Tag: یوم دفاع سیریز

1965ء میں بھارت سے جنگ کے موقع پر پاکستانی شعراء کے جنگی ترانے اور رزمیہ شاعری ایک طرف سرحدوں کے محافظوں کا لہو گرماتی رہی اور دوسری طرف قوم میں جذبۂ حبُ الوطنی بیدار کرتے ہوئے انھیں دشمن کے خلاف متحد کر دیا تھا۔ یہ جنگی ترانے اور رزمیہ شاعری پاکستانی قوم کی امنگوں اور جذبات کی ترجمان بھی تھی اور ان کے بول دشمن کے لیے کسی تازیانے سے کم نہ تھے۔

جنگِ‌ ستمبر کے موقع پر شعراء نے جو ترانے لکھے، وہ آج اردو زبان کے رزمیہ ادب کا حصّہ ہیں اور یہ شاعری قومی وحدت کی یادگار کے طور پر محفوظ ہے۔ یہاں ہم جنگِ ستمبر کے دوران اور بھارت کی شکست کے بعد مشہور ہونے والے اشعار اور ترانوں کے مقبول بند پیش کر رہے ہیں۔

اپنی جاں نذر کروں، اپنی وفا پیش کروں
قوم کے مردِ مجاہد تجھے کیا پیش کروں
عمر بھر تجھ پہ خدا اپنی عنایت رکھے
تیری جرأت تیری عظمت کو سلامت رکھے
جذبۂ شوقِ شہادت کی دعا پیش کروں
قوم کے مردِ مجاہد تجھے کیا پیش کروں
(مسرور انور)

اج ہندیاں جنگ دی گل چھیڑی
اکھ ہوئی حیران حیرانیاں دی
مہاراج اے کھیڈ تلوار دی اے
جنگ کھیڈ نئیں ہوندی زنانیاں دی
(ڈاکٹر رشید انور)

تو وارث پاک اُجالوں کی
تو دھرتی شیر جوانوں کی
تری خوشبو کو چھلکائیں گے
ترے پیار کی جُگنی گائیں گے
(ضمیر جعفری)

میری سرحد پہ پہرا ہے ایمان کا
میرے شہروں پہ سایہ ہے قرآن کا
میرا ایک اک سپاہی ہے خیبر شکن
چاند میری زمیں، پھول میرا وطن
(ساقی جاوید)

سرفروشی ہے ایماں تمہارا
جرأتوں کے پرستار ہو تم
جو حفاظت کرے سرحدوں کی
وہ فلک بوس دیوار ہو تم
(جمیل الدّین عالی)

ہمارا پرچم یہ پیارا پرچم
یہ پرچموں میں عظیم پرچم
(سیف زلفی)

لگاؤ نعرۂ تکبیر ہر چہ بادا باد
مجاہدوں کو پہنچتی ہے غیب سے امداد
(احسان دانش)

اے راہِ حق کے شہیدوں وفا کی تصویرو
تمہیں وطن کی ہوائیں سلام کہتی ہیں
(مشیر کاظمی)

اردو میں جذبۂ قومیت کے اشتراک سے قومی شاعری کو ایک الگ صنفِ ادب کے طور پر متعارف کرانے والے اہم شعراء میں صبا اکبر آبادی، طفیل ہوشیار پوری، سید ضمیر جعفری، کرم حیدری، کلیم عثمانی، مشیر کاظمی، کیف بنارسی، ساقی جاوید، جمیل الدین عالی، تنویر نقوی، حمایت علی شاعر، رئیس امروہوی، احمدندیم قاسمی، منیر نیازی، ریاض الرحمن ساغر کے نام شامل ہیں۔ پاکستان کی آزاد فضاؤں میں ان ملّی نغمات اور اشعار کی گونج ہمیشہ سنائی دیتی رہے گی۔

دو ممالک کی افواج اگر آمنے سامنے ہوں اور ان میں سے ایک سپاہ اور سامانِ حرب ہر لحاظ سے دوسرے ملک کی فوج پر بھاری ہو تو غالب امکان یہی ہے کہ فتح بھی عدد و اسباب میں برتری رکھنے والے کا مقدّر بنے گی، لیکن جس ملک کی فوج اور عوام اپنی آزادی کی خاطر اپنی جان نچھاور کرنے کا جذبہ رکھتے ہوں، بڑی سے بڑی طاقت بھی ان کے آگے نہیں ٹھہر سکتی۔ 1965ء کی جنگ میں دنیا نے یہی دیکھا جب پاکستان نے اپنے کئی گنا زیادہ طاقت رکھنے والے بھارت کو اس کی جارحیت پر منہ توڑ جواب دیا اور میدانِ جنگ میں شکست دی۔

جنگِ ستمبر کی مناسبت سے ہم یہاں محمد ظہیر بدر کے مضمون "پینسٹھ اور قومی زندہ دلی” سے ایک ایسا پارہ نقل کررہے ہیں جو 1965ء میں اُن کے اور ان کے ہم عمر ساتھیوں کے جوش و ولولے اور جذبۂ ایمانی کی مثال ہے۔ محمد ظہیر بدر لکھتے ہیں:

صدر ایوب نے اپنی تقریر میں کہا: ’’ہندوستان کے حکم ران شاید یہ نہیں جانتے کہ انھوں نے کس قوم کو للکارا ہے…‘‘

جب صدر کی تقریر ختم ہوئی تو ہم نعرہ تکبیر، پاک فوج زندہ باد، پاکستان پائندہ باد کے نعرے لگاتے محلّے کے چھوٹے سے بازار میں چھوٹا سا جلوس لے کر چل پڑے۔

دکان داروں نے ہمیں دیکھا تو وہ بھی کھڑے ہو کر ہمارے نعروں کا جواب دینے لگے۔ ایسے چھوٹے چھوٹے جلوس اور نعرے بازی ہمارا معمول بن گیا تھا۔ دن بھر ریڈیو پر قومی و ملّی نغمے، شام کو فوجی بھائیوں کے لیے خصوصی پروگرام سنا کرتے۔

پاک فضائیہ کے پاس بھارت کے جدید طیاروں کے برعکس سیبر طیارے تھے۔ ریڈیو نے بتایا کہ پاک فضائیہ نے وطن کے دفاع کے لیے وہ کار ہائے نمایاں انجام دیے کہ قوم کا جذبۂ حُب الوطنی اور جذبۂ ایمانی فوج کی طاقت بن گیا۔ پاکستان کے فلائٹ لیفٹیننٹ یونس حسن شہید اور ایم ایم عالم کا واقعہ بھی عالمی ریکارڈ ہے۔

ایک روز جب بھائی خاکی وردی میں ملبوس سر پر ہری ٹوپی پہنے گھر میں داخل ہوا تو اس نے بتایا کہ اسے شہری دفاع میں رضا کار کے طور پر بھرتی کرلیا گیا ہے۔

جب بلیک آؤٹ ہوا کرتا تو یہ رضا کار لوگوں کے گھروں کی بتیاں بند کروایا کرتے تھے۔ اس کے علاوہ یہ رضا کار محاذ تک استعمال کی اشیا اور سامانِ خور و نوش کی رسد کا فریضہ بھی ادا کرنے پر مامور تھے۔ مگر ہمارا معمول تھا کہ جب بھی سائرن بجتے چھتوں پر چڑھ جاتے اور فضائے نیلگوں میں پاکستانی طیاروں کی بھارتی طیاروں پر جھپٹ پلٹ کا نظارا کرتے۔

گھر والے روکتے، سول ڈیفنس والے بھی دروازے پر دستک دیتے، تنبیہ کرتے مگر ہم کہاں ٹلتے۔ خوف سے کھیلنا ہمارا مشغلہ بن گیا تھا۔ ہمارے گھر کے قریب ہی سول ڈیفنس کا علاقائی دفتر تھا جہاں تمام رضا کار جمع ہوتے اور انھیں ان کی ذمہ داریاں دی جاتیں۔

ایک دن بھائی کو بتائے بغیر میں بھی سول ڈیفنس کے دفتر پہنچ گیا جہاں پر رضا کاروں کے ساتھ ساتھ ان کے انچارج بھی موجود تھے۔ میں نے کہا کہ میں بھی رضا کار بننا چاہتا ہوں۔ دشمن کو پتا نہیں اس نے کس قوم پر حملہ کیا ہے۔ میں نے بڑے جذباتی انداز میں تقریر شروع کر دی۔ سب سنتے رہے۔ آخر ان کے افسر میرے پاس آئے میرے سَر پر ہاتھ پھیرا۔ میں نے دیکھا ان کی آنکھوں میں آنسو تھے۔ انھوں نے میرے کندھے پر ہاتھ رکھ کر کہا: خدا کی قسم! جس قوم کے بچّوں میں وطن کی محبّت کا یہ جذبہ ہو اسے دنیا کی کوئی طاقت شکست نہیں دے سکتی۔ اس کے بعد انھوں نے مجھے کہا۔ بیٹا تم ابھی بہت چھوٹے ہو۔ تم اپنی پڑھائی پر دھیان دو، اپنے والدین کا کہا مانو، ہمسایوں سے اچھا سلوک کرو، تمہارا یہی فرض ہے، یہی جہاد ہے اور وطن سے محبّت کا یہی طریقہ ہے۔ تم سمجھو کہ تم بھی پاک فوج کے شانہ بشانہ لڑ رہے ہو۔

وحدت کالونی کی سڑک ان دنوں بہت چھوٹی سی تھی جو ملتان روڈ کو فیروز پور روڈ سے ملاتی تھی۔ ہم سڑک پر کھڑے ہو کر منتظر رہتے کہ کب فوجی گاڑی یہاں سے گزرے۔ دور سے آتی ہوئی گاڑی کو دیکھ کر ہم اپنے دوسرے ساتھیوں کو آوازیں دے کر بلاتے اور بتاتے کہ گاڑی آ رہی ہے اور وہ دوسرے لڑکوں کو بتاتے اور سب سڑک کے کنارے آکر کھڑ ے ہو جاتے۔

فوجیوں کو ہاتھ ہلا کر سلام کرتے، پاک فوج زندہ باد کے نعرے لگاتے۔ کبھی کبھار کوئی گاڑی ایک پل کے لیے رکتی، ہم بھاگم بھاگ سپاہیوں سے ہاتھ ملاتے۔ سپاہی ہمارے گال تھپتھپاتے اور نعروں کی گونج میں چل دیتے۔

خبروں میں سب سے زیادہ جن محاذوں کے نام سنے، ان میں واہگہ، چھمب جوڑیاں، کھیم کرن، گنڈا سنگھ والا کے نام مجھے یاد رہ گئے۔ آج بھی جب ان شہروں اور علاقوں کے نام سنتا ہوں تو جنگِ ستمبر 65 ء کی یاد تازہ ہو جاتی ہے۔

1965ء میں پاکستان اور بھارت کے درمیان ہونے والی جنگ میں سرحدوں پر لڑنے والے فوجی جوانوں اور عام پاکستانیوں نے دلیری، شجاعت اور ایثار کی تاریخ رقم کی۔ جنگِ ستمبر میں‌ دنیا نے دیکھا کہ پاکستان نے کئی گنا زیادہ فوج اور بھاری اسلحہ رکھنے والے دشمن کو پسپائی اختیار کرنے پر مجبور کیا۔

قیامِ پاکستان کے بعد اردو کے نام وَر انشا پرداز اور ممتاز ادیب شاہد احمد دہلوی ہجرت کرکے یہاں آگئے تھے۔ انھوں نے جنگِ ستمبر کا آنکھوں دیکھا احوال اور مادرِ‌ گیتی کے دفاع کے لیے جان قربان کر دینے کے جذبے سے سرشار قوم کے چیدہ چیدہ اور مستند واقعات کو تحریری شکل دی۔ بھارت کے اس جنگ میں‌ برتری اور فتح کے کھوکھلے دعوؤں اور پروپیگنڈے پر مبنی ایک قصّہ شاہد احمد دہلوی نے کچھ یوں بیان کیا ہے:

"1965ء میں کئی گنا زیادہ فوج اور بھاری اسلحے کے زعم میں پاکستان کی سرحدوں کو روند کر قابض ہونے کا خواب دیکھنے والے بھارت کو جب ناکامی کا سامنا کرنا پڑا تو اس نے دنیا اور اپنے عوام کے سامنے جھوٹ اور پروپیگنڈے کا سہارا لیا۔ اس حوالے سے یہ واقعہ تاریخ کا حصّہ ہے۔”

"6 ستمبر سے 23 ستمبر تک ہوائی حملوں کی وجہ سے پورے پاکستان میں بلیک آؤٹ رہا۔ حکومت کو اس سلسلے میں کسی قسم کی زحمت نہ کرنا پڑی۔ پبلک کو خود اپنی ذمہ داری کا اتنا احساس تھا کہ رات کے وقت کسی ایک گھر سے بھی روشنی کی کرن تک دکھائی نہیں دیتی تھی۔”

"محلّے والے ٹولیاں بنا کر گشت کرتے تھے تاکہ محلّے کی بھی حفاظت رہے۔ کراچی پر کئی رات بھارت کے طیّارے آئے اور اپنی دانست میں بم بھی گراتے رہے مگر معلوم ہوا کہ یا تو بم چلے نہیں یا سمندر میں گرتے رہے۔ دو چار شل البتہ آبادی پر گرے مگر کوئی جانی نقصان نہیں ہوا۔ مگر بھارت نے بڑے فخر سے اعلان کیا کہ لالو کھیت کا ہوائی اڈّہ اور تین ہٹی کا پل برباد کر دیا گیا۔ حالاں کہ لالو کھیت میں کوئی ہوائی اڈّہ نہیں ہے اور ایک برساتی نالے پر تین ہٹّی کی پلیا ہے۔”

"بھارت کے محکمہ اطلاعات نے ایک فرضی فلم بھی کراچی کی تباہی کی بنا لی جس میں دکھایا ہے کہ جہاں پہلے کراچی آباد تھا اب وہاں سمندر موجیں مار رہا ہے۔ بھارت کے پروپیگنڈے کا اصول یہ ہے کہ بمرگش بگیر تابہ تپ راضی شود۔”

"اتنا بڑا جھوٹ بولو کہ اسے گھٹاتے گھٹاتے بھی کچھ نہ کچھ باقی رہ جائے۔”