حیدرآباد کے پرانے شہر میں اتفاقیہ چلنے والی گولی کے باعث ہیڈ کانسٹیبل زندگی کی بازی ہار گیا، پولیس نے تحقیقات شروع کردیں۔
اے آر وائی نیوز کے مطابق حسینی علم پولیس اسٹیشن کی حدود میں اتفاقیہ طور پر چلنے والی گولی نے ہیڈ کانسٹیبل کو موت کی نیند سلا دیا۔
پولیس ذرائع کا اس حوالے سے کہنا ہے کہ29 سالہ بھوپتی سری کانت سوریہ پیٹ ضلع سے تعلق رکھتا تھا جبکہ حسینی علم پولیس اسٹیشن میں ہیڈ کانسٹیبل کے طور پر فرائض انجام دے رہا تھا۔
گزشتہ دو ماہ سے بھوپتی سری کانت کبوترخانہ کے پاس گارڈکی ڈیوٹی انجام دے رہا تھا، صبح کے وقت اولین ساعتوں میں سری کانت نیند میں تھا کہ اچانک اتفاقی طورپر گولی چل گئی۔
گولی لگنے کے باعث ہیڈ کانسٹیبل شدید زخمی ہوگیا، جسے اسپتال منتقل کیا گیا تاہم وہ زخموں کی تاب نہ لاتے ہوئے زندگی کی بازی ہار گیا، پولیس کی جانب سے تحقیقات کا آغاز کردیا گیا ہے۔
