نیس: یوروکپ دوہزار سولہ میں اٹلی نے اسپین جبکہ آئس لینڈ نے انگلینڈ کو شکست دے کر کوارٹر فائنل کے لیے کوالیفائی کرلیا.
تفصیلات کے مطابق فرانس میں جاری یوروکپ 2016 کے ناک آوٹ مرحلے میں دفاعی چیمپیئن اسپین ٹورنامنٹ سے باہر ہو گیا ہے.
یورو کپ کے ناک آؤٹ مرحلے میں پیر کو کھیلے جانے والے دوسرے میچ میں آئس لینڈ نے انگلینڈ کو ایک کے مقابلے میں دو گول سے شکست دے دی،آئس لینڈ کے ہاتھوں شرمناک شکست پر انگلینڈ کے مینیجر رائے ہوڈسن مستعفی ہو گئے ہیں.
اس سے پہلے کسی بڑے ٹورنامنٹ میں انگینڈ کو 1950 کے ورلڈ کپ کے ناک آؤٹ مرحلے میں امریکہ کے ہاتھوں شکست کا سامنا کرنا پڑا تھا.
دوسری جانب اٹلی نے عمدہ کھیل کا مظاہرہ کرتے ہوئے میچ میں اسپین کو صفر کے مقابلے میں دو گول سے شکست دے دی.
میچ میں اٹلی کی بہتر حکمت عملی اور پرُجوش کھیل کی وجہ سے اسپین کو ایک گول کرنے کا بھی موقع نہیں دیا اور یوں دفاعی چیمپیئن اسپین کا سفر ناک آوٹ مرحلے میں تمام ہوگیا.
اٹلی کے جانب سے گول کرنے والے جارجیو گیلینی نے کہا’ہم اس جیت کے حق دار تھے، سپین کی کئی برسوں سے حکمرانی کا ہم کسی حد تک بدلہ لے سکے ہیں، یہ صرف آغاز ہے اور ہم اپنی فتح سے لطف اندوز ہوں گے، لیکن اختتام تک جانے لے لیے ابھی طویل سفر باقی ہے اور بہترین ابھی آنے والا ہے۔‘
یاد رہے کہ اسپین 2006 کے ورلڈ کپ کے بعد پہلی بار کسی بڑے ٹورنامنٹ کے ناک آوٹ مرحلے میں باہر ہوا ہے.
واضح رہے کہ یوروکپ2016 میں اٹلی کا کوارٹر فائنل میں جرمنی سے جبکہ آئس لینڈ کا فرانس سے مقابلہ ہوگا.
