ARYNews.tv | Urdu – Har Lamha Bakhabar

Tag: ہیلی کاپٹر

  • سائیکل سوار کا ہیلی کاپٹر سے برج العرب پر چھلانگ لگانے کا ناقابل یقین اسٹنٹ

    سائیکل سوار کا ہیلی کاپٹر سے برج العرب پر چھلانگ لگانے کا ناقابل یقین اسٹنٹ

    سائیکل پر کرتب دکھانا ہر کسی کے بس کی بات نہیں لیکن برطانوی نوجوان نے دبئی میں سائیکل چلاتے ہوئے خطرناک اسٹنٹ دکھا کر سب کو حیران کردیا۔

    تفصیلات کے مطابق متحدہ عرب امارت میں برطانیہ کے ماہر سائیکل سوار نوجوان نے سائیکل پر سوار ہوکر ہیلی کاپٹر نے دبئی کے عالی شان ہوٹل برج العرب کے ہیلی پیڈ پر چھلانگ لگانے کا ناقابل یقین اسٹنٹ پیش کیا، سائیکل سوار کافی دیر سے چھلانگ لگانے کےلیے مناسب وقت کا انتظار کررہا تھا۔

    یوٹیوب پر جاری ہونے والی ویڈیو میں دیکھا جاسکتا ہے کہ پروفیشنل بی ایم ایکس سائیکلسٹ کریس کائل نے سائیکل پر سواری کرتے ہوئے دبئی کے تمام مشہور مقامات پر خطرنات اسٹنٹ کرکے سب کو حیران کردیا، کریس نے سائیکل پر ناقابل یقین کرتب دکھانے کا آغاز برج العرب سے کیا۔

    یوٹیوب پر شائع ہونے والی ویڈیو میں دیکھا جاسکتا ہے کہ کریس کائل دبئی کا دلکش ٹور سائیکل پر کرتے ہوئے دبئی کے معروف واٹر پارک وائلڈ وادیز کی انتہائی پُرخطر سلایڈز اور جمیرہ کے ساحل پر بنائے گئے انتظار گاہ کی چھت پر سائیکل چلانے کا اسٹنٹ پیش کیا۔

    اماراتی خبر رساں ادارے کا کہنا تھا کہ دلچسپ و خوفناک اسٹنٹ کرنے والے کریس کائل نے دنیا کی بلند ترین عمارت برج الخلیفہ کی بلندی پر بھی سائیکل چلاکر دیکھنے والوں کو حیرت زدہ کردیا۔

    برطانوی سائیکلسٹ نے دبئی کی گلیوں اور معروف شاہراوں پر سائیکل کے ذریعے کرتب دکھاتے ہوئے اپنے ناقابل یقین اسٹنٹ کا اختتام سمندر میں چلتی ہوئی کشتی پر کیا۔

  • میکسیکو کی گورنر مارتھا اریکا شوہر سمیت ہیلی کاپٹر حادثے میں ہلاک

    میکسیکو کی گورنر مارتھا اریکا شوہر سمیت ہیلی کاپٹر حادثے میں ہلاک

    میکسیکو سٹی  : مکسیکن ریاست پوائبلا کی گورنر مارتھا ایریکا اپنے شوہر سینیٹر رائفل سمیت ہیلی کاپٹر حادثے میں ہلاک ہوگئیں۔

    غیر ملکی میڈیا کے مطابق جنوبی امریکی ملک میکسیکو کی وسطی ریاست پوائبلا میں ہیلی کاپٹر گر کر تباہ ہوگیا جس کے نتیجے میں ملک کا طاقتور ترین جوڑا گورنر مارتھا ایریکا النسو اور  ان کے شوہر سینیٹر رائفل مورینو ہلاک ہوگئے۔

    اعلیٰ حکام کاکہنا ہے کہ حادثے میں دو پائلٹ بھی ہلاک ہوئے، مکیسکن حکومت نے حادثے میں گورنر اور ان کے شوہر کی ہلاکت کی تصدیق کردی ہے۔

    غیر ملکی خبر رساں ادارے کا کہنا ہے کہ ہیلی کاپٹر حادثہ پیر کے روز ریاستی دارالحکومت میں ہیلی کاپٹر کے پرواز کرنے کے کچھ دیر بعد پیش آیا۔

    گورنر مارتھا ایریکا اور ان کے شوہر سینیٹر رائفل کی موت کی تصدیق میکسیکو کے نئے صدر ایڈریس مینئول نے کی تھی۔

    میکسیکن صدر نے ٹوئٹ میں کہا تھا کہ ’میں دو سیاست دانوں کی موت پر افسردہ اور متاثرہ مقتول سیاست دانوں کے اہل خانہ کے غم میں برابر کا شریک ہوں‘۔

    ان کا کہنا تھا کہ ہم نے تحقیقات کا آغاز کردیا ہے کہ تاکہ حادثے کی وجوہات معلوم ہوسکے۔

    برطانوی خبر رساں ادارے کا کہنا ہے کہ حادثے میں ہلاک ہونے والے سینیٹر رائفل مورینو سنہ 2011 سے 2017 تک پوائبلا کے گورنر رہ چکے ہیں۔

    غیر ملکی خبر رساں ادارے کا کہنا تھا کہ 45 سالہ مارتھا ایریکا کا تعلق میکسیکو کی سینٹر رائٹ پین پارٹی سے تعلق تھا، جو ریاست پوئبلا کی پہلی خاتون گورنر منتخب ہوئی تھیں۔

    خیال رہے کہ رواں برس میکسیکو میں ایک وزیر کا ہیلی کاپٹر فنی خرابی کے باعث عوام مقام پر گرا تھا جس کے باعث 13 افراد ہلاک ہوئے تھے جبکہ وزیر خوفناک حادثے میں محفوظ رہے تھے۔

  • برطانیہ میں ہیلی کاپٹر حادثے کا شکار، فٹبال کلب کا مالک ہلاک

    برطانیہ میں ہیلی کاپٹر حادثے کا شکار، فٹبال کلب کا مالک ہلاک

    لندن : برطانیہ کی لایئسٹر سٹی فٹبال کلب کے مالک کا ہیلی کاپٹر  اسٹیڈیم کے باہر حادثے کا شکار ہوا تھا فٹبال کلب سے حادثے کے نتیجے میں مالک کے ہلاک ہونے کی تصدیق کردی ہے۔۔

    تفصیلات کے مطابق برطانیہ کے مشہور کنگ پاور فٹبال اسٹیڈیم میں ہفتے کے روز لایئسٹر سٹی کلب اور ویسٹ ہیم کے درمیان کھیلی جانے والی پریمئر لیگ کے اختتام پر گراؤنڈ کے مالک کا ہیلی کاپٹر فنی خرابی کے باعث حادثے کا شکار ہوگیا۔

    لایئسٹر پولیس کا کہنا ہے کہ حادثے میں ہلاک ہونے والے افراد میں تھائی ارب پتی، دو اسٹاف ممبر دو پائلٹ شامل ہیں، جن کی ہلاکت کی تصدیق لایئسٹر سٹی کلب نے بھی کردی ہے۔

     

    برطانوی خبر رساں ادارے کا کہنا تھا کہ ہیلی کاپٹر کا پائلٹ سوفر گذشتہ 20 برس سے طیارے اور ہیلی کاپٹر اڑا رہے تھے، ہلاک پائلٹ اپنے نجی صحافتی ادارے کا براڈسٹنگ ہیلی کاپٹر بھی اڑا چکے ہیں۔

    برطانوی خبر رساں ادارے کا کہنا تھا کہ تھائی لینڈ کے ارب پتی شہری وکائی سریوڈھن اپرابھا نے سنہ 2010 میں لایئسٹر سٹی اسٹیڈیم خریدا تھا۔

    مقامی میڈیا کا کہنا تھا کہ ہیلی کاپٹر اڑان بھرنے کے چند لمحے بعد ہی حادثے کے باعث زمین بوس ہوگیا تھا۔

    برطانوی خبر رساں ادارے کا کہنا تھا کہ اسٹیڈیم کے پارکنگ ایریا میں مقامی وقت کے مطابق 10:20 پر نجی ہیلی کاپٹر حادثے کے باعث گر تباہ ہوا تھا، حادثے کے نتیجے میںوکائی سریوڈھن سمیت ہیلی کاپٹر میں سوار تمام افراد ہلاک ہوگئے۔

    پولیس کا کہنا ہے کہ ہیلی کاپٹر میں حادثے کے بعد خوفناک آگ بھڑک اٹھی تھی، متاثرہ ہیلی کاپٹر کے ملبے سے ابھی تک شولے بھڑک رہے ہیں جس کے باعث ہیلی کاپپٹر میں مزید کتنے کے افراد تھے معلوم نہیں ہوسکا۔

    برطانوی خبر رساں ادارے کا کہنا ہے کہ ہنگامی خدمات انجام دینے والا عملہ فائربریگیڈ آگ بجھانے میں مصروف ہیں۔

    غیر ملکی میڈیا کا کہنا ہے کہ پریمیر لیگ کی کوریج کرنے والے کیمرہ مین نے خبر رساں ادارے کا بتایا کہ میں میچ کی تصاویر بنا رہا تھا کہ اچانک زور دار دھماکے کی آواز سنی اور جائے حادثہ پر پہنچا تو دیکھا وکائی سریوڈھن اپرابھا کا ہیلی کاپٹر حادثے کا شکار ہوا تھا۔

    برطانوی میڈیا کا کہنا ہے کہ لایئسٹر سٹی کلب نے وکائی سریوڈھن اپرابھا کی ملکیت میں سنہ 2016 میں پریمئر لیگ جیتی تھی۔

    یاد رہے کہ رواں برس مئی میں آئر لینڈ کے علاقے بوگ لینڈ میں پیراشوٹ طیارے کو حادثہ پیش آیا ہے جس کے نتیجے میں سات سالہ بچے سمیت دو افراد ہلاک ہوئے ہیں۔

  • نیپال میں ہیلی کاپٹر حادثے کا شکار، 7 مسافر ہلاک

    نیپال میں ہیلی کاپٹر حادثے کا شکار، 7 مسافر ہلاک

    کٹھمنڈو : نیپال کے ضلع گورکھا سے اڑان بھرنے والا نجی کمپنی کا ہیلی کاپٹر ضلع ڈادہنگ کے جنگل میں حادثے کا شکار ہوگیا، حادثے کے باعث 7 مسافر ہلاک ہوگئے۔

    تفصیلات کے مطابق وسطی نیپال کے پہاڑی سلسلے میں ہفتے کے روز مسافر بردار ہیلی کاپٹر حادثے کو حادثہ پیش آیا ہے، حادثے کا شکار ہونے والے ہیلی کاپٹر میں سوار تمام مسافر ہلاک ہوگئے، حکام کا خیال ہے کہ ہیلی کاپٹر خراب موسم کے باعث حادثے کا شکار ہوا ہے۔

    غیر ملکی خبر رساں ادارے کا کہنا تھا کہ حادثے کا شکار ہونے والا ہیلی کاپٹر نے نیپال کے ضلع گورکھا سے 7 مسافروں کے ہمراہ اڑان بھری تھی جس کے بعد ایئر ٹریفک کنٹرول ٹاور سے پائلٹ کا رابطہ منقطع ہوگیا تھا۔

    کٹھمنڈو ایئرپورٹ کے جنرل مینیجر راج کمار کا کہنا ہے کہ مذکورہ ہیلی کاپٹر ضلع ڈادہنگ کے پہاڑی سلسلے کے جنگلات میں حادثے کا شکار ہوا ہے۔

    راج کمار کا کہنا ہے کہ ’سیکیورٹی ادارے اور ہنگامی خدمات انجام دینے والا عملہ آسمانی اور زمینی راست کے ذریعے جائے حادثہ پر پہنچنے کی کوشش کررہا ہے تاہم خراب موسم ریسکیو اہلکاروں کو آپریشن میں رکاٹوں کا سامنا ہے۔

    غیر ملکی خبر رساں ادارے کا کہنا تھا کہ نیپال میں بہت زیادہ پہاڑی سلسلوں کے باعث کئی شہروں اور علاقوں میں سڑکیں و شاہراہیں نہیں ہیں لہٰذا سیاحوں کی ملک میں آمد و رفت کے لیے اور سامان کی ترسیل کی وجہ نجی ہیلی کاپٹروں کا کاروبار عروج پر ہے۔

    مقامی میڈیا کا کہنا ہے کہ نیپال میں ایئر سیفٹی نہ ہونے کے باعث دنیا بھر میں سب سے زیادہ ٹریفک حادثات نیپال میں ریکارڈ ہوئے ہیں۔

    مقامی خبر رساں ادارے کا کہنا ہے کہ سنہ 2016 میں نیپال کے دارالحکومت سے 22 کلومیٹر کے فاصلے پر حادثے کا شکار ہونے والے ہیلی کاپٹر میں 7 افراد ہلاک ہوئے تھے۔

  • پاک بحریہ کا ہیلی کاپٹر بحیرہ عرب میں گر کر تباہ، ایک رکن شہید

    پاک بحریہ کا ہیلی کاپٹر بحیرہ عرب میں گر کر تباہ، ایک رکن شہید

    اسلام آباد : پاک بحریہ کا ہیلی کاپٹر بحیرہ عرب میں  گر کر تباہ ہوگیا، حادثے کے نتیجے میں  عملے کا ایک رکن شہید ہوگیا  جبکہ حادثے کی وجوہات جاننے کے لئے تحقیقات شروع کردی گئی ہے۔

    تفصیلات کے مطابق پاک بحریہ کےہیلی کاپٹرکو آپریشنل پرواز  کے دوران بحیرہ عرب میں حادثہ پیش آیا ، حادثے میں ہیلی کاپٹرعملے کے ایک رکن نے جام شہادت نوش کیا۔

    پاک بحریہ کے ترجمان کا کہنا ہے ہیلی کاپٹر معمول کی آپریشن پرواز پر تھا کہ بحرہ عرب میں حادثے کا شکار ہوگیا، حادثے کے بعد امداد ی کارروائیاں شروع کر دی گئیں ہیں ۔

    ترجمان کے مطابق حادثے کی وجوہات جاننے کے لئے تحقیقات شروع کردی گئی ہیں۔

    یاد رہے رواں سال جون میں پاک بحریہ کے سی کنگ ہیلی کاپٹرز نے شمالی بحیرہ عرب میں ڈوبنے والی ایرانی کشتی کے عملے کو بچا لیا تھا، پاک بحریہ کے جہاز پی این ایس نصر نے بھی سرچ اینڈ ریسکیو آپریشن میں مدد فراہم کی تھی۔

    بچ جانے والے افراد نے بہترین پیشہ ورانہ انداز میں بروقت ریسکیو آپریشن انجام دینے پر پاک بحریہ کا شکریہ ادا کیا تھا۔

    یاد رہے مئی 2015 میں پاک فوج کے ایم 17 ہیلی کاپٹر کو تکنیکی خرابی کے سبب گلگت کے علاقے نلترمیں حادثہ پیش آیا تھا، جس میں دو پائلٹس اور چیف انجینئر شہید جبکہ 6 غیرملکی افراد جاں بحق ہوگئے تھے۔

    جن میں ناروے کے سفیر،فلپائن کےسفیر اور ان کی اہلیہ اور ملائشیا اور انڈونیشیا کے سفیروں کی بیگمات شامل ہیں۔

  • ہیلی کاپٹر کے معاملے پر باضابطہ حکومتی بیان سامنے آگیا

    ہیلی کاپٹر کے معاملے پر باضابطہ حکومتی بیان سامنے آگیا

    اسلام آباد: وزیرِ اعظم عمران خان کے ہیلی کاپٹر کے استعمال کے معاملے پر حکومت کی جانب سے باضابطہ بیان جاری ہو گیا، وزیرِ اعظم کے معاون خصوصی کا کہنا ہے کہ اس سلسلے میں نامکمل معلومات پر بحث کی گئی۔

    تفصیلات کے مطابق گزشتہ چند دنوں سے وزیرِ اعظم کے ہیلی کاپٹر کے استعمال اور خرچ کے سلسلے میں ملک بھر میں بحث جاری رہی، تاہم معاون خصوصی نعیم الحق نے اس بحث کو بے مقصد قرار دے دیا۔

    نعیم الحق نے جاری کردہ اعلامیے میں کہا ’وزیرِ اعظم کے ہیلی کاپٹر کے بارے میں نامکمل معلومات پر بحث ہو رہی ہے۔‘

    وزیرِ اعظم کے معاون خصوصی کا کہنا تھا کہ عمران خان بہ طور وزیرِ اعظم ہفتے میں دو بار ہیلی کاپٹر کا استعمال کرتے ہیں۔

    نعیم الحق کے مطابق ہیلی کاپٹر کا پہلا استعمال جمعہ کی شام بنی گالہ جانے کے لیے کیا جاتا ہے، جب کہ ہیلی کاپٹر کا دوسرا استعمال پیر کو وزیرِ اعظم ہاؤس واپسی پر ہوتا ہے۔

    آٹھ ناٹیکل مائیل ہیلی کاپٹر کے استعمال پر سو لیٹر فیول خرچ ہوتا ہے، ماہرین

    خیال رہے کہ وزیرِ اعظم عمران خان پر اپوزیشن کی جانب سے اس حوالے سے تنقید ہو رہی ہے کہ وہ ایک طرف سادگی اور اخراجات کم کرنے کا درس دے رہے ہیں جب کہ دوسری طرف ہیلی کاپٹر میں سفر کرتے ہیں۔

    جب ہیلی کاپٹر کے خرچے کا ذکر آیا تو وفاقی وزیرِ اطلاعات فواد چوہدری نے بیان دیا کہ اس کا خرچہ صرف 55 روپے ہے، اس بیان نے ہیلی کاپٹر کے معاملے کو مزید مہمیز دی اور اپوزیشن سمیت عوام میں بھی اس کا مذاق اڑایا گیا۔

  • آٹھ ناٹیکل مائیل ہیلی کاپٹر کے استعمال پر سو لیٹر فیول خرچ ہوتا ہے، ماہرین

    آٹھ ناٹیکل مائیل ہیلی کاپٹر کے استعمال پر سو لیٹر فیول خرچ ہوتا ہے، ماہرین

    کراچی : وزیراعظم ہاؤس سے بنی گالا ہیلی کاپٹر پر جانے کا معاملہ پر ایوی ایشن انڈسٹری ماہرین کا کہنا ہے کہ آٹھ ناٹیکل مائیل ہیلی کاپٹر کے استعمال کرنے پر سو لیٹر ایوی ایشن فیول استعمال ہوتا ہے۔

    ایوی ایشن فیول 90سے سو روپے فی لیٹر حکومتی اداروں کو فراہم کیا جاتا ہے، وزیرِ اطلاعات فواد چوہدری کے مطابق ہیلی کاپٹر کا خرچ 50 سے 55 روپے فی کلومیٹر ہے۔

    گوگل نقشے کے مطابق بنی گالا سے پاک سیکرٹیریٹ کا فاصلہ 15 کلومیٹر بنتا ہے، ہوا بازی کی زبان میں یہ فاصلہ 8 ناٹیکل مائل بنتا ہے، آگسٹا ویسٹ لینڈ کمپنی کا ہیلی کاپٹر اے ڈبلیو139وزیراعظم کے زیر استعمال ہے۔

    ایوی ایشن ماہر کے مطابق وزیراعظم عمران خان کے زیر استعمال ہیلی کاپٹر حکومتِ پاکستان کی ملکیت ہیں، وزیر اعظم کے زیر استعمال ہیلی کاپٹر کا فی ناٹیکل میل خرچ 13ڈالر یعنی1600روپے بنتا ہے، پاکستانی روپوں میں مجموعی خرچہ دس ہزار سے12 ہزار روپے تک بنتا ہے۔

    ایوی ایشن انڈسٹری ماہرین کا مزید کہنا ہے کہ ہوائی سفر فی کلو میٹر نہیں، فی گھنٹہ کے حساب سے چارج کیا جاتا ہے، لاگت میں کرایہ ،کریو، مینٹیننس اور تیل کا خرچ شامل ہوتا ہے۔ ماہرین تو کہتے ہیں کہ سب سے سستا سفر سڑک پھر ریل اور پھر پانی کے جہاز کا سفر ہوتا ہے، پوری دنیا میں ہوائی سفر سے سب مہنگا ہوتا ہے۔

    کراچی میں ایک نجی کمپنی چارٹرڈ طیارے اور ہیلی سروس بھی فراہم کرتی ہے، نجی کمپنی کے مطابق کراچی سے حیدرآباد اور واپسی کراچی کا کرایہ ہیلی کاپٹر سروس کا چار ہزار ڈالر وصول کیا جاتا ہے، جو پاکستانی روپے میں پانچ لاکھ روپے بننتے ہیں۔

    نجی کمپنی نے کراچی کا پچیس منٹ ٹوور کی بھی سروس چلائی تھی۔ جو فی مسافر25 ہزار روپے تھی اور ہیلی کاپٹر میں چار مسافر سے ایک لاکھ روپے وصول کیا جاتا تھا۔

  • امریکی پولیس کے ہیلی کاپٹر کا حادثہ ‘ پائلٹ شدید زخمی

    امریکی پولیس کے ہیلی کاپٹر کا حادثہ ‘ پائلٹ شدید زخمی

    لٹل راک: امریکہ میں پولیس ہیلی کاپٹر ٹیک آف کرتے ہوئے توازن برقرار نہ رکھ سکا اور حادثے کا شکار ہوگیا، حادثے کے نتیجے میں پائلٹ شدید زخمی ہوگیا۔

    تفصیلات کے مطابق ہیلی کاپٹر کریش کا یہ واقعہ امریکی ریاست آرکنساس کے علاقے لٹل راک میں پیش آیا ، بیل ٹی ایچ 67 نامی اس پولیس ہیلی کاپٹر کو آزمائشی پرواز کے لیے اڑایا جارہا تھا۔

    پولیس کی جانب سے جاری کی جانے والی فوٹیج میں دیکھا جاسکتا ہے کہ ہیلی کاپٹر جیسے ہی اڑان بھرنے کے لیے زمین چھوڑتا ہے ، اس کا توازن بگڑنے لگتا ہے۔

    ویڈیو میں دیکھا جاسکتا ہے کہ بلند ہوتے ہی ایک بار پلیٹ فارم سے ٹکراتا ہے ، پھر اس کی دم زمین سے ٹکراتی ہے ۔،اسی دوران کسی شخص کی چیخ بھی بلند ہوتی ہے اور اسی اثنا میں ہیلی کاپٹر کا پر زمین سے ٹکراتا ہے جس کے بعد وہ قلابازی کھا کر پلٹ جاتا ہے۔

    حادثے کے نتیجے میں پائلٹ شدید زخمی ہوگیا تھا، جسے فوری طور پر ریسکیو کرکے اسپتال منتقل کیا گیا ، اسپتال ذرائع کا کہنا ہے کہ اب پائلٹ کی حالت خطرے سے باہر ہے۔

    پولیس کے مطابق یہ حادثہ صبح ۱۱ بجے پیش آیا جب پولیس کا ایک سابق آفیسر مرمت کے بعد ہیلی کاپٹر کو آزمائشی پرواز کے لیے اڑان بھرنے کی تیاری کررہا تھا۔

  • نواز شریف اور مریم نواز کی گرفتاری کیلئے نیب کو ہیلی کاپٹر دینے کی منظوری

    نواز شریف اور مریم نواز کی گرفتاری کیلئے نیب کو ہیلی کاپٹر دینے کی منظوری

    اسلام آباد : وزارت داخلہ نے نواز شریف اور مریم نواز کی گرفتاری کیلئے نیب کو ہیلی کاپٹر دینے کی منظوری دے دی، دونوں رہنماوں کو لاہور ائیرپورٹ سے  ہیلی کاپٹر کے زریعے  اسلام آباد منتقل کیا جائے گا۔

    تفصیلات کے مطابق پاکستان مسلم لیگ (ن) کے تاحیات قائد اور سابق وزیراعظم میاں محمد نوازشریف اور ان کی بیٹی مریم نواز کی نیب عدالت کی جانب سے مجرم قرار دئیے جانے اور سزا سنائے جانے کے بعد ان کی گرفتاری کے معاملے پر وفاقی وزارت داخلہ کا ایک اہم اجلاس منعقد ہوا۔

    اجلاس کی صدارت سیکرٹری داخلہ یوسف نسیم کھوکھر نے کی، اجلاس میں چیف سیکرٹری پنجاب ، آئی جی ، ڈپٹی چیئرمین نیب ، ڈی جی نیب لاہور ، ڈی جی ایف آئی اے اور چیف کمشنر اسلام آباد بھی شریک تھے۔

    ذرائع کے مطابق اجلاس میں فیصلہ کیا گیا کہ نواز شریف اور مریم نواز کو لاہور ائیرپورٹ سے ہیلی کاپٹر پر اسلام آباد منتقل کیا جائے گا۔

    وزارت داخلہ نے نواز شریف اور مریم نواز کی گرفتاری کیلئے نیب کو ہیلی کاپٹر دینے کی منظوری دے دی ہے اور لاہور ائیرپورٹ کی سیکورٹی کہ ذمہ داری نگران صوبائی حکومت کرے گا جبکہ ائیرپورٹ پر اترتے ہی امیگریشن حکام دونوں کو گرفتار کرکے نیب حکام کے حوالے کریں گے۔

    ذرائع نے مزید بتایا ہے کہ اسلام آباد میں سیکورٹی کے حالات دیکھ کر نواز شریف اور مریم کو احتساب عدالت میں پیش کرنے کا فیصلہ ہوگا۔ اگر سیکیورٹی صورتحال سازگار نہ ہوئی تو اڈیالہ جیل میں ہی احتساب عدالت کے جج بعد از گرفتاری کے قانونی تقاضے پورے کریں گے۔

    مزید پڑھیں :  نوازشریف اورمریم نواز کو لاہور سے بذریعہ ہیلی کاپٹر اڈیالہ منتقل کرنے کا فیصلہ

    یاد رہے کہ قومی احتساب بیورو نے نوازشریف اورمریم نواز کو لاہور ائیرپورٹ سے بذریعہ ہیلی کاپٹر اڈیالہ جیل منتقل کرنے کا فیصلہ کیا تھا، جس کے لئے ڈی جی نیب لاہور کی جانب سے چیئرمین نیب کو ایک خط لکھا تھا، جس میں موقف اختیار کیا گیا تھا کہ نیب ٹیم کو ایئرپورٹ پر ہیلی کاپٹر درکار ہوگا، نوازشریف، مریم جمعہ کو لاہور ایئرپورٹ اتریں گے، انھیں گرفتار کرکے ہیلی کاپٹرسے اڈیالہ جیل منتقل کیا جائے گا۔

    خیال رہے کہ میاں نوازشریف اور ان کی صاحبزادی مریم نواز نے 13 جولائی کو وطن واپسی کا اعلان کیا ہے۔

    واضح رہے کہ وفاقی دارالحکومت اسلام آباد میں احتساب عدالت نے سابق وزیراعظم نواز شریف، حسن اور حسین نواز، ان کی صاحبزادی مریم نواز اور داماد کیپٹن (ر) صفدر کے خلاف ایون فیلڈ ریفرنس کا فیصلہ سنایا تھا۔

    فیصلے میں نواز شریف کو دس سال قید اور جرمانے، مریم نواز کو سات سال قید مع جرمانہ جبکہ کیپٹن صفدر کو ایک سال قید کی سزا سنائی تھی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • کوئٹہ: پاک فوج کا ہیلی کاپٹر گر کر تباہ، ایف سی اہلکار شہید

    کوئٹہ: پاک فوج کا ہیلی کاپٹر گر کر تباہ، ایف سی اہلکار شہید

    کوئٹہ: صوبہ بلوچستان کے دارالحکومت کوئٹہ میں مشرقی بائی پاس میں پاک فوج کا ہیلی کاپٹر گر کر تباہ ہوگیا جس کے نتیجے میں فرنٹیئر کورپس (ایف سی) کا ایک اہلکار شہید ہوگیا۔

    پاک فوج کے شعبہ تعلقات عامہ آئی ایس پی آر کے مطابق ہیلی کاپٹر کوہلو سے کوئٹہ آرہا تھا۔

    ہیلی کاپٹر میں عملے کے علاوہ ایف سی کا زخمی اہلکار سوار تھا جسے کوہلو سے کوئٹہ لایا جارہا تھا۔

    آئی ایس پی آر کے مطابق لینڈنگ کے وقت ہیلی کاپٹر فنی خرابی کے باعث حادثے کا شکار ہوگیا۔ واقعے میں پائلٹ اور دیگر عملہ محفوظ رہا تاہم زخمی اہلکار شہید ہوگیا۔

    جائے حادثہ پر ریسکیو عملے کا امدادی کام جاری ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔