مظفرآباد: وزیراعظم شہباز شریف کا کہنا ہے کہ ہمیں اپنے گریبانوں میں جھانکنا ہوگا،باتوں اور نعروں سے نہیں اپنے عمل سے کشمیر کو آزاد کرانا ہوگا۔
تفصیلات کے مطابق یوم یکجہتی کشمیر پر آزاد کشمیر کی قانون ساز اسمبلی سے خطاب میں وزیراعظم شبہاز شریف نے کہا کہ وزیراعظم آزاد کشمیرسردار الیاس کی دعوت پر آج یہاں آیا ہوں، آج تمام جماعتوں کا مسئلہ کشمیر پر یک آواز ہونا بھارت کیلئے مؤثر پیغام ثابت ہوگا، ہمارا یہ اتحاد دیکھ کربھارت پریشان ہوگا۔
وزیراعظم نے قائداعظم کا قول دہراتے کہا کہ’ کشمیر پاکستان کی شہ رگ ہے’، کشمیریوں کو اقوام متحدہ کی قراردادوں کے مطابق حق خود ارادیت دلوایا جائے، اس کے لئے ہمیں اپنے گریبانوں میں جھانکنا ہوگا،باتوں اور نعروں سے نہیں بلکہ اپنے عمل سے کشمیر کو آزاد کرانا ہوگا، اس کے لئے ہمیں اپنی صفوں میں اتحاد پیدا کرنا ہوگا اور معاشی استحکام لانا ہوگا۔
انہوں نے کہا کہ آج کوئی سیاسی بات نہیں کرونگا،معاشرے میں تقسیم درتقسیم پیدا ہوچکی ہے، اختلافات کو بھلا کر فیصلہ کرلیں کہ کشمیریوں کو ان کا حق دلانا ہے، ہمیں اپنی صفوں میں اتحاد پیدا کرنا ہوگا،معاشی استحکام لانا ہوگا اور کشمیر پالیسی میں مزید جدت اور قوت پیدا کرنی ہوگی۔
یہ بھی پڑھیں: کب تک ہم یہ دن منائیں گئے، کشمیریوں کو اب آزادی ملنی چاہیے، مشعال ملک
وزیراعظم کا مزید کہنا تھا کہ ماضی میں رہنے کے بجائے آگے بڑھنا چاہئے،کشمیری آج پاکستان کی جانب دیکھ رہے ہیں، کشمیریوں کا قصور یہ ہے کہ وہ مسلمان ہیں یقین رکھیں کہ کشمیریوں کی جذبہ آزادی کی جدوجہد جلد رنگ لائےگی، وہ دن دور نہیں جب بھارت کے ایک ایک ظلم کا حساب لیا جائے گا۔
