کراچی : ملک بھر میں آج بابائے قوم قائداعظم محمد علی جناح کا 142واں یوم ولادت انتہائی عقیدت واحترام اور ملی جوش وجذبے کے ساتھ منایا جارہا ہے۔
بابائے قوم قائداعظم محمدعلی جناحؒ 25 دسمبر1876ء کو سندھ کے موجودہ دارالحکومت کراچی میں پیدا ہوئے، انہوں نے ابتدائی تعلیم کا آغاز 1882ء میں کیا۔
قائد اعظم 1893ء میں اعلیٰ تعلیم کے حصول کے لیے انگلینڈ روانہ ہوگئے جہاں سے آپ نے 1896ء میں بیرسٹری کا امتحان پاس کیا اور وطن واپس آگئے۔
بابائے قوم نےاپنی سیاسی سرگرمیوں کا آغاز1906ء میں انڈین نیشنل کانگریس میں شمولیت سے کیا تاہم 1913ء میں محمد علی جناح نے آل انڈیا مسلم لیگ میں شمولیت اختیار کرلی۔
انہوں نے خودمختار ہندوستان میں مسلمانوں کے سیاسی حقوق کے تحفظ کی خاطر مشہور چودہ نکات پیش کیے۔
قائد اعظم کی قیادت میں برِصغیر کے مسلمانوں نے نہ صرف برطانیہ سے آزادی حاصل کی، بلکہ تقسیمِ ہند کے ذریعے پاکستان کا قیام عمل میں آیا اور آپ پاکستان کے پہلے گورنر جنرل بنے۔
پچیس دسمبراٹھارہ سوچھیترکو کراچی میں جناح پونجا کے گھرجنم لینے والے بچے نے برصغیر کی نئی تاریخ رقم کی اور مسلمانوں کی ایسی قیادت کی جس کے بل پر پاکستان نے جنم لیا۔
قائد اعظم محمدعلی جناح کی زندگی جرات، انتھک محنت ،دیانتداری عزم مصمم ،حق گوئی کا حسن امتزاج تھی، برصغیر کی آزادی کے لیے بابائے قوم کا مؤقف دو ٹوک رہا، نہ کانگریس انہیں اپنی جگہ سے ہلا کسی نہ انگریز سرکار ان کی بولی لگا سکی۔
پاکستانیوں کے حوالے سے بھی ان کا وژن واضح تھا ،25 مارچ 1948ء کو مشرقی پاکستان میں سرکاری افسران سے خطاب کے الفاظ سنہری حروف سے لکھنے کے قابل ہے۔
قائد اعظم نےسرکاری افسران کومخاطب کرتے ہوئے فرمایا’ آپ کسی بھی فرقے ذات یا عقیدے سے تعلق کیوں نہ رکھتے ہوں اب آپ پاکستان کے خادم ہیں، وہ دن گئے جب ملک پرافسرشاہی کاحکم چلتاتھا، آپ کواپنا فرض منصبی خادموں کی طرح انجام دینا ہے، آپ کو کسی سیاسی جماعت سے کوئی سروکارنہیں رکھنا چاہیئے‘۔
ولیم شیکسپیئرکا کہنا ہے کہ کچھ لوگ پیدائشی عظیم ہوتے ہیں اور کچھ اپنی جدوجہد اور کارناموں کی بدولت عظمت پاتے ہیں۔ بانی پاکستان قائد اعظم محمد علی جناح کا شمار بھی ان لوگوں میں ہوتا ہے جو اپنی جدوجہد اور لازوال کارناموں کی بدولت عظمت کے میناروں کو چھوتے ہیں۔
بانی پاکستان کے یوم ولادت کے دن آج تجدید عہد کرتے ہیں کہ ہم ہر قسم کے نسلی ،مذہبی اور فرقہ ورانہ تعصبات سے بالاترہوکرصرف اورصرف ملک کی تعمیر و ترقی میں کردار ادا کریں گے۔ یہ تبھی ممکن ہوگا جب قائد کےافکارکو سمجھا جائےاوران پرعمل کیا جائے۔
ہم تو مٹ جائیں گے اے ارضِ وطن تجھ کو مگر
زندہ رہنا ہے قیامت کی سحر ہونے تک
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
