کراچی : ایم کیو ایم کے رہنماء ڈاکٹر فاروق ستار نے کہا ہے کہ کراچی کا سب سے بڑا مینڈیٹ ہونے کے باوجود ہماری سیاسی آزادی پر پابندی عائد کردی گئی ہے۔
تفصیلات کے مطابق ڈاکٹر فاروق ستار کے گھر پر چھاپے کے خلاف ایم کیو ایم کی جانب سے کراچی پریس کلب پر احتجاجی مظاہرہ کیا گیا، جس میں ایم کیو ایم رہنماؤں سمیت خواتین اور کارکنان کی بڑی تعداد نے شرکت کی۔
اس موقع پر ڈاکٹر فاروق ستار نے میڈیا سے گفتگو کرتے ہوئے کہا کہ ’’میرے گھر پر چھاپہ غیر آئینی اور غیر قانونی تھا، اس محاصرے کے ذریعے لوگوں کو خوفزدہ کرنے کی کوشش کی گئی۔
انہوں نے کہا کہ ہمارا میڈٰا ٹرائل کر کے یہ تاثر دیا جارہا ہے کہ ایک طبقہ جرائم میں ملوث ہیں، لوگوں نے ہماری احتجاج کی کال پر ازخود کاروبار بند رکھ کر اپنے مینڈیٹ کا اعلان کردیا۔
رہنماء ایم کیو ایم نے مزید کہا اداروں کا کام کاروبار کھلوانا نہیں ہے، احتجاج جمہوریت کا حسن ہے اور عوام و سیاسی جماعتوں کو اس کا پورا حق حاصل ہے، انہوں نے کہا کہ ہمارے کارکنان کو گرفتار کر کے لاپتہ کرنے اور دورانِ حراست تشدد سے قتل کرنے والوں کے خلاف کبھی کوئی کارروائی عمل میں نہیں لائی گئی۔
رجسٹرڈ جماعت ہونے کے باجود ایم کیو ایم کو زکوۃ فطرہ جمع کرنے پر غیر اعلانیہ پابندی لگا دی گئی ہے، جبکہ جن جماعتوں کے لیڈران کے گھروں سے القاعدہ اور طالبان کے کمانڈر پکڑے گئے ہیں ان کو زکوۃ فطرہ جمع کرنے کی مکمل آزادی ہے۔
انہوں نے مزید کہا کہ ’’ آرمی چیف آف اسٹاف جنرل راحیل شریف ، کورکمانڈر کراچی نوید مختار اور ڈی جی رینجرز میجر جنرل بلال اکبر سے ملاقات کر کے پیدا ہونے والی غلط فہمیوں کو دور کریں۔
واضح رہے ایم کیو ایم کی جانب سے ڈاکٹر فاروق ستار کے گھر پر چھاپے کے خلاف آج احتجاج کا اعلان کیا گیا تھا۔
