اسلام آباد: ملک بھر کے بیشتر شہروں میں کرونا وائرس کیسز کی شرح صفر ریکارڈ کی گئی ہے، ملک میں کرونا وائرس سے صحت یابی کی شرح 98 فیصد ہے۔
تفصیلات کے مطابق ملک کے 25 بڑے اضلاع میں سے 19 میں کرونا وائرس کیسز کی شرح صفر ریکارڈ کی گئی ہے۔
ذرائع کا کہنا ہے کہ کرونا کیسز کی بلند ترین 2.20 فیصد یومیہ شرح کراچی میں ریکارڈ کی گئی۔
وفاقی دارالحکومت اسلام آباد میں کرونا کیسز کی یومیہ شرح 1.74 فیصد، لاہور میں 1.86 فیصد، پشاور میں 1.27 فیصد، بہاولپور میں 0.67 اور فیصل آباد میں 0.38 فیصد ریکارڈ کی گئی۔
وزارت صحت کا کہنا ہے کہ ملک بھر میں کرونا وائرس کے فعال کیسز کی تعداد 769 ہے، ملک میں کرونا وائرس سے صحت یابی کی شرح 98 فیصد ہے۔
ملک میں کرونا کے 711 مریض قرنطینہ میں ہیں، جبکہ 58 مریض اسپتالوں میں زیر علاج ہیں۔
ملک بھر کے اسپتالوں میں کرونا وائرس کے 5 مریض وینٹی لیٹر پر بھی ہیں۔
