Tag: یاؤ جنگ

اسلام آباد: چین کے سفیر یاﺅ جِنگ نے نیول ہیڈ کوارٹرز میں پاک بحریہ کے سربراہ ایڈمرل ظفر محمود عباسی سے الوداعی ملاقات کی۔

ترجمان پاک بحریہ کے مطابق آج نیول ہیڈکوارٹرز میں چینی سفیر یاؤ جِنگ نے پاک بحریہ کے سربراہ سے ملاقات کی ہے، ملاقات کے دوران باہمی دل چسپی کے امور پر تبادلہ خیال کیا گیا۔

پاک بحریہ کے ترجمان کا کہنا تھا کہ اس ملاقات میں نیول چیف نے خطے کی بحری سیکورٹی میں پاک بحریہ کے کردار پر روشنی ڈالی، جب کہ چین کے سفیر نے خطے میں بحری سیکورٹی کے استحکام کے لیے پاک بحریہ کی کاوشوں کو سراہا۔

ترجمان کے مطابق سربراہ پاک بحریہ ظفر محمود عباسی نے پاک چین باہمی تعلقات میں یاﺅ جِنگ کی سفارتی خدمات کو سراہا۔

یاد رہے کہ جمعرات کو چینی سفیر یاؤ جِنگ نے وزارتِ خارجہ میں شاہ محمود قریشی سے بھی ملاقات کی تھی،جس میں سی پیک اور زراعت کے شعبوں میں دو طرفہ تعاون سمیت باہمی دل چسپی کے امور پر تبادلہ خیال کیا گیا تھا۔

چینی سفیر نے کہا تھا چین پاکستان میں عنقریب دو ’فٹ اینڈ ماؤتھ ڈیزیز سینٹر‘ (منہ اور کھر کی بیماری) قائم کرے گا۔

دوسری طرف وزیر خارجہ شاہ محمود نے پاکستان میں ٹڈی دل حملے کے بعد تعاون پر چینی قیادت کا شکریہ ادا کیا۔ انھوں نے کہا کہ ہم زراعت سے متعلقہ منصوبوں کی جلد تکمیل کے لیے پر عزم ہیں۔

اسلام آباد: وزیر خارجہ شاہ محمود قریشی نے مشکل وقت میں پاکستان کی مدد کرنے پر چین کا شکریہ ادا کیا۔

تفصیلات کے مطابق وزیر خارجہ شاہ محمود قریشی سے چینی سفیر یاؤ جنگ نے وزارت خارجہ میں ملاقات کی جس میں کرونا وبا سے پیدا ہونے والی صورت حال پر تبادلہ خیال کیا گیا۔

وزیر خارجہ نے کرونا چیلنج سے احسن انداز میں نمٹنے پر چینی حکومت،عوام کو مبارکباد دیتے ہوئے کہا کہ خوش آئند بات ہے آج چین میں زندگی معمول کی طرف لوٹ رہی ہے۔

شاہ محمود قریشی کا کہنا تھا کہ چینی ادارے اپنا کام کرتے نظر آ رہے ہیں ٹرانسپورٹ، کا پہیہ حرکت میں آ چکا، آج دنیا اس وبا سے نبرد آزما ہونے کے لیے چین کی پیروی کر رہی ہے۔

انہوں نے مشکل وقت میں پاکستان کی مدد کرنے پر چین کا شکریہ ادا کرتے ہوئے کہا کہ چین سےآلات، وباسے نمٹنے کے لیے پاکستان کی استعداد کارمیں اضافہ ہوگا،کرونا وائرس پر پاکستان چین کے تجربات سے استفادہ کر رہا ہے۔

دوسری جانب چینی سفیر یاؤ جنگ کا کہنا تھا کہ مشکل وقت میں چین پاکستان کے ساتھ شانہ بشانہ کھڑا ہے، چین وبائی چیلنج سے نمٹنے کے لیے پاکستان کی معاونت بدستور جاری رکھےگا۔