کراچی : ایم کیو ایم پاکستان کے کنوینئر ڈاکٹر فاروق ستار کا کہنا ہے کہ ہمارے اجداد نے پاکستان بنایا تھا جب کہ ان کی اولادیں اب پاکستان بچائیں گے۔
ڈاکٹر فاروق ستار نے یوم پاکستان کی مناسبت سے منعقد کردہ ایک تقریب سے خطاب کر تے ہوئے کہا کہ پاکستان کے لیے قربانیاں دینے والے شہداء کا خون رائیگاں نہیں جانے دیں گے اور اس تاریخی دن عہد کرتے ہیں کہ ہم نے پاکستان بنایا تھا اور ہم ہی پاکستان کو بچائیں گے۔
سربراہ ایم کیو ایم پاکستان نے کہ ایم کیو ایم پاکستان قائد اعظم کے 1940 میں کی گئی تقریر کو اپنا منشور بنائے گی جس میں تمام اقلیتوں کو برابر کا حق دینے کی بات کی گئی ہے اور جہاں ریاست کے لیے ہر شہری بلا تفریق رنگ و نسل برابر کی حیثیت رکھتا ہو۔
انہوں نے کہا کہ انھوں نے کہا کہ مردم شماری کو شفاف بنا کرصوبائی اور قومی اسمبلی کی درست نشسوں کا تعین کیا جائے اور ملک کے سب سے بڑے شہر کو اس کا جائز حق دیا جائے اور یہاں رہائش پذیر افراد کی احساسِ محرومی کو ختم کیا جائے۔
ڈاکٹر فاروق ستار نے کہا کہ کراچی کو دو فیصد خیرات کی ضرورت نہیں بلکہ کراچی کو اس کا جائز اور مکمل حق دیا جانا چاہیئے جس کے لیے کراچی کے میئر کو بااختیار کیا جائے تاکہ شہریوں کے مسائل حل کیے جا سکیں۔
انہوں نے کہا کہ لاہور میں اورنج ٹرین اور کراچی میں نیلی پیلی بسیں یہ لولی پاپ اب نہیں چلے گا اور کراچی کے حقوق کی جنگ ہر سطح پر لڑیں گے اس ملک کو وڈیڑوں اور جاگیرداروں نے اس نہج پر پہنچایا ہے جہاں چند فی صد مراعات یافتہ طبقہ لوٹ مار میں مصروف ہے۔
اسلام آباد : یوم پاکستان کے موقع پر ملک کے لیے جانوں کے نذرانے پیش کرنے والے 10 شہیداء کو ستارہ بسالت جب کہ اعلیٰ پیشہ ورانہ مہارت اور کارکردگی دکھانے پر 36 فوجی افسران کو ہلال امتیاز کے اعزاز سے نوازا گیا۔
تفصیلات کے مطابق یوم پاکستان کے موقع پر اعزازات کی تقسیم کی پر وقار تقریب ایوان صدر میں منعقد کی گئی جس میں صدر پاکستان سمیت تینوں مسلح افواج کے سربراہان سمیت اعلیٰ سیاسی و عسکری شخصیات نے شرکت کی جب کہ شہداء کے لواحقین اس تقریب کی رونق کا باعث بنے۔
ذرائع کے مطابق ملک اور قوم کے لئے اپنی جانوں کی قربانیاں پیش کرنے والے پاک فوج کے جوانوں اور افسران کی قربانیوں کے اعتراف میں 36 افسران کو ہلال امتیاز جب کہ 10 شہداء کو ستارہ بسالت پیش کیے گئے شہداء کا اعزاز ان کے اہل خانہ نے وصول کیا اس موقع پر رقت آمیز مناظر بھی دیکھنے میں آئے۔
تقریب میں لیفٹیننٹ شیر افگن ، قاضی محمد اکرام احمد، بلال اکبر، ایئر مارشل محمد اقبال اور لیفٹیننٹ جنرل آصف ممتاز سکھیرا سمیت 36 افسران کو ہلال امتیاز ملٹری دیا گیا اور لیفٹیننٹ کرنل فیصل ملک شہید سمیت پاک فوج کے دس شہدا ءکو ستارہ بسالت سے نوازا گیا۔
پروقار تقریب میں صدر مملکت ممنون حسین نے اعزاز پانے والوں فوجی افسران کو بیجز لگائے اور شہداء کے لواحقین میں اعزازات تقسیم کیے۔
لاہور: سابق صدر آصف زرداری نے کہا ہے کہ پاکستان کو بچانے کے لیے پاکستان کھپے کا نعرہ لگایا اس لیے سیاست کریں گے تو بھی پاکستان کے لیے اور لڑیں گے تو بھی پاکستان کے لیے, اس لیے آج کے دن کا نعرہ ’’پاکستان تیرے جانثار بے شمار بے شمار‘‘ ہونا چاہیے۔
انہوں نے لاہور میں یوم پاکستان کی مناسبت سے منعقد کردہ تقریب سے خطاب میں کہا کہ ملک بچانے کے لیے پاکستان کھپے کا نعرہ لگایا، حکومت ملی تو بلوچستان کے عوام سے معافی مانگی، خیبر پختونخوا کے معاملے پر بات کی اور آر اوز کے الیکشن کو بھی ملک کے مفاد میں قبول کیا۔
انہوں نے کہا کہ ایسا کرنے پر ہمیں تنقید کا نشانہ بنایا گیا اور اعتراضات اٹھائے گئے لیکن ہم نے اعتراض کرنے والوں پر اعتراض کرنے کے بجائے پاکستان کومضبوط کرنے کے لیے جو بہتر سمجھا وہ کیا کیوں کہ ہمیں پاکستان کو بچا کر رکھنا ہے۔
اس موقع پر شرکاء نے پیپلز پارٹی اورسابق صدر آصف علی زرداری کے حق میں نعرے لگائے اور جب سب نے مل کر کہا کہ آصف تیرے جانثار بے شمار بے شمار کا نعرہ لگا یا تو آصف زرداری نے کہا کہ آج کا نعرہ تو یہ ہونا چاہیے کہ پاکستان تیرے جانثار بے شمار بے شمار جس پر تقریب اس نعرے سے گونج اٹھا۔
سابق صدر نے کہا کہ حکومتیں آتی جاتی رہتی ہیں لیکن ہمیں تاریخ میں زندہ رہنا ہے اور ایسے کام کرجانا ہے جس سے ہماری آئندہ نسل محفوظ اور تابناک ہو تاکہ آئندہ آنے والی نسلیں ہمیں یاد رکھیں۔
انہوں نے کہا کہ دوران صدارت صدام حسین سے ملاقات کا موقع ملا تھا اس وقت کیا جاہ و جلال تھی اور کیسا غرور و گھمنڈ ہوا کرتا تھا اور پھر اسی صدام حسین کے عبرت ناک انجام کو بھی دیکھا جب کسمپرسی اپنے عروج پر تھی افسوس کی بات یہ ہے کہ آج اپنے حکمرانوں میں بھی وہی گھمنڈ دیکھ رہا ہوں۔
شہباز شریف نے اپنی دونوں پوتیوں کے ساتھ ٹی وی پر یوم پاکستان کی پریڈ بھی دیکھی۔
وزیر اعلیٰ نے اپنی پوتیوں کو آج کے دن کی اہمیت بھی بتائی کہ کس طرح آج ایسے ملک کی قرارداد منظور ہوئی جہاں مسلمان اپنی مذہبی آزادی اور عزت کے ساتھ زندگی بسر کریں گے۔
ویلنگٹن: پاکستان ہاکی ٹیم نے نیوزی لینڈ کو 1-2سے شکست دے پانچ میچوں کی سیریزاپنے نام کرلی۔
تفصیلات کےمطابق پاکستان اور نیوزی لینڈ کےخلاف پانچ میچوں کی سیریز کا آخری میچ 1-1 گول سے برابر رہاجس کے بعد قومی ٹیم نے نیوزی لینڈ کو 1-2 سے ہرار کر سیریز جیت لی۔
پاکستان ہاکی فیڈریشن کےسیکرٹری شہبازسینئر کا کہنا ہے کہ نیوزی لینڈ کے خلاف ہاکی سیریز کی کامیابی یوم پاکستان پر قوم کو تحفہ ہے۔
انہوں نےمزید کہاکہ بہترین کارکردگی سے لڑکوں کے اعتماد میں اضافہ ہوا،یقین ہےکہ اب آسٹریلیا کے خلاف سیریز میں بھی لڑکےاچھا پرفارم کریں گے۔
یاد رہےکہ اس سےقبل گزشتہ میچ میں پاکستان کی جانب سے کپتان عبدالحسیم خان نے پہلے کوارٹر کے 10ویں منٹ میں گول کرکےٹیم کو برتری دلائی تھی۔
میزبان ٹیم نیوزی لینڈ نےبہترین انداز میں واپسی کرتے ہوئےدوسرے کوارٹر کےپہلے ہی منٹ میں جونٹی کینی کی مدد سےگیند کو جال میں پھینک کرمقابلہ برابرکردیاتھا۔
پاکستان نےمیچ کےدوران نیوزی لینڈ پراٹیک کرنے کا سلسلہ جاری رکھا اور دوسرے کوارٹر کےآٹھویں منٹ میں کپتان حسیم نےایک مرتبہ پھر قائدانہ کردار ادا کرتےہوئےگول اسکور کر کے پاکستان کو میچ میں برتری دلا دی تھی جو میچ کے آخر تک برقرار رہی۔
واضح رہےکہ پاکستان کی جانب سے اس فتح کے ساتھ ہی ہاکی ٹیم نے پانچ مچوں کی سیریز میں1-2 سے اپنے نام کرلی۔
اسلام آباد: ملک بھرمیں یوم پاکستان ملی جوش و جذبے سے منایا جا رہا ہے، وفاقی دارالحکومت میں دن کا آغاز اکتیس اور صوبائی دارالحکومتوں میں اکیس، اکیس توپوں کی سلامی سے ہوا۔
تفصیلات کےمطابق پاکستانی قوم آج یومِ پاکستان آج جوش وخروش سےمنارہی ہے۔ دن کاآغازوفاقی دارالحکومت میں اکتیس اور صوبائی دارالحکومتوں میں اکیس اکیس توپوں کی سلامی کے ساتھ ہوا۔
یوم پاکستان پرمساجد میں نمازِفجر کے بعد ملکی ترقی خوشحالی اوریکجہتی کے لیے خصوصی دعائیں کی گئیں۔
یومِ پاکستان کی پریڈ براہ راست دیکھئے
یوم پاکستان کی پروقارتقریب اورفوجی پریڈ
اسلام آباد کے شکرپڑیاں پریڈ گراؤنڈ کے مقام پر شاندار فوجی پریڈ جاری ہے، پریڈ میں تینوں مسلح افواج کےچاک وچوبند دستے پرفارمنس کا مظاہرہ کررہے ہیں۔
فوجی پریڈ کی اس پروقارتقریب میں مہمان خصوصی صدرپاکستان ممنون حسین، وزیر اعظم نوازشریف اورآرمی چیف جنرل قمرجاوید باجوہ سمیت دیگرمسلح افواج کے سربران، وزیر دفاع خواجہ آصف سمیت دیگررہنما اورغیرملکی سفیرشریک ہیں۔
چین کی تینوں مسلح افواج، سعودی عرب کی اسپیشل فورسز کا دستہ بھی اس پریڈ میں شریک ہے۔ تقریب میں ترکی کا ملٹری بینڈ ترانوں پرسربکھیرے گا۔ یومِ پاکستان کی اس خصوصی تقریب میں جنوبی افریقہ کی نیشنل ڈیفنس فورس کےسربراہ بھی شریک ہیں۔
پریڈ کے مہمان خصوصی صدر مملکت ممنون حسین صدارتی بَگھی پرسوار ہوکر پریڈ گراؤنڈ پہنچے، جہاں وزیر اعظم اور تینوں مسلح افواج کے سربراہان نے ان کا استقبال کیا۔
یوم پاکستان کی تقریب کا باقاعدہ آغاز قومی ترانے سے کیا گیا جس کے بعد صدر ممنون حسین نے جیپ میں سوارہوکرمسلح افواج کے دستوں کا معائنہ کیا۔
ایئر چیف مارشل کا شاندار فلائی پاسٹ
ایئر چیف مارشل سہیل امان نے شاندار فلائی پاسٹ کا مظاہرہ کرتے ہوئے صدر مملکت ممنون حسین کو سلامی دی۔ انہوں نے ایف 16 طیارے میں فلائی پاسٹ کا مظاہرہ بھی کیا۔
ایئرچیف مارشل کی جانب سے فلائی پاسٹ کے بعد پاک فضائیہ کے جے ایف تھنڈر طیاروں نے شاندار فلائی پاسٹ کا مظاہرہ کیا۔
صدرپاکستان کا فوجی پریڈ سے خطاب
صدرِمملکت نے یوم پاکستان کی تقریب سے خطاب کرتے ہوئےکہاکہ آپ سب کویوم پاکستان مبارک ہو،آج کا دن ایک عزم کی کہانی بیان کرتا ہے۔
تقریب سے خطاب کرتے ہوئے صدر ممنون حسین نےکہا کہ پاکستان اپنے تمام ہمسایہ ممالک سے پرامن دوستانہ تعلقات چاہتا ہے، مگر بھارت کی جارحیت نے خطے کے امن کو داؤ پرلگادیا ہے۔
صدرمملکت نے کہا کہ پاکستان بھارت کے ساتھ خطے میں امن اورترقی کے لیے مذاکراتکرنے کوتیار ہے، مگرساتھ ہی پاکستان مقبوضہ جموں وکشمیر کے عوام کی اخلاقی حمایت جاری رکھے گا۔
صدر پاکستان نے کہا کہ پاکستان گزشتہ کئی سال سے دہشت گردی کے خلاف لڑرہا ہے، پاک فوج اورعسکری و سیکیورٹی اداروں کی کوششوں سے امن کا قیام ممکن ہوا۔
صدرممنون حسین نے کہا کہ پاکستان معاشی ترقی کی جانب گامزن ہے، ہمارا مقصد علاقائی اورعالمی امن کو یقینی بنانا ہے۔
صدر مملکت نے یوم پاکستان کی تقریب میں شرکت پرچین، ترکی اور سعودی عرب کے فوجی دستوں کو خوش آمدید کہتے ہوئے کہا کہ دوست ممالک کی جانب سے فوجی دستوں کو بھیجنے پران کا شکریہ ادا کرتے ہیں۔
چین اورسعودی عرب کے دستوں کی سلامی
یوم پاکستان کی فوجی پریڈ میں سعودی عرب اور چین کےچاک وچوبند فوجی دستوں نے بھی سلامی دی۔
سعودی عرب کے فوجی دستےنےسب سے پہلےسلامی دی، جس کے بعد چین کے فوجی بینڈ نے پرفارمنس کا مظاہرہ کیا،چینی دستے میں بری وفضائی فوج کے اہلکار بھی شامل تھے۔
فوجی پریڈ میں چین اورسعودی عرب کی فوج کے اعلیٰ عہدیداروں نے بھی شرکت کی۔
پریڈ میں ترکی کے فوجی بینڈ ’مہتر‘ نے بھی پرفارمنس کا مظاہرہ کیا،ترکی کے بینڈ نے اپنے روایتی لباس اور سازوں کے ساتھ سلامی دی۔
ترکی کے مہتر فوجی بینڈ کی بنیادی 1299 میں رکھی گئی تھی،اس بینڈ کا شمار دنیا کےقدیم ترین بینڈز میں ہوتا ہے۔ترک بینڈ نے’جیوے جیوے پاکستان‘ کی دھن پر پرفارمنس کی۔
پریڈ کے دستے میں مین بیٹل ٹینک الخالد اور الضرار بھی شامل
الخالد ٹینک کیمیائی اور ایٹمی حملے سے بچنے کی صلاحیت رکھتا ہے،جبکہ الضرار ٹینک بھی جدید ترین ٹینکوں میں شمار ہوتا ہے۔
پریڈ کےدوران ریڈارز،ٹینکس اور فوجی انفارمیشن ٹیکنالوجی (آئی ٹی) سےمنسلک دیگر جدید روایتی اورغیر روایتی ہتھیاروں کو بھی پیش کیاگیا۔
یوم پاکستان کی فوجی پریڈ میں ساٹھ کلو میٹر تک ہدف کو نشانہ بنانے والے نصر میزائل، 900 کلو میٹر تک ہدف کو نشانہ بنانے والےشاہین میزائل پیش کیے گئے۔
اس کے علاوہ 1300 کلو میٹر تک روایتی اور غیر روایتی ہتھیاروں کے ساتھ ہدف کو نشانہ بنانے والے غوری میزائل سمیت کروز میزائل بابر اوردیگرمیزائل بھی پیش کیےگئے۔
روایتی اورغیر روایتی ہتھیاروں کےساتھ دشمن کو2700 کلومیٹر تک نشانہ بنانے والےشاہین تھری میزائل کو بھی پیش کیاگیا۔
چاروں صوبوں کی ثقافت کا عکس
یوم پاکستان کی پریڈ میں پاکستان کے چاروں صوبوں پنجاب، سندھ، خیبرپختونخوا اور بلوچستان سمیت گلگت بلتستان اور آزاد کشمیر کی روایتی ثقافتی پریڈ بھی پیش کی گئی۔
چاروں صوبوں کی جانب سے پیش کی جانے والی ثقافتی پریڈ میں جہاں علاقائی ثقافت کو پیش کیا گیا، وہیں صوبے کےمشہور اور تاریخی جگہوں کے ماڈل بھی پیش کیےگئے۔
آرمی ایوی ایشن کا فلائی پاسٹ
آرمی ایوی ایشن کی جانب سےفلائی پاسٹ میں کوبرا، پوما، فینک اور ایم آئی 17سمیت 19ہیلی کاپٹرز نے حصہ لیا۔سب سے پہلےدن اور رات کےدرمیان آپریشن کے لیےمفید کوبرا ہیلی کاپٹرز کے ذریعے فلائی پاسٹ کیا گیا۔
کوبراہیلی کاپٹرز کے بعد’فینک‘ ہیلی کاپٹرز کی جانب سے فلائی پاسٹ پیش کیا گیا، یہ ہیلی کاپٹرز فوج کی جانب سے فوری نقل و حرکت اور آپریشن کے لیے استعمال کیے جاتے ہیں۔
فوجی پریڈ کی تقریب میں سب سے آخر میں ایم آئی 17 ہیلی کاپٹرز کی جانب سے بھی فلائی پاسٹ کا مظاہرہ کیا گیا۔
پاک فضائیہ کے شیردل فارمیشن کا دلکش فضائی مظاہرہ
پریڈ کے دوران پاک فضائیہ کےشیردل فارمیشن نے دلکش فضائی مظاہرےمیں 6 طیارے شامل تھےجنہوں نے ایک ساتھ اور علیحدہ علیحدہ آسمان کی بلندیوں میں مظاہرہ کیا۔
پاک فضائیہ کے طیاروں نے مظاہرے کے دوران فضائوں میں لہراتے ہوئے رنگ بکھیرے اور پریڈ اوینیو سے باہر اور ہزاروں کلو میٹرز کی بلندی تک مظاہرہ کیا۔
واضح رہےکہ اسلام آباد میں پریڈ کے موقع پرسیکیورٹی اقدامات کے تحت جڑواں شہروں میں صبح 5 بجے سے دن 3 بجےتک موبائل فون سروس معطل رہے گی۔
نئی دہلی: یوم پاکستان کے موقع پر پاکستانی ہائی کمیشن میں پرچم کشائی کی تقریب ہوئی۔ تقریب کے موقع پر پاکستانی ہائی کمشنرعبد الباسط نے خطاب کرتے ہوئے کہا کہ پاکستان جموں و کشمیر سمیت تمام تصفیہ طلب مسائل کا حل چاہتا ہے۔
تفصیلات کے مطابق یوم پاکستان کے موقع پر نئی دہلی میں پاکستانی ہائی کمیشن میں پرچم کشائی کی تقریب ہوئی۔ پاکستانی ہائی کمشنر عبد الباسط نے یوم پاکستان کی تقریب سے خطاب کیا۔
انہوں نے بھارت میں موجود تمام پاکستانیوں کو یوم پاکستان کی مبارک باد دی۔
اپنے خطاب میں ان کا کہنا تھا کہ قائد اعظم کی قیادت میں مسلمانوں کو آزادی کے خواب کی تعبیر ملی۔ پاکستان کو فلاحی مملکت بنانے کی ذمہ داری ہم سب پر ہے۔
پاکستانی ہائی کمشنر نے وزیر اعظم کے پر امن ہمسائیگی وژن کی اہمیت کو اجاگر کیا۔ ان کا کہنا تھا کہ پاکستان جموں و کشمیر سمیت تمام تصفیہ طلب مسائل کا حل چاہتا ہے۔
بھارت سے تعلقات کے موضوع پر ان کا کہنا تھا کہ معنی خیز مذاکرات سے ہی دیرپا امن یقینی بنایا جا سکتا ہے۔ امن پاکستان اور بھارت دونوں کے مفاد میں ہے۔ بھارت سے مذاکرات کی خواہش کمزوری نہیں بلکہ ہماری طاقت ہے۔
اسلام آباد :یوم پاکستان کے موقع پر چینی صدر اور چینی وزیراعظم نے قوم کو مبارک باد پیش کرتے ہوئے پاک چین تعلقات میں مزید بہتری اور تعاون کا عندیہ ہے۔
تفصیلات کے مطابق چین کے صدر اور وزیراعظم نے یومِ پاکستان کے موقع پر دیے گئے خصوصی پیغام میں کہا ہے کہ پاکستان کی حکومت اور عوام کو مبارک باد پیش کرتے ہیں اور اس عزم کا اعادہ کرتے ہیں کہ پاک چین اقتصادی راہداری دونوں ممالک کے لیے فائدے مند ثابت ہوگی۔
چین کے صدر اور وزیراعظم نے پاکستانی قیادت کےنام یوم پاکستان کے پیغام میں کہا ہے کہ ’’پاکستانی قیادت کے عزم سے ملکی معیشت مستحکم ہوئی ہے اور قومی ترقی کے لیے پاکستان کی حکومت کی کوششوں پر خوشی ہے۔‘‘َ
چینی وزیراعظم نے نوازشریف کو خط ارسال کیے گئے اپنے خط میں کہا ہے کہ یوم پاکستان کے موقع پر پاکستانی قوم مبارک باد کی مستحق ہے جب کہ ملک کو ترقی کی راہ پر گامزن کرنے پر میاں نواز شریف کی حکومت کے اقدامات قابل ستائش ہیں کو یوم پاکستان کی اور دوست ملک ہونے کے ناطے چین نے ہمیشہ پاکستان کے ساتھ تعلقات کو اہمیت دی ہے۔
چین کے وزیراعظم نے مزید کہاکہ پاکستانی قیادت نے مختلف چیلنجز کا بھرپور مقابلہ کیا اس لیے پاک چین اقتصادی راہداری پر کام تیزی سے آگے بڑھ رہا ہے جو دونوں ملکوں کی معیشت، تجارت اور باہمی تعاون کے لیے مفید ہے۔
اسلام آباد: ’یوم پاکستان‘ کے موقع پر ٹریفک پولیس نے عوام کی آسانی کے لئے شیڈول جاری کردیا ہے، چیف ٹریفک آفیسر یوسف علی کا کہنا ہے کہ 23 مارچ کو 6 ڈی ایس پیز،21انسپکٹرز،انچارجز،348وارڈن افسران تعینات ہوں گے، 43 جونیئر ٹریفک وارڈنز خصوصی طورپرفرائض انجام دیں گے.
تفصیلات کے مطابق 23مارچ ’یوم پاکستان‘ کے موقع پرمحکمہ ٹریفک نے جڑواں شہروں کے لئے ٹریفک شیڈول جاری کردیا ہے.
چیف ٹریفک آفیسر یوسف علی نے کہا ہے کہ بھاری گاڑیوں کا داخلہ مکمل بند ہوگا، صبح 5 سے دن 2بجے تک فیض آباد سے آنے والا ٹریفک بند رہے گا، 6 ڈی ایس پیز،21انسپکٹرز،انچارجز،348وارڈن افسران تعینات ہوں گے، 43 جونیئر ٹریفک وارڈنز خصوصی طورپرفرائض انجام دیں گے.مری روڈ سے اسلام آباد جانے والے ڈبل روڈچوک کاراستہ اختیار کرسکیں گے۔
ٹریفک اسٹیڈیم روڈ سے نائنتھ ایونیو اسلام آباد موڑدیا جائے گا، راولپنڈی کے لیے نائنتھ ایونیو کے بجائےآئی جے پی روڈ استعمال کیاجاسکے گا، کٹاریاں، پنڈورہ چورنگی سے راولپنڈی کا راستہ اختیار کیا جاسکے گا، کرال چوک سےاسلام آباد ایکسپریس وے کے متبادل راستے کی تجویز دی ہے.
ٹریفک کھنہ پل روڈ سے چنگی 8، بند کھنہ روڈ اورصادق آباد سے نائنتھ ایونیو جاسکے گا، ٹریفک کھنہ پل سےلہترارڑروڈ،ترامڑی چوک اوراسلام آباد جاسکےگا، کشمیر،مظفرآباداورایبٹ آباد سے مری کے لیے متبادل روٹس کا خط پولیس حکام کو ارسال کردیا گیا ہے۔
خیال رہے کہ ٹریفک پولیس نے عوام کی آسانی کے لئے ٹریفک پلان اس لئے جاری کیا ہے کیونکہ یوم پاکستان کے موقع پر پاک مسلح افواج کی جانب سے ہر سال کی طرح رواں سال بھی مادر وطن کی سلامتی کے لئے خصوصی دعائی تقریب اور پاکستان کے وقار کی سر بلندی کی خاطر 23 مارچ کے لمحات کو یادگار بنانے کے لئے پریڈکا انتظام کیا گیا ہے.
اسلام آباد: یوم پاکستان کے موقع پر آرمی چیف جنرل قمر جاوید باجوہ نے قوم کے نام پیغام میں پاکستان کو پرامن ملک بنانے کا عزم کرتے ہوئے قوم سے تعاون کی درخواست کی.
تفصیلات کے مطابق یومِ پاکستان پرآرمی چیف جنرل قمرجاوید باجوہ نے قوم کو نام پرعزم پیغام دیتے ہوئے کہا کہ پاکستان کو فسادیوں سے پاک کرکے رہیں گے، یہ ہم سب کا پاکستان ہے، 23 مارچ 1940 کوہم نے پاکستان بنانےکا عہد کیا اورہم کامیاب ہوئے۔
انہوں نے پاکستان کے عوام کو مخاطب کرتے ہوئے کہا کہ 23 مارچ 1940 کے تناظر میں آئیں اس سال 23 مارچ کو یہ عہد کریں، پاکستان کو پرامن ملک بنائیں گے۔
واضح رہے کہ ملک میں 23 مارچ کی تیاریاں بھرپورطریقے سے جاری ہیں۔ آئی ایس پی آر کا کہنا ہے کہ یوم پاکستان کے حوالے سے تقریب کی تیاریاں بھرپوراندازمیں کی جارہی ہیں، اس سال یوم پاکستان کی پریڈ میں چین اورسعودی فورسزکے دستے خصوصی طور پرشرکت کریں گے.
ڈی جی آئی ایس پی آر میجرجنرل آصف غفور نے سماجی ویب سائٹ ٹویٹرپراپنے ٹویٹ کے ذریعے باخبرکیا تھا کہ یوم پاکستان کے موقع پرہونے والی پریڈ میں پاک فوج کے ساتھ پریڈ پہلی مرتبہ چینی فوجی دستے بھی شریک ہوں گے جبکہ پریڈ میں ترک ملٹری بینڈ بھی حصہ لے گا۔
Pak Day Parade 23rd Mar 2017. Chinese Army Troops and Turkish Military Band will participate in the Parade. pic.twitter.com/BzwfPXcgK6
یوم پاکستان والے دن ترکی کا فوجی بینڈ مہترن بھی پریڈ میں پرفارم کرے گا، جبکہ جنوبی افریقا کی نیشنل ڈیفنس فورس کے سربراہ بھی پریڈ دیکھیں گے۔
اس حوالے سے آئی ایس پی آر نے یوم پاکستان کی مناسبت سے ایک نیا ملی نغمہ ’’ہم سب کا پاکستان‘‘ جاری کردیا ہے جسے معروف گلوکار راحت فتح علی خان نے گایا ہے.
23 Mar…
We are resilient Pakistani Nation..
No power can undo ‘Our Pakistan’
ھم سب کا پاکستان
Pakistan Zindabadhttps://t.co/XCvbbFF5dA
