Tag: یوم سیاہ کشمیر

اسلام آباد: افغان حکومت بھارتی خوش نودی حاصل کرنے کے لیے اندھی ہو گئی ہے، کابل میں کشمیر سے متعلق پاکستانی سفارت خانے کی تقریب روکنے کی کوشش کر کے انڈیا کو خوش کیا گیا۔

تفصیلات کے مطابق پاکستانی سفیر زاہد نصر اللہ نے کہا ہے کہ آج یوم سیاہ کشمیر سے متعلق سفارت خانے میں تقریب کا انعقاد کیا گیا تھا جس میں سفارت کار، سیاسی عمائدین اور دیگر اہم شخصیات نے شرکت کرنا تھی، تاہم تقریب سے 2 گھنٹے قبل سفارت خانے کے باہر مظاہرہ کیا گیا۔

پاکستانی سفیر کا کہنا تھا سفارت خانے کے باہر جمع ہونے والے مظاہرین نے پاکستان مخالف نعرے لگائے، مظاہرے کے باعث مہمان سفارت خانے نہیں پہنچ سکے، مہمانوں کو ڈنڈا بردار مظاہرین دھمکاتے بھی رہے۔

یہ بھی پڑھیں:  افغان سفارتخانے کا پاکستانیوں کے ساتھ تضحیک آمیز رویہ

زاہد نصر اللہ نے بتایا کہ اس سلسلے میں افغان حکام سے بھی رابطے کی کوشش کی گئی لیکن وہاں سے جواب نہیں ملا، پولیس سے بھی رابطہ کیا گیا لیکن پولیس نے کہا کہ اوپر سے آرڈر نہیں۔

سفارتی ذرایع کا کہنا ہے کہ ملی بھگت سے پاکستانی سفارت خانے کے گیٹ پر مظاہرہ کیا گیا تاکہ یوم سیاہ کشمیر سے متعلق تقریب کو منعقد ہونے سے روکا جا سکے۔ واضح رہے کہ آج جموں و کشمیر پر بھارت کے غاصبانہ قبضے کو 72 سال مکمل ہو گئے ہیں، پاکستان سمیت دنیا بھر میں کشمیری یوم سیاہ منا رہے ہیں۔

خیال رہے کہ اسلام آباد میں واقع افغان سفارت خانے کی جانب سے بھی ویزے کے حصول کے لیے آنے والے پاکستانیوں کے ساتھ تضحیک آمیز رویّہ اختیار کیا جا رہا ہے، جس کے باعث پاکستانیوں میں شدید تشویش پائی جاتی ہے۔

اسلام آباد: یوم سیاہ کشمیر کے موقع پر وزیر اعظم عمران خان نے خصوصی پیغام جاری کرتے ہوئے کہا ہے کہ پاکستان کشمیری بھائیوں اور بہنوں کے ساتھ ہمیشہ کھڑا رہے گا، مقبوضہ کشمیر کے عوام کی اخلاقی، سیاسی، سفارتی حمایت جاری رکھیں گے، عالمی برادری مظلوم کشمیریوں کے بنیادی انسانی حقوق اور آزادی کو یقینی بنائے۔

تفصیلات کے مطابق آج پاکستان سمیت دنیا بھر میں یوم سیاہ کشمیر منایا جا رہا ہے، 27 اکتوبر 1947 کو بھارت نے جموں و کشمیر پر غاصبانہ قبضہ کیا تھا، رواں سال 5 اگست کو بھارت نے ایک اور مذموم قدم اٹھا کر مقبوضہ کشمیر کی خصوصی آئینی حیثیت ختم کر کے اسے بھارت کا حصہ بنایا اور اس کے بعد سے وادی میں مسلسل کرفیو نافذ ہے۔

وزیر اعظم عمران خان نے خصوصی پیغام میں کہا کہ رواں سال یوم سیاہ ماضی کی نسبت مختلف اور نمایاں ہے، 5 اگست کے اقدام نے آبادیاتی ڈھانچے اور شناخت کو تبدیل کر دیا ہے، پاکستان، کشمیریوں اور مسلم امہ نے قانون اور انصاف کے اس تمسخر کو مسترد کیا، دوسری طرف بھارتی حکومت نے انسانی حقوق کی خلاف ورزیوں میں اضافہ کر دیا ہے۔

انھوں نے پیغام میں کہا 3 ماہ سے ذرایع ابلاغ کے مکمل بلیک آؤٹ سے مقبوضہ وادی بڑی جیل میں بدل گیا، مقبوضہ کشمیر کرہ ارض کی سب سے بڑی جیل میں تبدیل ہو چکا ہے، وادی میں ادویات اور اشیائے خور و نوش کی شدید قلت ہے، ہزاروں افراد جابرانہ حراست میں لے لیے گئے ہیں، ہزاروں نوجوانوں کو اغوا کر کے نا معلوم مقام پر قید کر دیا گیا ہے۔

وزیر اعظم نے کہا کہ کشمیریوں کے ساتھ غیر انسانی اور تضحیک آمیز سلوک جاری ہے، بھارتی ریاستی دہشت گردی آج پہلے سے کہیں زیادہ سفاکانہ رخ اختیار کر گئی ہے، عالمی برادری اور انسانی حقوق کی تنظیمیں جبر کو ختم کرنے کا کہہ رہے ہیں، نام نہاد بڑی جمہوریت کے دعوے دار بھارت کا اصل چہرہ بے نقاب ہو چکا ہے۔

انھوں نے پیغام میں کہا کہ پاکستان مقبوضہ کشمیر میں کرفیو، ذرایع ابلاغ کے بلیک آؤٹ کے خاتمے، بھارت کے غیر قانونی اور یک طرفہ اقدامات کی منسوخی کا مطالبہ کرتا ہے، عالمی برادری امن و سلامتی کو لا حق خطرات کو روکنے میں کردار ادا کرے، ہم مقبوضہ کشمیر کے عوام سے غیر متزلزل یک جہتی کا اظہار کرتے ہیں۔