دبئی پولیس نے اہم کامیابی حاصل کرتے ہوئے متعدد ملکوں میں بڑی کمپنیوں کا سسٹم ہیک کرنے والے بین الاقوامی گروہ کو حراست میں لے لیا ہے۔
بین الاقوامی خبر رساں ادارے کی رپورٹ کے مطابق بین الاقوامی گروہ معروف کمپنیوں کے سی ای اوز اور ڈائریکٹرز کے ای میلز ہیک کرکے وارداتیں کرنے میں ملوث تھا۔
رپورٹ کے مطابق دبئی پولیس کا اس حوالے سے کہنا ہے کہ ہیکرز نے 36 ملین ڈالر دومرحلوں میں ملک سے باہر بھیجے تھے۔ پولیس کے ماتحت ای کرائمز کی سپیشل ٹیم ہیکرز کی سرگرمیوں پر نظر رکھے ہوئے تھی۔
دبئی پولیس کے مطابق ہیکرز کو حراست میں لینے کی کارروائی ’مونوپولی آپریشن‘ کے نام سے انجام دی گئی۔
دبئی پولیس کا کہنا ہے کہ بین الاقوامی ہیکرز کا تعلق مختلف ممالک سے ہے۔ ان کا گروہ 43 افراد پر مشتمل تھا۔جو منظم کارروائیاں کررہا تھا۔
گروہ کا سرغنہ جو کہ بیرون ملک میں مقیم ہے کی شناخت کرلی گئی ہے۔ گروہ کی گرفتاری میں انٹرپول سے تعاون حاصل کیا گیا۔ دیگر 20 ملزمان کا پتہ لگالیا گیا ہے۔
اس کا باقاعدہ طور پر جب معلوم ہوا جب ایک ایشیائی ملک کی کمپنی کے وکیل نے ای کرائم پورٹل کے ذریعے دبئی پولیس سے شکایت کی کہ ایک بین الاقوامی گروہ کمپنی کے سی ای او کا ای میل ہیک کرنے میں کامیاب ہوگیا ہے۔