Tag: یوم آزادی

  • یوم آزادی  کے دن پر  وزیراعظم عمران خان کا  نوجوانوں کیلئے پیغام

    یوم آزادی کے دن پر وزیراعظم عمران خان کا نوجوانوں کیلئے پیغام

    اسلام آباد : وزیراعظم عمران خان نے یوم آزادی کے موقع پر علامہ اقبال کا شعر ٹوئٹ کرکے نوجوانوں کیلئے پیغام میں کہا آج کے نوجوانوں کیلئے بھی یہ ایک انمول سبق ہے۔

    تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر علامہ اقبال کا شعر ٹوئٹ کردیا اور کہا نوجوانون کیلئے دھرنے کے وقت بھی یہی پیغام تھا آج بھی یہی پیغام ہے ، آج کے نوجوانوں کیلئے بھی یہ ایک انمول سبق ہے۔

    سبق پھر پڑھ صداقت کا ،عدالت کا ،شجاعت کا
    لیاجائےگا تجھ سے کام دنیا کی امامت کا۔

    وزیراعظم نے اپنے پیغام میں کہا قوم کو 73ویں یوم آزادی کی مبارکباد دیتاہوں ، ہمارا سفر قائد اعظم کے پاکستان کی طرف شروع ہوگیا ہے، قانون کے سامنے سب برابر ہیں۔

    عمران خان نے کہا کہ کورونا وائرس سے کامیابی کیساتھ نمٹنے پرقوم کومبارکباد پیش کرتا ہوں، غریب کونقدامداد،اسمارک لاک ڈاؤن کی وجہ سےکیسزکم کرنے کے قابل ہوئے۔

    ان کا کہنا تھا کہ پاورسیکٹر میں نقصانات کی بھرپائی کررہےہیں جو وراثت میں ملے، طویل مذاکرات کے بعد آئی پی پیزسےنیا معاہدہ ہوگیاہے، معاہدے سے توانائی پیدوار ی لاگت اورسرکلرڈیٹ میں کمی آئےگی ، اگلا اصلاحاتی ہدف پاور ڈسٹری بیوشن سسٹم ہے۔

    وزیراعظم عمران خان نے کشمیریو ں کے نام ٹوئٹر پر پیغام میں کہا کہ بہادر کشمیریو ں کو پیغام دیتا ہوں پاکستانی قوم ان کےساتھ ہے ، بھارت کےغاصبانہ قبضے کیخلاف کشمیریوں کی ہر سطح پر مددکریں گے، 2سال کی جدوجہدکےبعدمعیشت کی بحالی پرقوم کومبارکبادپیش کرتاہوں۔

  • یوم آزادی پر لہو گرماتے تاریخ سازملی نغمے

    یوم آزادی پر لہو گرماتے تاریخ سازملی نغمے

    ارضِ پاکستان کے شہری آزادی کا جشن بھرپور انداز میں مناتے ہیں، آج کے دن ہرمحب وطن شہری کے لبوں پرملی نغموں کی سریلی آوازیں سنائی دیتی ہیں۔

    جب قومی نغموں میں جذبہ اور وطن سے محبت کا جنون شامل ہو اور توقومی ترانے کی مدھر دھن اور سُر آزادی کے پروانوں کو مدہوش کر نے کے ساتھ لطف اندوز کرنے کا ساماں ہوتے ہیں ۔

    یوم آزادی کی تقریبات میں قومی ترانے، قومی نغمے اور اسکے دھن کے رس گھولتے سُر اپنی مخصوص دُھن میں جشن آزادی کے تقدس اوراہمیت کو اور بڑھا دیتی ہے۔

    جشن آزادی پر وطن سے محبت کا اظہار کرنے والے چند ملی نغمے اسے بھی ہیں جو کئی دہائیوں سے ہر محب وطن کے دلوں میں اپنی جگہ بنائے ہوئے ہیں اور وہ آج بھی قوم کا لہو گرماتے ہیں۔

    پاکستان کے مشہور و معروف گلوکاروں کے چند ایسے ملی نغمے جن تخلیق کے بعد سے کبھی ان کی شہرت میں کمی نہیں آئی مندرجہ ذیل ہیں۔

    جنید جمشید کا دل دل پاکستان کبھی کوئی بھول سکتا ہے کیا!!۔

    جنون بینڈ کا جذبہ جنون تو ہمت نہ ہار آج بھی پاکستان کے جوانوں کو جھومنے پر مجبورکردیتا ہے

    اور جب بات ہو لیجنڈ نصرت فتح علی خان کے پاکستان پاکستان کی ، تو بس کمال ہی ہوگیا

  • یوم آزادی بطور یوم یکجہتی کشمیر منایا جا رہا ہے

    یوم آزادی بطور یوم یکجہتی کشمیر منایا جا رہا ہے

    ملک بھرمیں یومِ آزادی روایتی جوش وخروش اورجذبے سے منایا جارہاہے۔ ملک بھر میں سرکاری عمارتوں، سڑکوں اور راستوں کو قومی پرچموں سے سجایا گیا ہے۔

    تفصیلات کے مطابق ملک بھر میں یوم آزادی کشمیریوں سے اظہار یکجہتی کے طور پر منایا جا رہا ہے۔ یوم آزادی پر دن کا آغاز توپوں کی سلامی سے ہوا۔

    وفاقی دارالحکومت اسلام آباد میں یوم آزادی کے دن کا آغاز 31 توپوں جبکہ صوبائی دارالحکومتوں میں 21،21 توپوں کی سلامی سے ہوا۔ اس موقع پر ملک کی سلامتی اور یکجہتی کے لیے خصوصی دعائیں بھی کی گئیں۔

    یوم آزادی پر توپوں کی سلامی سے دن کا آغاز

    یوم آزادی پر صوبہ پنجاب کے دارلحکومت لاہورمیں دن کا آغاز 21 توپوں کی سلامی سے ہوا، اس موقع پر فضا تکبیر کے نعروں سے گونج اٹھی۔

    یوم آزادی کے موقع پر پشاور میں بھی 21 توپوں کی سلامی دی گئی۔ یوم آزادی پرتوپوں کی سلامی کی یہ تقریب کینٹ کے پانڈو اسٹیڈیم میں ہوئی جبکہ کوئٹہ کے آرمی پولوکلب میں بھی پاک فوج کے جوانوں کی جانب سے 21 توپوں کی سلامی دی گئی۔

    کراچی میں بھی دن کا آغاز 21 توپوں کی سلامتی سے کیا گیا۔ شہر شہر نمازفجرکی ادائیگی کے بعد مساجد میں ملکی ترقی وسلامتی اور خوشحالی کے لیے خصوصی دعائیں بھی کرائی گئیں۔

    کشمیریوں کو تہنا نہیں چھوڑیں گے، یوم آزادی پر صدر اور وزیراعظم کا پیغام

    صدر ڈاکٹر عارف علوی اور وزیراعظم عمران خان نے یوم آزادی اور یوم یکجہتی کشمیرکے موقع پر کہا کہ ہم کشمیریوں کے ساتھ تھے، ساتھ ہیں اور ہمیشہ ساتھ رہیں گے۔

    یوم آزادی کے موقع پر پرچم کشائی کی مرکزی تقریب اسلام آباد میں ہوگی۔ کشمیری عوام سے یکجہتی کے لیے قومی پرچم کے ساتھ کشمیرکا جھنڈا بھی لہرایا جائے گا۔

    وزیراعظم عمران خان کشمیریوں سے اظہار یکجہتی کے لیے آزاد کشمیر کے دارالحکومت مظفرآباد جائیں گے اور آزاد کشمیر کی قانون ساز اسمبلی سے خطاب بھی کریں گے۔

  • جشن آزادی: موٹروے پولیس کی جانب سے شہریوں کو تحائف

    جشن آزادی: موٹروے پولیس کی جانب سے شہریوں کو تحائف

    کراچی: موٹر وے پولیس کی جانب سےپاکستان کے جشن ِ آزادی کے موقع پر ہائی وے پرسفر کرنے والے شہریوں میں تحائف تقسیم کیے گئے۔

    تفصیلات کے مطابق ہائی پر سفر کرنے والے مسافروں میں ٹول پلازہ کے مقام پر یوم آزادی کی مناسبت سے تحائف کی تقسیم آئی جی موٹر ویزاینڈ ہائی ویزعامر ذوالفقار خان نےخود کی ۔

    اس موقع پر ڈی آئی جی موٹر وے کراچی محمد سلیم بھی ان کے ہمراہ تھے، ان کا کہنا تھا کہ شہریوں میں تحائف کی تقسیم کا مقصد ان میں ٹریفک قوانین کا احترام پیدا کرنا ہے۔

    انہوں نے مزید کہا کہا کہ آزادی ایک نعمت ہے جو ہمیں بہت مشکلوں سے حاصل ہوئی ہے، اس موقع پر ہمیں یہ تہیا کرنا ہوگا کہ ہم اپنے فرائض منصبی اور بہتر انداز میں سر انجام دیں گے۔

    ڈی آئی جی موٹر وے کا مزید کہنا تھا کہ دنیا کی تمام مہذب اور آزاد اقوام ٹریفک قوانین پر عمل درآمد کرتی ہیں، شہریوں کی جانب سے ٹریفک قوانین پر عمل درآمد کرنا ہمارے عظیم اور منظم قوم ہونے کی علامت ہے۔

  • پاکستان کا یومِ آزادی، ایران کی سڑکوں پر مبارک باد کے پوسٹرز آویزاں

    پاکستان کا یومِ آزادی، ایران کی سڑکوں پر مبارک باد کے پوسٹرز آویزاں

    تہران : پاکستان کے یوم آزادی کے موقع پر ایران کی سڑکوں کو خصوصی پوسٹر سے سجا دیا گیا جبکہ تمام الیکٹرانکس اسکرینز پر  پاکستانی قوم کے لئے  مبارکباد کے  پیغامات بھی چلائے جارہے ہیں۔

    تفصیلات کے مطابق ایران نے پاکستان سے دوستی کا ثبوت دے دیا، پاکستان کی یوم آزادی پر ایران کے عوام بھی پاکستانی قوم کی خوشیوں میں رنگ میں رنگ گئے۔

    ایران کی تاریخ میں پہلی بار عوامی سطح پر پاکستان کی یوم آزادی پر مبارکباد کے پیغامات کا سلسلہ جاری ہے جبکہ سڑکوں پر یوم آزادی کی مناسبت سے خصوصی پوسٹر آویزاں کر دیئے گئے۔

    ایران کے شہر مشہد کی تمام الیکٹرانک اسکرینز پر سپریم لیڈر کی جانب سے پاکستان کے یوم آزادی کے موقع پر مبارکباد کے پیغامات چلائے جارہے ہیں، یہ پیغامات مشہد کی میٹرو ٹرین کی اسکرینز پر 10 دن تک 24 گھنٹے ہر تین منٹ بعد چلیں گے۔

    خیال رہے میٹرو ٹرین پر روزانہ ڈھائی لاکھ افراد سفر کرتے ہیں۔

    دوسری جانب یوم آزادی کے موقع پر مرکزی تقریب تہران میں قائم پاکستانی سفارتخانے میں ہوئی، اس موقع پر خاتون پاکستانی سفیر محترمہ رفعت مسعودنے پرچم کشائی کی، اس موقع پر کیک بھی کاٹا۔


    مزید پڑھیں : ایرانی صدر کا عمران خان کو ٹیلی فون، دورہ ایران کی دعوت


    یاد رہے چند روز قبل صدر حسن روحانی نے عمران خان کو ٹیلی فون کرکے الیکشن میں‌ کامیابی پر مبارک باد دیتے ہوئے ایران کے دورے کی دعوت بھی دی تھی۔

    ایرانی صدر نے کہا کہ پاکستان ایران فقط ہمسایے نہیں ہیں، مذہبی اور ثقافتی بندھن سے جڑے ہیں، پاک ایران تعلقات میں مزید پختگی اور اضافے کےخواہاں ہیں۔

  • ملک بھرمیں یوم آزادی ملی جوش و جذبے سے منایا جارہا ہے

    ملک بھرمیں یوم آزادی ملی جوش و جذبے سے منایا جارہا ہے

    ملک بھرمیں یومِ آزادی روایتی جوش وخروش اورجذبے سے منایا جارہاہے۔ ملک بھر میں سرکاری عمارتوں، سڑکوں اورراستوں کو قومی پرچموں سے سجایا گیا ہے۔

    ملک بھر میں جشن آزادی بھرپور قومی جذبے کے ساتھ منایا جا رہا ہے، سرکاری اور نجی عمارتوں کو دلہن کی طرح سجایا گیا ہے۔

    یوم آزادی کے دن کا آغاز دارالحکومت اسلام آباد میں توپوں کی سلامی ہوا، وفاقی دارالحکومت میں 31،صوبوں میں 21،21 توپوں کی سلامی دی گئی۔ مساجد میں ملکی سلامتی اور خوشحالی کے لیے خصوصی دعائیں بھی کی گئیں۔

    ملک بھر میں صبح 8 بجکر 58 منٹ پرسائرن بجائے گئے اور تحریک پاکستان کے شہدا کو خراج عقیدت پیش کیا گیا۔

    جناح کنونشن سینٹرمیں پرچم کشائی کی مرکزی تقریب

    جناح کنونشن سینٹراسلام آباد میں یوم آزادی کی مرکزی تقریب منعقد ہوئی جس میں صدرممنون حسین اورنگراں وزیراعظم ناصرالملک نے شرکت کی۔

    تقریب میں تینوں مسلح افواج کے سربراہان، اسپیکرقومی اسمبلی ایازصادق، چیئرمین سینیٹ صادق سنجرانی اورغیرملکی سفیروں سمیت اہم شخصیات نے شرکت کی۔

    صدرممنون حسین کا خطاب

    یوم آزادی کی مرکزی تقریب سے خطاب کرتے ہوئے صدرممنون حسین نے کہا کہ پاکستان ان تصورات کی مجسم تصویرہے جس کی آغوش میں ہم ہرلمحہ آزادی کا لطف اٹھاتے ہیں۔

    انہوں نے کہا کہ یوم آزادی پرسبز ہلالی پرچم مزید بلند کرنے لگن بڑھ جاتی ہے، آج حقیقی جشن کا دن ہے اورمیں پوری قوم کو دل کی گہرائیوں سے مبارکباد پیش کرتا ہوں۔

    تقریب سے خطاب کرتے ہوئے صدرمملکت نے کہا کہ جشن آزادی اور عام انتخابات کے درمیان پیغام پوشیدہ ہے، یہ دن یاد دہانی ہے پاکستان کی قسمت کے فیصلے ووٹ کی پرچی سے ہوں گے۔

    انہوں نے تقریب سے خطاب کرتے ہوئے کہا کہ پاکستان کواپنے وجود سے اب تک بہت سے چیلنجز کا سامنا کرنا پڑا، ہم ابھی تک مکمل طور پر منزل تک نہیں پہنچ سکے۔

    صدرممنون حسین نے کہا کہ میری دعا ہے کہ اللہ تعالی ملک وملت کی بہتری اور ترقی کےجذبے اور نیک نیتوں کے ساتھ کاروبار مملکت سنبھالنے والوں کی رہنمائی فرمائے اور جذبہ عمل بڑھا دے۔

    انہوں نے واضح کیا کہ قومی ایام اسی لیے منائے جاتے ہیں کہ آنے والی نسلوں کو قومی مقاصد اور ان کے حصول کے لیے کی جانے والی جدوجہد سے آگاہ کیا جاسکے۔

    کراچی میں مزارقائد پر گارڈز کی تبدیلی کی پُروقار تقریب منعقد ہوئی جہاں پاک بحریہ کے کیڈٹس نے مزارقائد پرگارڈزکے فرائض سنبھال لیے۔ تقریب کے مہمان خصوصی کموڈور وقار محمد تھے۔

    لاہورمیں مزارِ اقبال پر ہونے والی خصوصی تقریب میں پاک فوج کے دستے نے مزار اقبال پر گارڈز کے فرائض سنبھالے۔اس موقع پر تقریب کے مہمان خصوصی جی اوسی لاہورمیجرجنرل شاہد محمود نے نے آرمی چیف کی جانب سے مزاراقبال پرپھول چڑھائے۔

    پاکستان کا قومی پرچم پہلی بار کب اور کہاں لہرایا گیا؟

    واضح رہے کہ اسکولوں اور کالجوں میں بھی پرچم کشائی کی تقاریب کا انعقاد کیا گیا ہے اور اس کے ساتھ ساتھ رنگا رنگ تقاریب،تقاریرکا اہتمام بھی کیا گیا ہے، گھروں میں بچوں،جوانوں اور بوڑھوں کا جوش و خروش توقابل دید ہے۔

  • یوم آزادی کی خوشیاں سبز ہلالی کیک سے دوبالا کریں

    یوم آزادی کی خوشیاں سبز ہلالی کیک سے دوبالا کریں

    آج پاکستان کا 71 واں یوم آزادی نہایت جوش و جذبے سے منایا جارہا ہے۔ آج ہمارے مادر وطن کی سالگرہ ہے اور اس موقع پر کیک کاٹنا خوشیوں کو دوبالا کرسکتا ہے۔

    آج کے دن کی مناسبت سے خصوصی طور پر سبز و سفید کیک تیار کیے جاتے ہیں جن پر چاند ستارہ بھی بنایا جاتا ہے۔ یہ کیک گھر میں بھی نہایت آسانی سے تیار کیا جاسکتا ہے۔

    اس کے لیے آپ کو عام ترکیب سے کیک تیار کرنا ہوگا اس کے بعد سبز رنگ کی کریم سے من پسند ڈیزائن تشکیل دینا ہوگا۔


    کیک بنانے کی ترکیب

    اجزا

    میدہ: ڈیڑھ کپ

    کارن فلور: 1 کھانے کا چمچ

    انڈے: 4 عدد

    بیکنگ پاؤڈر: ڈیڑھ چائے کا چمچ

    نمک:1 چٹکی

    چینی: 1 کپ پسی ہوئی

    تیل: 1 کپ


    ترکیب

    سب سے پہلے کیک کے سانچے کو صاف کر کے اس کے اندر تیل لگا لیں۔

    ایک چمچ میدہ ڈال کر سانچے کو اچھی طرح ہلا لیں تاکہ میدہ سانچے اندر ہر طرف لگ جائے۔ زائد میدے کو جھاڑ دیں۔

    اوون کو 180 سینٹی گریڈ یا مارک 4 پر جلا لیں۔

    خشک اجزا یعنی میدہ، کارن فلور، بیکنگ پاؤڈر اور نمک کو تین چار بار اچھی طرح چھان لیں۔

    ایک پیالے میں چینی اور ایک کپ تیل ڈال کر خوب اچھی طرح پھینٹیں۔

    اب اس آمیزے میں 1 انڈہ توڑ کر ڈالیں اور خوب پھینٹیں۔ پھر دوسرا انڈہ ڈال دیں اور اچھی طرح پھینٹیں۔ اسی طرح چاروں انڈے ایک کے بعد ایک ڈالتے جائیں اور اچھی طرح پھینٹتے جائیں۔

    چھانے ہوئے خشک اجزا یعنی میدہ کے مکسچر کو پھینٹے ہوئے آمیزے میں تھوڑا تھوڑا کر کے ڈالتے جائیں اور ہلکے ہاتھ سے ملاتے جائیں۔

    جب سارا میدہ اچھی طرح مل جائے اور آمیزہ ایک سا نظر آنے لگے تو دودھ ڈال کر ملا لیں۔

    اب سانچے میں بھر کر پہلے سے گرم اوون میں 40 سے 45 منٹ تک پکائیں۔

    کیک تیار ہونے کے بعد بازار میں دستیاب سفید اور سبز کریم سے اپنی پسند کا ڈیزائن تشکیل دیں۔ سبز جھنڈے سے سجا ہوا کیک یقیناً جشن آزادی کی خوشیوں کو دوبالا کردے گا۔


     

  • لندن: یوم آزادی کی مناسبت سے پاکستانی سفارت خانے میں پھولوں کی نمائش کا انعقاد

    لندن: یوم آزادی کی مناسبت سے پاکستانی سفارت خانے میں پھولوں کی نمائش کا انعقاد

    لندن : یوم آزادی کی مناسبت سے برطانیہ میں موجود پاکستانی سفارت خانے میں پھولوں کی نمائش کا انعقاد کیا گیا، جس میں پاکستانی ہائی کمشنر نے بطور مہمانِ خصوصی شرکت کی۔

    تفصیلات کے مطابق برطانیہ کے دارالحکومت لندن میں موجود پاکستانی سفارت خانے میں جشنِ آزادی کی مناسبت سے فلورل آرٹ سوسائٹی آف پاکستان پشاور چیپٹر نے پاکستانی ہائی کمیشن کی معاونت سے پھولوں کی پر وقار نمائش کا انعقاد کیا گیا۔

    میڈیا کا کہنا تھا کہ پھولوں کی پر وقار نمائش کا افتتاح پاکستانی ہائی کمشنر نے کیا اس موقع پر برطانیہ میں موجود پاکستانی کمیونٹی نے بڑی تعداد میں شرکت کی۔

    پاکستانی ہائی کمشنر صاحبزادہ احمد خان نے تقریب میں موجود شرکاء سے خطاب کرتے ہوئے کہا کہ آزادی کے بعد سے پاکستانیوں نے ملک کو جمہوری تقاضوں پر تعمیر کرنے کی کوشش کی جو قابلِ تحسین ہے۔

    صاحبزادہ احمد خان کا کہنا تھا کہ ’سفارت خانوں میں ایسی تقریبات کے انعقاد کے ذریعے سفارت کاری کا فروح خاص اہمیت رکھتا ہے کیوں کہ اس طرح کی سرگرمیوں سے پاکستان اور برطانیہ کے درمیان مزید بہتر تعلقات فروغ پائیں گے۔

    پھولوں کی نمائش کے اختتام پر فلورل آرٹ سوسائٹی آف پاکستان کی رہنما فریدا طارق نشتر نے پاکستانی ہائی کمشنر صاحبزادہ احمد خان کی آمد کا اور پھولوں کی عالی شان نمائش کے انعقاد کے لیے خصوصی تعاون کا شکریہ ادا کیا۔

  • آج امریکا کا 242 واں یوم آزادی منایا جارہا ہے

    آج امریکا کا 242 واں یوم آزادی منایا جارہا ہے

    واشنگٹن : امریکی عوام ملک بھر میں برطانیہ سے آزادی کی 242 ویں سالگرہ بھرپور جوش و جذبے سے منارہی ہے۔ اس موقع پر ملک بھر میں متعدد تقریبات کا انعقاد کیا جارہا ہے۔

    تفصیلات کے مطابق دنیا کی سپر پاور امریکا کے شہری آج 242 واں یوم آزادی منا رہے ہیں۔ اس موقع پر ملک کی تمام سرحدوں پر فوج کو مزید الرٹ کردیا گیا ہے اور ملک بھر میں سیکیورٹی انتظامات مزید سخت کردیئے ہیں تاکہ کسی بھی ناخوشگوار واقعے باآسانی نمٹا جاسکے۔

    امریکی خبر رساں ادارے کے مطابق سعودی عرب بادشاہ شاہ سلمان بن عبد العزیز نے امریکا کے 242 ویں یوم آزادی کے موقع پر امریکی صدر ڈونلڈ ٹرمپ کو مبارک باد پیش کی ہے۔ جبکہ دنیا میں موجود امریکی سفارت خانوں میں بھی یوم آزادی کی تقاریب منعقد کی جارہی ہیں۔

    خیال رہے کہ آج ہی کے دن امریکا کی عوام نے 4 جولائی سنہ 1776 میں برطانیہ کے تسلط سے آزادی حاصل کی تھی۔ اسی لیے ملک بھر میں 4 جولائی جو سرکاری سطح پر عام تعطیل ہوتی ہے۔

    یوم آزادی کے موقع پر پریڈ، پکنک، آتش بازی کے مظاہرے بھی کیے جارہے ہیں، موسیقی کی محافل بھی منعقد ہو رہی ہیں۔ نیشنل مال پر آتش بازی اور محفل موسیقی کی ایک شاندار تقریب ہونے والی تھی۔ جسے دیکھنے کے لیے امریکا کے گوش و کنار میں بسنے والے لاکھوں افراد واشنگٹن پہنچ چکے ہیں۔

    امریکا بھر میں ملک کی برطانیہ سے آزادی کی 242 ویں سالگرہ روایتی جوش و خروش سے منائی جا رہی ہے۔ اس موقع پر ایسے ڈرامے بھی پیش کیے جا رہے ہیں، جن میں ملک کی تاریخی شخصیات کے کردار کو اجاگر کیا جارہا ہے۔


    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • کل تمام بڑے شہروں میں موبائل فون سروس بند کرنے کا حکم

    کل تمام بڑے شہروں میں موبائل فون سروس بند کرنے کا حکم

    اسلام آباد: جشن آزادی کے موقع پر دہشت گردی کے ممکنہ حملے کے پیش نظر محکمہ داخلہ کی جانب سے دارالحکومت سمیت بڑے شہروں میں موبائل فون سروس معطل رکھنے کا فیصلہ کرلیا گیا۔ٹیلی کام کمپنیوں‌کو موبائل فون سروس کی بندش کے احکامات موصول ہوگئے


    Mobile service to remain close tomorrow in… by arynews

    تفصیلات کے مطابق یومِ آزادی کے موقع پر دہشت گردی کے ممکنہ خطرے کے پیش نظر وفاقی دار الحکومت ،روالپنڈی ، لاہور اور کراچی سمیت ملک بڑے شہروں میں میں موبائل فون سروس معطل رکھنے کا فیصلہ کیا گیا ہے۔

    ضلعی انتظامیہ کی جانب سے وزارتِ داخلہ کو درخواست بھیجی گئی تھی جس میں یوم آزادی پر دہشت گردی کے ممکنہ خطرے کے پیش نظر موبائل فون سروس معطل رکھنے کی استدعا کی گئی ہے۔

    وزارتِ داخلہ نے ضلعی انتظامیہ کی جانب سے بھیجی گئی درخواست موصول ہونے کے بعد پاکستان ٹیلی کمیونی کیشن اتھارٹی کو بھی آگاہ کردیا ہے اور موبائل فون سروس معطل رکھنے کی ہدایت کی گئی ہیں۔

    ٹیلی کام حکام کے مطابق وزارتِ داخلہ سے موصول ہونے والی ہدایت کے بعد یوم آزادی کے روز ملک بھر کے بڑے شہروں میں صبح 6 بجے سے دوپہر 12 تک موبائل فون سروس کے ساتھ ساتھ انٹرنیٹ سروس بھی معطل رہے گی۔ تاہم وفاقی دار الحکومت سمیت بڑے شہروں میں جشن آزادی کی تقریبات کے اختتام ہوتے ہی موبائل فون اور انٹرنیٹ سروس بحال ہوجائے گی ۔

    موبائل فون کی بندش سے آگاہ نہیں‌ کیا، سیکریٹری داخلہ سندھ
    سیکریٹری داخلہ سندھ ریاض سومرو نے کہا ہے کہ موبائل فون سروس کی بندش وفاق کا معاملہ ہے، وفاق نے جشن آزادی پر موبائل فون کی بندش کے معاملے پر آگاہی نہیں دی.

    دریں‌ اثنا ملک بھر کی تمام ٹیلی کام کمپنیوں‌کو موبائل فون سروس کی بندش کے احکامات موصول ہوگئے