اسلام آباد / کراچی/ لاہور / سیالکوٹ/ دادو : ملک بھر میں جمعۃ الوداع یوم القدس مذہبی جوش وجذبےسےمنایا گیا، رمضان المبارک کے جمعۃ الوداع کے موقع پر ملک بھر میں یوم القدس ریلیاں نکالی گئیں، فلسطینی مسلمانوں سےاظہار یکجہتی کیا گیا۔
تفصیلات کے مطابق فلسطینی مسلمانوں سےاظہار یکجہتی کیلئے رمضان المبارک کے جمعۃ الوداع کے موقع پر اسلام آباد، کراچی، لاہور، سیالکوٹ،بہالپور، بنوں، دادو، ٹنڈوالہ یار، ٹھٹھہ سمیت دیگر شہروں میں یوم القدس ریلیاں نکالی گئیں۔
نمازجمعہ کے اجتماعات میں ملکی استحکام اورسلامتی کراچی اورفلسطین میں امن کی بحالی کیلئےخصوصی دعائیں مانگی گئیں۔
ریلیوں میں بچوں، خواتین، بزرگ، نوجوانوں کی بڑی تعداد شریک تھی، مظاہرین نے امریکا،اسرائیل مردہ باد کے نعرے لگائے، ریلی کے شرکاء نے شہید فلسطین بچوں کی تصاویر بھی اٹھائی ہوئی تھیں۔
کراچی میں ایم اےجناح روڈ پرالقدس ریلی میں شیعہ اورسنی علماء کرام کے ساتھ ساتھ سیاسی ومذہبی جماعتوں کےرہنما بھی شریک تھے۔
اس موقع پر شرکاء سے خطاب کرتے ہوئے مجلس وحدت المسلمین کے رہنما علامہ راجہ ناصر عباس نے کہا کہ مسلمان اپنے اتحاد سے یہود ونصاریٰ کی سازشوں کو ناکام بنادیں۔
