Tag: یوم پاکستان

اسلام آباد: پاکستانی ہائی کمشن نئی دہلی میں یوم پاکستان کی پروقار تقریب کا انعقاد کیا گیا، جس میں پاکستان کے ناظم الامور سعد احمد وڑائچ نے قومی پرچم لہرایا۔

نئی دہلی میں یوم پاکستان پر منعقدہ تقریب میں صدر مملکت آصف علی زرداری، وزیر اعظم شہباز شریف اور نائب وزیر اعظم اسحاق ڈار کے پیغامات پڑھ کر سنائے گئے، اور پاکستانی ناظم الامور نے اہل پاکستان اور پاکستان سے محبت کرنے والوں کو مبارک دی اور نیک تمناؤں کا اظہار کیا۔

سعد احمد وڑائچ نے کہا تاریخی لاہور قرارداد نے برصغیر کے مسلمانوں کے لیے ایک الگ وطن کا راستہ متعین کیا، ہم قائد اعظم اور علامہ محمد اقبال کی بصیرت افروز قیادت کو خراج عقیدت پیش کرتے ہیں۔

انھوں نے کہا قیام پاکستان سے اب تک عوام نے ہر محاذ پر اہم کامیابیاں حاصل کی ہیں، ایٹمی پاکستان کا دفاع ناقابل تسخیر ہے، پاکستان پرامن بقائے باہمی اور اجتماعی فلاح کے اصولوں پر یقین رکھتا ہے۔

جاپانی قائم مقام قونصل جنرل ناکاگاوا یاسوشی کی اردو میں قرارداد پاکستان کی مبارک باد کی ویڈیو

سعد احمد وڑائچ نے کہا کرتارپور راہداری کے معاہدے کی تجدید پاکستان کے سفارت کاری اور بات چیت سے مسائل کے حل کے عزم کی تصدیق ہے، علاقائی امن اور سلامتی کے لیے تعمیری روش ناگزیر ہے، ضد اور ہٹ دھرمی کا راستہ خطے کے لیے ایک روشن مستقبل کا پیش خیمہ ثابت نہیں ہو سکتا۔

ناظم الامور نے کشمیر کے حوالے سے کہا کہ جموں و کشمیر کے تنازعہ کا منصفانہ حل اقوام متحدہ کی قراردادوں اور کشمیری عوام کی خواہشات کے مطابق ضروری ہے۔

یوم پاکستان کے موقع پر ایوان صدر میں مسلح افواج کی پریڈ ہوئی جس میں تینوں مسلح افواج کے دستوں نے مارچ پاسٹ کیا۔

اے آر وائی نیوز کے مطابق آج 85 واں یوم پاکستان ملی جوش وجذبے کے ساتھ منایا جا رہا ہے۔ اس موقع پر ایوان صدر میں مسلح افواج کی پریڈ تقریب ہوئی۔ صدر مملکت آصف علی زرداری مہمان خصوصی تھے۔

صدر آصف زرداری کی روایتی بگھی میں آمد ہوئی اور بگل بجا کر ان کی آمد کا اعلان کیا گیا۔ صدر مملکت کا استقبالیہ کمیٹی نے ارکان سے مصافحہ کیا۔ وزیر اعظم شہباز شریف، وزیر دفاع خواجہ آصف اور مسلح افواج کے سربراہان اسٹیج پر موجود تھے جب کہ تقریب میں غیر ملکی سفیروں سمیت اہم شخصیات نے شرکت کی۔

اس سال رمضان المبارک کے باعث یوم پاکستان کی تقریب محدود پیمانے پر منعقد کی گئی۔ تقریب میں یوم پاکستان پریڈ میں تینوں مسلح افواج کے دستوں نے مارچ پاسٹ کیا۔

مارچ پاسٹ کرتے ہوئے فوجی دستوں نے صدر آصف زرداری کو سلامی دی۔ اس موقع پر آرمی میوزک اسکول کی جانب سے خوبصورت دھنیں بجائی گئیں۔

تقریب میں پاک فضائیہ کے شاہینوں نے فلائی پاسٹ کیا اور پاک فضائیہ کی شیردل فارمیشن نے شاندار فضائی مظاہرہ کیا۔

https://urdu.arynews.tv/pakistan-day-is-being-celebrated-with-national-enthusiasm-today/

واشنگٹن: امریکی سینیٹر کرس وان ہولن نے یوم پاکستان کے موقع پر ویڈیو پیغام جاری کیا ہے، جس میں انھوں نے پاکستانیوں کو مبارکباد دی ہے۔

سینیٹر کرس وان ہولن نے 23 مارچ کی مناسبت سے جاری اپنے پیغام میں کہا کہ مجھے آپ سب کو یوم پاکستان کی مبارکباد دیتے ہوئے خوشی ہو رہی ہے، زندگی بھر میں نے پاکستانی عوام کی سخاوت اور گرمجوشی دیکھی ہے۔

امریکن سینیٹر نے کہا کہ امریکا میں مقیم پاکستانی کمیونٹی نے زندگی کے ہر شعبے میں بے پناہ خدمات سرانجام دی ہیں۔

سینیٹر کرس وان ہولن میں دونوں ملکوں کے عوام کے درمیان دوستی کے رشتوں کو مضبوط بنانے کے لئے اپنا بھرپور کردار ادا کرنے کا خواہاں ہوں۔

لاہور: یوم پاکستان کے موقع پر مزار اقبال پر گارڈز تبدیلی کی پر وقار تقریب ہوئی، پاک فضائیہ نے ستلج رینجرز کی جگہ ذمہ داریاں سنبھال لیں۔

تفصیلات کے مطابق یوم پاکستان کی مناسبت سے مزار اقبال پر گارڈز تبدیلی کی پر وقار تقریب ہوئی، مزار اقبال پر پاک فضائیہ کے خصوصی دستے نے فرائض سنبھال لیے۔

پاک فضائیہ کے دستے کی جانب سے مزار اقبال پر سلامی دی گئی جس میں ایئروائس مارشل طارق محمود تقریب کے مہمان خصوصی تھے، مہمان خصوصی ائیروائس مارشل طارق محمود نے گارڈ آف آنر کا معائنہ کیا۔

تقریب کے مہمان خصوصی ایئر وائس مارشل طارق محمود نے مزار اقبال پر پھول رکھے، فاتحہ خوانی کی اور مہمانوں کی کتاب میں تاثرات قلمبند کیے۔

واضح رہے کہ آج پاکستان بھر میں یومِ پاکستان بھرپور ملی جوش و جذبے سے منایا جارہا ہے، اس موقع پر جوائنٹ چیف آف اسٹاف کمیٹی اور افواج پاکستان کے سربراہان نے قوم کو مبارکباد دی۔

اسلام آباد : یوم پاکستان کے موقع پر شکر پڑیاں پریڈ گراؤنڈ میں افواج پاکستان کی مشترکہ پریڈ کی تیاریاں شروع کردی گئیں، پریڈ میں پاکستان ائیرفورس کے جے ٹین سی، جےایف 17تھنڈرز اور ایف 16 فلائی پاسٹ کا مظاہرہ کریں گے۔

تفصیلات کے مطابق یوم پاکستان پر مسلح افواج کی مشترکہ پریڈ کی تیاریاں زور شور سے جاری ہے ، تینوں مسلح افواج کیساتھ رینجرز، ایف سی اور پولیس کے دستے بھی حصہ لیں گے۔

یوم پاکستان پریڈ میں خواتین کی بھرپور نمائندگی بھی دکھائی دے گی جبکہ پاکستان کی مسلح افواج کےجدیدترین جنگی ہتھیاربھی سلامی پیش کرتے دکھائی دیں گے۔

پاکستان ائیر فورس کے جے ٹین سی، جےایف 17تھنڈرز اور ایف 16 فلائی پاسٹ کا مظاہرہ کریں گے جبکہ وفاقی اکائیوں کی خوبصورت،متنوع ثقافت کی نمائندگی کرنیوالے روایتی فلوٹس بھی پریڈ کا حصہ بنیں گے۔

خیال رہے 23 مارچ کو ملک بھرمیں 84واں یوم پاکستان بھرپور جذبے سے منایا جائے گا، اس دن کی مناسبت سے ملک بھر میں عام تعطیل ہوتی ہے اور ملک بھر میں تمام سرکاری و نجی عمارتوں پر قومی پرچم لہرائے جاتے ہیں۔

یہ دن 23 مارچ 1940 کو آل انڈیا مسلم لیگ کے اجلاس میں منظور کی گئی قرارداد کی یاد میں منایا جاتا ہے جس کی روشنی میں برصغیر کے مسلمانوں نے اپنے لئے ایک علیحدہ وطن کا خواب شرمندہ تعبیر کیا۔ یہ قرارداد لاہور منٹو پار میں میں پیش کی گئی جہاں اس کی یادگار کے طور پر مینار پاکستان تعمیر کیا گیا۔