اپنے ذاتی جہازوں پر مختلف شکلوں میں منشیات لا کر بیچتے تھے۔
مریم نواز نے مزید کہا کہ کلینکس آن ویلز سے دیہی جگہوں پر سیکڑوں افراد مستفید ہو رہے ہیں اس کے علاوہ کسان کارڈ اور ٹریکٹر جب لانچ ہوا لاکھوں لوگوں نے فوری اپلائی کیا۔
