جنیوا : یورپی وزرائے خارجہ کا کہنا ہے کہ ایران جوہری مذاکرات کے لیے تیار ہے، ہمیں تنازع کےعلاقائی پھیلاؤ سے ہرصورت بچنا ہوگا۔
غیر ملکی خبر رساں ادارے کی رپورٹ کے مطابق یورپی وزرائے خارجہ نے ایرانی وزیر خارجہ سے ملاقات کے بعد میڈیا سے گفتگو کی۔
فرانسیسی وزیر خارجہ ژاں نوئل بارو کا کہنا تھا کہ سفارتی اقدام سے مذاکرات کا دروازہ کھلنا چاہیے، امید ہے ایرانی امریکی فریق کے ساتھ بات چیت کا راستہ کھولیں گے۔
انہوں نے کہا کہ ایرانی وزیر خارجہ عباس عراقچی جوہری مسئلے و دیگر مسائل پر بات چیت جاری رکھنے کیلئے تیار ہیں۔
فرانسیسی وزیر خارجہ نے کہا کہ جنیوا میں سفارتی اقدام کو مذاکرات کی راہ ہموار کرنی چاہیے، فوجی کارروائیوں سے ایران کے جوہری پروگرام میں صرف تاخیر ہوگی۔
ژاں نوئل بارو نے بتایا کہ ایران مذاکرات کے لیے تیار ہے، ایرانی وزیر خارجہ نے تمام معاملات پر گفتگو جاری رکھنے کا کہا ہے، امید ہے ایران امریکا سے بھی مذاکرات کے لیے آمادہ ہوگا۔ موجودہ بحران مشرق وسطیٰ اور یورپ دونوں کیلئے خطرناک ہوسکتا ہے۔
اس موقع پر برطانوی وزیرخارجہ ڈیوڈ لیمی نے کہا کہ ایران کے ساتھ جاری بات چیت جاری رکھنے کے خواہشمند ہیں، ایران کے ساتھ مذاکرات کی کھڑکی کھلی رکھنا ضروری ہے۔
ایران اسرائیل جنگ سے متعلق تازہ ترین خبریں
ڈیوڈ لیمی کا کہنا تھا کہ یہ خطرناک لمحہ ہے ہم نے مذاکرات جاری رکھنے پراتفاق کیا ہے، ہمیں تنازع کے علاقائی پھیلاؤ سے ہرصورت بچنا ہوگا، یورپی رہنماؤں کا مؤقف واضح ہے کہ ایران کو ایٹمی ہتھیار حاصل نہیں کرنے دینگے۔
