Tag: یمن

  • یمن میں بھارتی نرس کو سزائے موت کیوں دی جارہی ہے؟

    یمن میں بھارتی نرس کو سزائے موت کیوں دی جارہی ہے؟

    یمن میں بھارتی خاتون نرس کی قتل کے جرم میں سزائے موت کو برقرار رکھا گیا ہے۔

    بین الاقوامی خبر رساں ادارے کی رپورٹ کے مطابق بھارتی ریاست کیرالہ سے تعلق رکھنے والی نمیشا پریا کی سزائے موت کی منظوری یمنی صدر راشد العلیمی کی جانب سے دی گئی ہے۔

    بھارتی وزارتِ خارجہ نے یمن کے صدر کی طرف سے سزائے موت کی منظوری کے فوراً بعد آج اپنے بیان میں کہا ہے کہ نمیشا پریا کی ہر ممکن مدد کی کوشش کررہے ہیں۔

    بھارتی میڈیا کا اس حوالے سے کہنا ہے کہ 36 سالہ نمیشا پریا نے اپنے والدین کی کفالت اور مدد کے لیے 2008ء میں یمن کا رخ کیا تھا، جہاں انہوں نے کئی اسپتالوں میں کام کرنے کے بعد بالآخر اپنا کلینک کھول لیا۔

    2014ء میں اس حوالے سے ان کا طلال عبدو مہدی نامی شخص سے رابطہ ہوا کیونکہ یمن میں کاروبار شروع کرنے کے لیے مقامی لوگوں کے ساتھ شراکت داری لازی قرار دی گئی ہے۔

    بعدازاں ان دونوں کے درمیان تعلقات خراب ہونے لگے، نمیشا نے مہدی کے خلاف پولیس میں شکایت درج کروائی جس کی وجہ سے اُسے 2016ء میں حراست میں لے لیا گیا، رہائی کے بعد مقتول نے بھارتی نرس کو دھمکیاں دینا شروع کردیں۔

    بھارتی میڈیا کے مطابق خاتون نرس مبینہ طور پر اپنا ضبط پاسپورٹ واپس لینے کے لیے یمنی شہری کو نیند کا انجیکشن لگایا تھا تاہم زیادہ مقدار کے باعث وہ جان کی بازی ہار گیا۔

    بعد ازاں خاتون کو یمن سے فرار ہونے کی کوشش کے دوران حراست میں لے لیا گیا تھا، اور 2018ء میں اس پر قتل کا مقدمہ درج کرلیا گیا تھا۔

    بھارتی میڈیا کی رپورٹس کے مطابق صنعا میں ٹرائل کورٹ نے 2020ء میں بھارتی خاتون کو سزائے موت سنائی تھی جس کے بعد یمن کی سپریم جوڈیشل کونسل نے بھی نومبر 2023ء میں اس فیصلے کو برقرار رکھا تھا۔

    یوکرین اور روس کے درمیان مزید 300 قیدیوں کا تبادلہ

    واضح رہے کہ بھارتی ریاست کیرالہ کی رہائشی نمیشا پریا 19 سال کی عمر میں 2008ء میں اپنے گھر والوں کی کفالت کے لئے یمن گئی تھی۔

  • ڈبلیو ایچ او کے صدر کو اسرائیلی حملے میں کیسے بچایا گیا؟ سنسنی خیز ویڈیو سامنے آ گئی

    ڈبلیو ایچ او کے صدر کو اسرائیلی حملے میں کیسے بچایا گیا؟ سنسنی خیز ویڈیو سامنے آ گئی

    یمن میں اسرائیلی حملے کے وقت عالمی ادارہ صحت (ڈبلیو ایچ او) کے صدر کو بچا کر لے جانے کی سنسنی خیز ویڈیو سامنے آ گئی ہے۔

    ورلڈ ہیلتھ آرگنائزیشن کے صدر ٹیڈروس ایڈھانوم یمن کے صنعا ایئرپورٹ کے وی آئی پی لاؤنج میں موجود تھے، جب اسرائیل نے ایئرپورٹ پر میزائل حملہ کر دیا، افراتفری مچنے پر صنعا ایئرپورٹ پرٹیڈروس کو سیکورٹی اہلکار محفوظ مقام پر لے گئے۔

    اس موقع کی ایک سنسنی خیز ویڈیو سامنے آئی ہے جس میں ٹیڈروس کو نہایت سراسیمگی کی حالت میں محفوظ مقام پر لے جاتے دیکھا جا سکتا ہے، جمعرات کو صنعا ایئرپورٹ پر اسرائیلی فوج کے حملے میں کنٹرول ٹاور تباہ ہو گیا تھا اور طیاروں کو نقصان پہنچا تھا۔

    واقعے کے بعد عالمی ادارہ صحت کے سربراہ ٹیڈروس نے کہا کہ وہ اور ان کے اقوام متحدہ کے ساتھی یمن کے مرکزی ہوائی اڈے پر موت سے بال بال بچے، جب اسرائیلی فضائی حملوں نے اس عمارت کو نشانہ بنایا۔ بی بی سی سے بات کرتے ہوئے ٹیڈروس نے کہا کہ حملے کے سبب ایئرپورٹ پر انتہائی افراتفری مچ گئی تھی۔

    انھوں نے ہفتے کے روز ریڈیو 4 کے ٹوڈے پروگرام میں بتایا کہ ہر طرف بے چینی تھی اور لوگ بھاگ رہے تھے، میں اور میری ٹیم مکمل طور پر خطرے کے دہانے پر تھی، اور یہ قسمت کی بات ہے ورنہ اگر میزائل ذرا سا بھی ہٹ جاتا تو یہ ہمارے سروں پر پڑ سکتا تھا۔

    واضح رہے کہ ٹیڈروس یمنی دارالحکومت صنعا میں ایک پرواز میں سوار ہونے کا انتظار کر رہے تھے جب اسرائیلی میزائل نے ایئرپورٹ کو نشانہ بنایا، اس حملے میں اقوام متحدہ کے طیارے کے عملے میں سے ایک شخص زخمی ہوا، جب کہ ہوائی اڈے پر کم از کم 3 دیگر افراد کی ہلاکت کی اطلاع ہے۔

    اسرائیلی فوج نے اپنے مؤقف میں کہا ہے کہ حملے کا مقصد یمن کے حوثی باغیوں اور ایران کے زیر استعمال انفراسٹرکچر کو تباہ کرنا تھا، اور اسے اس بات کا علم نہیں تھا کہ حملے کے وقت اقوام متحدہ کا وفد صنعا کے ہوائی اڈے پر موجود ہے، تاہم اس مؤقف پر یقین کرنا مشکل ہے۔

  • یمن سے تل ابیب پر بڑا میزائل حملہ

    یمن سے تل ابیب پر بڑا میزائل حملہ

    ایرانی حمایت یافتہ یمنی حوثیوں کی جانب سے اسرائیل پر میزائل حملہ کیا گیا ہے، جس کے باعث 14 افراد کے زخمی ہونے کی اطلاعات ہیں۔

    عرب میڈیا کی رپورٹس کے مطابق اسرائیلی فوج کا کہنا ہے کہ یمن سے داغا گیا میزائل تل ابیب میں گرا ہے، جس کے نتیجے میں متعدد افراد زخمی ہوئے ہیں۔

    اسرائیلی فوج کے ترجمان کے مطابق اسرائیل کا فضائی دفاعی نظام یمن سے داغے گئے میزائل کو روکنے میں ناکام رہا۔

    یمنی حوثیوں کے سربراہ کا کہنا ہے کہ امریکا، اسرائیل اور برطانیہ کے ساتھ حالت جنگ میں ہیں، ظلم کے خلاف جدوجہد جاری رکھیں گے۔

    واضح رہے کہ گزشتہ روز یمن میں حوثیوں کو دھمکی دیتے ہوئے اسرائیلی وزیر اعظم بن یامین نیتن یاہو نے اعلان کیا تھا کہ جو کوئی بھی اسرائیل کو نقصان پہنچائے گا اسے اس کی بھاری قیمت چکانی پڑے گی۔

    اسرائیلی وزیر اعظم کا کہنا تھا کہ امریکہ اور بہت سے دوسرے ممالک یمن پر اسرائیل کے حملوں کو اچھی طرح سمجھتے ہیں۔

    ’داعش اور کرد دہشتگردوں کے خاتمے کا وقت آگیا‘

    یمن میں ایرانی حمایت یافتہ حوثیوں کا کہنا تھا کہ اسرائیلی شہر جافہ میں دو فوجی اہداف کو ”فلسطین 2”قسم کے بیلسٹک میزائلوں سے نشانہ بنایا گیا ہے۔

  • یمن نے اسرائیل پر ہائپرسونک میزائل داغ دیا

    یمن نے اسرائیل پر ہائپرسونک میزائل داغ دیا

    اسرائیل نے اپنی وحشیانہ کارروائیوں اور جنگی جنون کی وجہ سے پورے خطے کو آگ اور گولہ بارود کا ڈھیر بنا دیا ہے، ایسے میں یمن کے حوثیوں نے بھی ہائپر سونک میزائل سے اسرائیل پر حملہ کر دیا ہے۔

    الجزیرہ کے مطابق یمن کے حوثیوں نے اسرائیل پر ہائپرسونک میزائل حملے کا دعویٰ کیا ہے، اسرائیلی فوج کا کہنا ہے کہ ’فلسطین 2‘ نامی میزائل نے تل ابیب میں سائرن کو متحرک کر دیا تھا، جسے فضا ہی میں تباہ کر دیا گیا۔

    یمن سے وسطی اسرائیل پر بیسلٹک میزائل حملے سے تل ابیب سائرن سے گونج اٹھا، حملے کے نتیجے میں بن گورین ہوائی اڈے کی پروازیں معطل کر دی گئیں۔

    یمن کے حوثی گروپ نے ایک بیان میں اس عزم کا اظہار کیا کہ جب تک اسرائیلی فوج غزہ پر اپنی جنگ ختم نہیں کر دیتی اس وقت تک اس کے خلاف فوجی کارروائیاں جاری رہیں گی، حوثی فوج کے ترجمان یحییٰ ساری نے ٹی وی پر نشر ہونے والے ایک خطاب میں کہا کہ پیر کو یہ کارروائی ایک ہائپر سونک بیلسٹک میزائل ’Palestine 2‘ کا استعمال کرتے ہوئے کی گئی۔

    آئرلینڈ اور اسرائیل میں کشیدہ تعلقات مزید تناؤ کا شکار ہو گئے

    حوثیوں نے کہا کہ یہ حملہ اسرائیل کی طرف سے محصور غزہ کی پٹی میں فلسطینیوں کے ’قتل عام‘ کے جواب میں کیا گیا ہے، غزہ میں اسرائیل ایک سال سے زائد عرصے سے بمباری کر رہا ہے، جس میں 45,000 سے زائد فلسطینی شہید ہو چکے ہیں۔

    اسرائیلی فوج نے بیان میں کہا کہ یمن کی سرزمین سے داغے گئے ایک میزائل کو اسرائیل میں داخل ہونے سے پہلے ہی تباہ کر دیا گیا، تاہم تل ابیب میں الرٹ اس لیے جاری کیا گیا تاکہ لوگ فضا میں تباہ کیے گئے میزائل کے ٹکڑوں سے محفوظ رہیں۔

  • یمن میں امریکا کی حوثیوں کی تنصیبات پر بمباری

    یمن میں امریکا کی حوثیوں کی تنصیبات پر بمباری

    یمن میں امریکا کی جانب سے حوثیوں کی تنصیبات پر بمباری کی گئی ہے، امریکی سنٹرل کمانڈ آفس ‘سینٹ کوم’ نے حملوں کی تصاویر بھی جاری کردی ہیں۔

    بین الاقوامی خبر رساں ادارے کی رپورٹ کے مطابق سینٹ کوم نے 9 اور 10 نومبر کو یمن میں حوثیوں پر کیے گئے فضائی حملوں کی تصاویر شیئر کی ہیں۔

    امریکی سنٹرل کمانڈ آفس ‘سینٹ کوم’ کے بیان میں کہا گیا ہے کہ حوثیوں کی تنصیبات اور اسلحہ سسٹموں کو فضائی حملوں سے نشانہ بنایا ہے۔

    جاری کی گئی تصاویر میں حوثیوں کی ایک موبائل میزائل لانچر گاڑی کو فضائی حملے میں تباہ ہوتے ہوئے دیکھا جاسکتا ہے۔

    اسرائیل کی غزہ پر بمباری کے ردعمل میں یمن کے حوثی 31 اکتوبر 2023 سے یمنی ساحل کے قریب اسرائیلی کمپنیوں سے منسلک تجارتی بحری جہازوں کو قبضے میں لے رہے اور امریکی فوجی اہداف پر حملے کر رہے ہیں۔

    واضح رہے کہ گزشتہ روز یمنی حوثیوں کا یہ اعلان سامنے آیا تھا کہ بحیرہ احمر اور بحیرہ عمان میں امریکہ سے تعلق رکھنے والے دو ڈسٹرائروں اور ایک طیارہ بردار بحری جہاز کو نشانہ بنایا ہے۔

    رپورٹ کے مطابق حوثیوں کے فوجی ترجمان یحییٰ سیری نے دعویٰ کیا کہ حوثیوں نے بحیرہ احمر اور بحیرہ عمان میں دو حملے کیے جو 8 گھنٹے تک جاری رہے۔

    یمنی حوثیوں کے فوجی ترجمان یحییٰ سیری نے دعویٰ کیا کہ ہم نے یہ حملہ ایسے وقت میں کیا جب امریکہ یمن پر حملے کی تیاری میں مصروف تھا جبکہ دوسرے حملے میں بحیرہ احمر میں دو امریکی ڈسٹرائر کو نشانہ بنایا گیا۔

    اُنہوں نے وضاحت کی کہ اسرائیل کے خلاف حوثیوں کے حملوں کو اُس وقت تک جاری رکھا جائے گا جب تک کہ غزہ کی پٹی کا محاصرہ ختم نہیں ہوتا اور غزہ اور لبنان میں حملے بند نہیں ہو جاتے۔

    اسرائیل کا گزشتہ ایک ہفتے میں حزب اللہ کے 200 جنگجو مارنے کا دعویٰ

    حوثیوں سے وابستہ وزارت دفاع کے روحانی رہنمائی شعبے کے ڈپٹی ڈائریکٹر عبداللہ بن عامر کا اس حوالے سے کہنا تھا کہ امریکی افواج کے خلاف ایک احتیاطی فوجی کاروائی کی گئی ہے۔

  • یمن میں فوجی کیمپ پر حملے میں سعودی عرب کے 2 فوجی شہید

    یمن میں فوجی کیمپ پر حملے میں سعودی عرب کے 2 فوجی شہید

    صنعا: یمن کی جلاوطن حکومت کے ایک فوجی کی فائرنگ سے کیمپ میں 2 سعودی فوجی شہید اور ایک زخمی ہو گیا۔

    سعودی میڈیا کے مطابق جمعہ کے روز مشرقی یمن کے صوبے حضرموت کے شہر سیئون میں ایک فوجی کیمپ پر حملے میں دو سعودی فوجی شہید اور ایک زخمی ہوا۔

    جلاوطن حکومت کے فوجی نے مشق کے دوران سعودی فوجیوں پر گولی چلائی تھی، اس واقعے کو یمن کی ایک عشرے سے جاری جنگ کے دوران غیر معمولی اندرونی حملہ قرار دیا جا رہا ہے۔ جاں بحق فوجیوں میں سعودی فوج کا ایک افسر اور ایک نان کمیشنڈ افسر شامل ہیں، جب کہ حملہ آور کا تعلق یمن کی وزارت دفاع سے تھا۔

    سعودی عرب اور یمن کے حوثی باغیوں کے درمیان برسوں سے جنگ بندی پر عمل درآمد کیا جا رہا ہے، اگرچہ اس دوران حوثی جنگجوؤں نے بحیرہ احمر کی راہداری میں بحری جہازوں کی نقل و حمل کے خلاف حملے بھی شروع کر دیے ہیں۔ حوثیوں نے اس حملے کی ذمہ داری قبول نہیں کی ہے۔

    کیا قطر نے حماس کو بے دخل کرنے کا فیصلہ کر لیا ہے؟

    سرکاری سعودی پریس ایجنسی نے ایک فوجی بیان کا حوالہ دیتے ہوئے کہا کہ جب فوجی وہاں سعودی زیر قیادت ایک اڈے پر کام کر رہے تھے، جلاوطن حکومت کے فوجی نے فائرنگ کر دی۔

    دریں اثنا، امریکی جنگی طیاروں نے حوثیوں کے ٹھکانوں کو نشانہ بناتے ہوئے نئے حملے کیے ہیں، یہ حملے اتوار کی صبح تک جاری رہے، امریکی فوج نے کہا کہ یہ حملے حوثیوں کی جانب سے امریکی جاسوس ڈرون مار گرائے جانے کے بعد کیے گئے۔

    سعودی بیان کے مطابق جوائنٹ فورسز کمانڈ نے کہا کہ یہ ایک ’اکیلے فوجی‘ کا بزدلانہ حملہ تھا، اور یہ یمنی وزارت دفاع کے معزز اراکین کی نمائندگی نہیں کرتا۔ واضح رہے کہ فائرنگ کے بعد فرسٹ ملٹری ریجن سے تعلق رکھنے والا یمنی فوجی فرار ہو گیا تھا، علاقے کی پولیس نے حملہ آور فوجی کی تصاویر جاری کرتے ہوئے اعلان کیا ہے کہ اس کے بارے میں اطلاع دینے پر 30 ملین یمنی ریال (15,000 ڈالر) کا انعام دیا جائے گا۔

  • امریکی B-2 بمبار طیاروں نے یمن میں حوثی باغیوں کے اسلحے کے زیر زمین ذخیروں پر بمباری کر دی

    امریکی B-2 بمبار طیاروں نے یمن میں حوثی باغیوں کے اسلحے کے زیر زمین ذخیروں پر بمباری کر دی

    واشنگٹن: امریکی ڈیفنس سیکریٹری لائیڈ آسٹن نے کہا ہے کہ امریکی B-2 بمبار طیاروں نے یمن میں حوثی باغیوں کے اسلحے کے زیر زمین ذخیروں پر بمباری کی ہے۔

    غیر ملکی میڈیا رپورٹس کے مطابق امریکی دفاعی سربراہ نے بدھ کو کہا ہے کہ امریکی فوج نے یمن میں ایران سے منسلک حوثی گروپ کے زیر کنٹرول علاقوں میں متعدد اہداف پر بالکل ٹھیک ٹھیک بمباری کی ہے۔

    امریکی فضائیہ کے B-2 اسٹیلتھ بمبار طیاروں نے زیر زمین ہتھیاروں کے ذخیرہ کرنے والے 5 مقامات کو ’’بالکل ٹھیک‘‘ نشانہ بنایا، جس کا استعمال حوثیوں نے علاقے میں سویلین اور فوجی بحری جہازوں کو نشانہ بنانے کے لیے کیا تھا۔

    لائیڈ آسٹن کے مطابق دشمن حوثیوں نے ان ذخیروں کو زمین کے اندر گہرائی میں دفن کر رکھا تھا اور وہ اسے ہماری پہنچ سے دور رکھنا چاہتے تھے لیکن امریکا نے انوکھی صلاحیت کا مظاہرہ کرتے ہوئے ان مقامات کو نشانہ بنایا۔

    انھوں نے کہا کہ امریکی فضائیہ کے B-2 اسپرٹ لانگ رینج کے اسٹیلتھ بمبار طیاروں کے استعمال سے عالمی سطح پر امریکی حملوں کی صلاحیت کا مظاہرہ ہوتا ہے۔ دوسری طرف حوثیوں کے المسیرہ ٹی وی سیٹلائٹ نیوز چینل نے یمن کے دارالحکومت صنعا کے ارد گرد ہوائی حملوں کی اطلاع دی ہے، تاہم مزید تفصیلات فراہم نہیں کی گئیں۔

    اسرائیل کو ہتھیاروں کی پابندی کی دھمکی، بائیڈن انتظامیہ کے اہلکار نے بھانڈا پھوڑ دیا

    واضح رہے کہ نومبر کے بعد سے حوثیوں نے بحیرہ احمر، خلیج عدن اور آبنائے باب المندب میں اسرائیل سے منسلک بحری جہازوں پر متعدد حملے کیے ہیں۔ گزشتہ ماہ حوثیوں نے اسرائیل کے شہروں تل ابیب اور عسقلان کے ساتھ ساتھ امریکی بحریہ کے تین جنگی جہازوں پر میزائلوں اور ڈرونز سے حملے کرنے کا دعویٰ بھی کیا تھا۔

  • یمن سے فائر کیا گیا میزائل مار گرایا، اسرائیلی فوج کا دعویٰ

    یمن سے فائر کیا گیا میزائل مار گرایا، اسرائیلی فوج کا دعویٰ

    یروشلم: اسرائیلی فوج نے دعویٰ کیا ہے کہ اس نے یمن سے فائر کیا گیا میزائل مار گرایا ہے جو وسطی اسرائیل کی جانب داغا گیا تھا۔

    یمن سے زمین سے زمین تک مار کرنے والا میزائل اسرائیل کے وسطی علاقے کی طرف فائر کیا گیا تھا جسے فضا میں ہی ناکارہ بنادیا گیا، جیسے ہی فضا میں میزائل فائر ہونے کے باعث الارم بجے اسرائیلی شہری پناہ لینے کے لیے دوڑ پڑے۔

    اسرائیلی فضائیہ نے اپنے بیان میں کہا کہ وسطی اسرائیل کے متعدد علاقوں میں بجنے والے سائرن کے بعد، یمن سے داغے گئے زمین سے زمین پر مار کرنے والے میزائل کو کامیابی سے مار گرایا گیا ہے۔

    بیان میں یہ نہیں بتایا گیا کہ میزائل کس نے داغا یا یہ اسرائیل مخالف کسی عسکری گروپ کی طرف سے فائر کیا گیا ہے۔

    خیال رہے کہ ایران کی حمایت یافتہ حوثی تنظیم جو کہ شمالی یمن کو کنٹرول کرتی ہے، پچھلے سال کے دوران اکثر اسرائیل پر حملے کرتی رہی ہے، حوثی تنظیم کہنا ہے کہ وہ فلسطینیوں کے ساتھ اظہار یکجہتی کے لیے ایسا کرتی ہے۔

  • امریکی فوج نے یمن میں حوثی باغیوں کے 15 ٹھکانوں پر بم برسائے، ویڈیو رپورٹ

    امریکی فوج نے یمن میں حوثی باغیوں کے 15 ٹھکانوں پر بم برسائے، ویڈیو رپورٹ

    امریکی فوج نے یمن میں حوثی باغیوں کے 15 ٹھکانوں پر بم برسائے ہیں۔

    غیر ملکی میڈیا رپورٹس کے مطابق امریکی فوج کا کہنا ہے کہ اس نے یمن میں ایرانی حمایت یافتہ حوثی گروپ پر حملے کیے ہیں، جس میں 15 اہداف کو نشانہ بنایا گیا۔

    پینٹاگون نے کہا کہ اس نے اپنی ’’بحریہ کی آزادی کے تحفظ‘‘ کے لیے حملوں میں ہوائی اور بحری جنگی جہازوں کا استعمال کیا۔ فضائی حملوں نے دارالحکومت صنعا سمیت یمن کے بعض اہم شہروں کو ہلا کر رکھ دیا۔

    نومبر سے لے کر اب تک حوثی باغیوں نے بحیرہ احمر میں 100 کے قریب بحری جہازوں پر حملے کیے ہیں، جس میں دو کشتیاں تباہ ہوئیں، حوثیوں کا کہنا تھا کہ یہ حملے غزہ میں اسرائیل کی فوجی مہم کا بدلہ ہیں۔

    برطانیہ کی یمن پر حملوں میں ملوث ہونے کی تردید

    بی بی سی کے مطابق مشرق وسطیٰ میں امریکی فوجی کارروائیوں کی نگرانی کرنے والی سینٹرل کمانڈ نے کہا کہ حملوں میں حوثیوں کے ہتھیاروں کے نظام، اڈوں اور دیگر آلات کو نشانہ بنایا گیا ہے۔

    پیر کو حوثیوں نے کہا تھا کہ انھوں نے یمن میں امریکی ساختہ MQ-9 ریپر ڈرون مار گرایا ہے، جب کہ امریکی فوج نے بھی بغیر پائلٹ کے طیارے کو کھونے کا اعتراف کیا۔ پچھلے ہفتے پینٹاگون نے کہا تھا کہ حوثیوں نے خطے میں امریکی بحریہ کے جہازوں پر ’ایک پیچیدہ حملہ‘ کیا ہے، تاہم حملے کو ناکام بنا دیا گیا تھا۔

    واضح رہے کہ حوثیوں کے حملوں سے بحیرہ احمر کی شپنگ لین کی حفاظت کے لیے رواں برس امریکا، برطانیہ اور 12 دیگر ممالک نے ’آپریشن خوشحالی گارڈین‘ کا آغاز کیا ہے۔

  • یمن کے شہر عدن میں زوردار دھماکہ، متعدد ہلاک

    یمن کے شہر عدن میں زوردار دھماکہ، متعدد ہلاک

    یمن کے شہر عدن میں زوردار دھماکہ ہوا ہے، جس کے باعث متعدد افراد کی ہلاکتوں کی اطلاعات سامنے آرہی ہیں۔

    بین الاقوامی خبر رساں ادارے کی رپورٹ کے مطابق عدن کے المنصورہ ضلع میں معروف اسٹریٹ پر واقع گیس اسٹیشن میں نامعلوم وجوہات کی بنا پر زوردار دھماکہ ہوا ہے۔

    رپورٹس کے مطابق بڑی گاڑیوں اور پیدل چلنے والوں کی آمدورفت والے رہائشی علاقے میں ہونے والے دھماکے میں متعدد افراد ہلاک اور زخمی ہوئے ہیں، تاہم درست تعداد سامنے نہیں آسکی ہے۔

    اس سے قبل یمن میں 8 مقامات پر حوثیوں کے 18 ٹھکانوں کو امریکا اور برطانیہ کی جانب سے فضائی حملوں کا نشانہ بنایا گیا تھا۔

    سوڈان: شدید بارشوں سے سیلابی صورتحال، 173 سے زائد ہلاک

    ترجمان ایرانی وزارت خارجہ نے اس پر رد عمل دیتے ہوئے کہا تھا کہ امریکا اور برطانیہ نے ایک بار پھر ثابت کر دیا ہے کہ وہ جنگی جرائم اور نسل کشی کرنے والے اسرائیل کے حمایتی ہیں۔