لندن: برطانوی پارلیمنٹ کے بعد ہاؤس آف لارڈز نے بھی برطانوی وزیراعظم بورس جانسن کی بریگزٹ ڈیل منظور کر لی۔
تفصیلات کے مطابق برطانوی پارلیمنٹ کے بعد ہاؤس آف لارڈز نے بھی برطانوی وزیراعظم بورس جانسن کے حق میں فیصلہ سنا دیا جس کے بعد 31 جنوری 2020 کو برطانیہ یورپی یونین سے علیحدہ ہوجائے گا۔
بریگزٹ ڈیل چند دن میں منظوری کے لیے ملکہ برطانیہ کے پاس جائے گی، ملکہ کی منظوری کے بعد بل قانون کا درجہ حاصل کر لے گا۔ یورپی پارلیمنٹ 29 جنوری کو بریگزٹ بل منظوری کے لیے ووٹنگ کرے گی اور برطانیہ 31 جنوری کو یورپ سے نکل جائے گا۔
خیال رہے کہ گزشتہ ماہ بریگزٹ بل کے حوالے سے برطانوی پارلیمنٹ میں کی جانے والی ووٹنگ میں بورس جانسن کی حمایت میں 358 اور مخالفت میں 234 ووٹ ڈالے گئے تھے۔
بریگزٹ بل کے حوالے سے کی جانے والی ووٹنگ میں کامیابی کے بعد وزیراعظم بورس جانسن کا کہنا تھا کہ اب وقت آگیا ہے کہ اپنے ملک کو دوبارہ متحد کریں۔
برطانیہ میں پارلیمانی انتخابات، کنزرویٹو پارٹی نے میدان مار لیا
یاد رہے کہ 13 دسمبر کو برطانیہ کے پارلیمانی انتخابات میں کنزرویٹو پارٹی نے واضح اکثریت کے ساتھ میدان مارا تھا، جب کہ اپوزیشن لیڈر جیرمی کوربن نے اپنی شکست تسلیم کرتے ہوئے نتائج کو پارٹی کے لیے مایوس کن قرار دیا تھا۔
کنزرویٹو پارٹی 650 میں سے 365 نشستوں کے ساتھ پہلے نمبر پر رہی جب کہ لیبر پارٹی 203 نشستوں کے ساتھ دوسرے نمبر پر رہی۔
