لاہور: صوبہ پنجاب کے شہر راولپنڈی میں ینگ ڈاکٹرز کی ہڑتال نے 10 سالہ بچی کو موت کے دہانے پر پہنچا دیا۔ پتنگ بازی کے دوران ہوائی فائرنگ سے زخمی ہونے والی بچی اسپتال کے باہر مسیحاؤں کی مسیحائی کی منتظر ہے۔

تفصیلات کے مطابق راولپنڈی کی رہائشی 10 سالہ زویا گلی میں کھیلتے ہوئے اس وقت شدید زخمی ہوگئی جب ہوا میں فائر کی گئی گولی نے اسے اپنا نشانہ بنا لیا۔ ہوائی فائرنگ شہر میں پتنگ بازی کے دوران کی گئی تھی۔

بچی کے اہلخانہ اسے لاہور سروسز اسپتال لے کر آئے جہاں ہڑتالی ینگ ڈاکٹرز نے اس کا علاج کرنے سے انکار کردیا۔ ڈاکٹرز کا کہنا تھا کہ آپریشن تھیٹر بند ہے، ہاتھ سے گولی نہیں نکال سکتے۔

بچی کی نانی اور والدہ اسپتال کے باہر دہائی دیتی رہیں مگر کوئی ان کی شنوائی کو نہ آیا۔

واضح رہے کہ صوبائی حکومت کے بلند و بانگ دعووں کے باوجود پنجاب کے اسپتالوں میں مریضوں سے غفلت برتے جانے یا انہیں سہولیات کی عدم فراہمی کے واقعات عام ہیں۔

چند روز قبل قصور کی رہائشی، دل کی مریضہ 60 سالہ زہرہ بی بی جناح اسپتال کی راہداری میں ٹھنڈے فرش پر علاج کے باعث دم توڑ گئی تھی۔

زہرہ بی بی کو اسپتال میں بیڈ نہ ہونے کے سبب فرش پر لٹا کر ڈرپ لگا دی گئی۔ سردی لگنے کے باعث مریضہ کی حالت بگڑ گئی اور 10 گھنٹے بعد وہ دم توڑ گئی۔

واقعے پر تحقیقاتی کمیٹی بنائی گئی جس نے ملوث افراد کو کلین چٹ دے دی، تاہم بعد ازاں اے آر وائی نیوز پر خبر نشر ہونے کے بعد اسپتال کے ایم ایس اور ڈاکٹرز کو معطل کردیا گیا تھا۔

لاہور: پنجاب میں ینگ ڈاکٹرز کی ہڑتال دوسرے روز بھی جاری ہے۔ سروسز اسپتال کے ہڑتالی ڈاکٹروں کی مبینہ غفلت نے اپنے ہی اسپتال ملازم کی جان لے لی۔

تفصیلات کے مطابق ینگ ڈاکٹرز کی ہڑتال دوسرے روز بھی جاری ہے۔ سروسز اسپتال کے ینگ ڈاکٹرز کی مبینہ غفلت کے باعث اسپتال کا 50 سالہ ٹیکنیشن محمد حسین جاں بحق ہوگیا۔

محمد حسین 4 روز سے شدید بخار میں مبتلا تھا اور سروسز اسپتال میں اس کا علاج جاری تھا۔ لواحقین نے الزام لگایا کہ ڈاکٹرز نے ان کے مریض کو لاعلاج قرار دے کر اس کے حال پر چھوڑ دیا۔

ان کا کہنا تھا کہ ہمارا مریض مر رہا تھا اور ڈاکٹر فلم دیکھ رہی تھی۔ واقعہ کے بعد ورثا نے لاش جیل روڈ پر رکھ سڑک بلاک کردی۔ ایک گھنٹہ تک احتجاج کے بعد لواحقین لاش گھر لے گئے۔

یاد رہے کہ چند روز قبل اینٹی کرپشن اہلکاروں نے وائی ڈی اے کے سینئر نائب صدر ڈاکٹر عاطف کے خلاف 35 لاکھ روپے کی خرد برد کے الزام پر گرفتاری کے لیے سروسز اسپتال میں چھاپہ مارا تھا۔

وائی ڈی اے نے ڈاکٹروں کی گرفتاری اور مبینہ تشدد کے خلاف احتجاج کرتے ہوئے ہڑتال کر دی تھی۔ سروسز، گنگا رام اور جنرل اسپتال سمیت صوبے بھر کے اسپتالوں میں او پی ڈیز بند کر دیں گئی تھیں جس کے بعد مریضوں کو شدید مشکلات کا سامنا ہے۔