اسلام آباد : یوٹیلیٹی اسٹورز کے ملازمین کے لیے 30 ارب روپے سے زائد کے پیکج کی منظوری دے دی گئی ، ملازمین کو رضاکارانہ پیشن ملے گی۔

تفصیلات کے مطابق اقتصادی رابطہ کمیٹی (ای سی سی) نے یوٹیلیٹی اسٹورز کارپوریشن کی بندش کے منصوبے کی منظوری دے دی ہے جبکہ ملازمین کے لیے 30.2 ارب روپے کا خصوصی پیکج بھی منظور کرلیا گیا۔

وزارت خزانہ کے اعلامیے میں کہا گیا کہ وزیر خزانہ محمد اورنگزیب کی زیر صدارت ای سی سی کے اجلاس میں فیصلہ کیا گیا کہ یوٹیلیٹی اسٹورز کی بندش کے ساتھ ملازمین کو رضاکارانہ پینشن (گولڈن ہینڈ شیک) کے طور پر 30 ارب روپے سے زائد فراہم کیے جائیں گے، وزارت صنعت نے ملازمین کے لیے یہ پیکج تجویز کیا تھا۔

اعلامیے میں کہنا تھا کہ یوٹیلیٹی اسٹورز کارپوریشن کے اثاثے رواں مالی سال کے دوران فروخت کیے جائیں گے اور ای سی سی نے ہدایت دی کہ یہ عمل شفاف انداز میں مکمل کیا جائے۔

اجلاس میں کابینہ کمیٹی برائے سرکاری اداروں نے نیسپاک کے بورڈ آف ڈائریکٹرز کی ازسرِ نو تشکیل کی بھی منظوری دی گئی۔

نئے بورڈ کے لیے جاوید اسلم، محمد علی، پیر سعد احسن الدین، عمر حسن اور شہانہ احمد علی کے ناموں کی منظوری دی گئی ہے۔

وزارت خزانہ کے مطابق امیدواروں کا انتخاب ان کے پیشہ ورانہ تجربے اور قابلیت کی بنیاد پر کیا گیا ہے اور کمیٹی نے ہدایت کی کہ نامزدگیوں کا عمل بروقت اور مربوط انداز میں مکمل کیا جائے۔

اجلاس میں وفاقی وزراء ریاض حسین پیرزادہ، جام کمال خان سمیت دیگر حکام نے بھی شرکت کی۔

میرپور خاص : یوٹیلیٹی اسٹورز کارپوریشن میں خورد برد اور کرپشن میں ملوث 10 ملازمین کو سزا سنا دی گئی۔

تفصیلات کے مطابق یوٹیلیٹی اسٹورز کارپوریشن میں کروڑوں روپے کی خورد برد کے معاملے پر کرپشن کے مقدمے میں ملوث 10 ملازمین کو عدالت نے سزا سنا دی۔

ایف آئی اے نے بتایا کہ ملزمان کے خلاف 2024 میں مقدمہ درج کیا گیا تھا، جس کی سماعت اسپیشل جج سینٹرل حیدرآباد اشوک کمار دو دیجا کی عدالت میں ہوئی، مقدمے میں دلاور خان، علی دینو سمیت 10 افراد نامزد تھے۔

ایف آئی اے کی تفتیشی رپورٹ میں کہنا تھا  ملزمان نے 56 لاکھ 97 ہزار 133 روپے کی خورد برد کی تھی تاہم ایف آئی اے نے خورد برد شدہ رقم برآمد کر کے خزانے میں جمع کروا دی۔

عدالت نے جرم ثابت ہونے پر تمام ملزمان کو 2 ہزار روپے فی کس جرمانے کی سزا سنائی، مقدمے کی پیروی ایف آئی اے اسسٹنٹ ڈائریکٹر لیگل سلمیٰ بگھیو نے کی، جبکہ تفتیشی عمل سب انسپکٹر جہانگیر مصطفیٰ نے مکمل کیا۔

اسلام آباد : یوٹیلیٹی اسٹورز کارپوریشن میں کرپشن اور بے ضابطگیوں کا انکشاف ہوا، آڈٹ رپورٹ میں ہوشربا حقائق سامنے آگئے۔

تفصیلات کے مطابق یوٹیلیٹی اسٹورز کارپوریشن میں بڑے پیمانے پر کرپشن اور بے ضابطگیوں کا بھانڈا پھوٹ گیا، آڈٹ رپورٹ میں انکشاف ہوا ہے کہ ہری پور میں یوٹیلیٹی اسٹورز کے 99 لاکھ روپے مالیت کا سامان متعلقہ گارڈز کی غفلت کے باعث چوری ہوا۔

رپورٹ میں کہنا تھا کہ یوٹیلیٹی اسٹورز نے 16.4 ارب روپے کی غیر معیاری امپورٹڈ گندم خریدی جبکہ 1.6 ارب روپے کا غیر معیاری آٹا عوام کو فروخت کیا گیا۔

مزید یہ کہ جولائی 2023 میں مقامی کے بجائے مہنگی امپورٹڈ گندم خریدنے سے قومی خزانے کو 1.3 ارب روپے کا نقصان اٹھانا پڑا۔

آڈٹ رپورٹ میں یہ بھی انکشاف ہوا کہ 73 ہزار ٹن غیر معیاری آٹا فراہم کرنے والی 11 فلور ملوں پر صرف ایک لاکھ 38 ہزار روپے جرمانہ عائد کیا گیا، جبکہ چند یوٹیلیٹی اسٹورز ملازمین 74 کروڑ روپے کی چوری، فراڈ اور نان ریکوری سمیت دیگر بے ضابطگیوں میں ملوث پائے گئے۔

سبسڈی کے نام پر عوام کو ریلیف دینے کے بجائے یوٹیلیٹی اسٹورز میں اشیائے ضروریہ عام مارکیٹ سے بھی مہنگی بیچی گئیں۔

رپورٹ کے مطابق صارفین سے 17 کروڑ 92 لاکھ روپے اضافی وصول کیے گئے اور سستا آٹا فراہم کرنے کے بجائے مہنگا بیچا گیا۔

اسلام آباد : یوٹیلیٹی اسٹورز کارپوریشن نے رمضان سے قبل سیل اسٹاف کے خصوصی الاؤنس میں 200 فیصد تک اضافہ کردیا۔

تفصیلات کے مطابق یوٹیلیٹی اسٹورز کارپوریشن نے سیل اسٹاف الاؤنس میں اضافہ کردیا ، ذرائع نے بتایا کہ رمضان سے قبل سیل اسٹاف کے خصوصی الاؤنس میں 200 فیصد تک اضافہ کردیا گیا۔

ذرائع کا کہنا تھا کہ یوٹیلیٹی اسٹورز کارپوریشن کے بورڈ نے الاؤنس میں اضافے کی منظوری دی، سیل اسٹاف کے الاؤنس میں اضافے کا اطلاق یکم مارچ 2024 سے ہوگا۔

ذرائع نے بتایا کہ ڈیلوری کلرک کا الاؤنس ایک ہزار سے بڑھا کر ماہانہ 2 ہزار روپے کردیا گیا جبکہ کیشئر کا کیش ہینڈلنگ الاؤنس ایک ہزار سے بڑھا کر ماہانہ 2 ہزار روپے مقرر کردیا ہے۔

ذرائع نے مزید کہا کہ سپر مارکیٹ میں تعینات ہر ممبر کا خصوصی الاؤنس 500 سے بڑھا کر 1500روپے کر دیا گیا ہے۔

اسلام آباد : یوٹیلیٹی اسٹورز کارپوریشن نے 40 ہزار میٹرک ٹن چینی کی خریداری کیلئے نیا ٹینڈر جاری کردیا ہے، چینی کااسٹاک تقریباً ڈھائی ہزارمیٹرک ٹن رہ گیا ہے۔

تفصیلات کے مطابق یوٹیلیٹی اسٹورز کارپوریشن کے ایک اور ممکنہ چینی بحران سے بچنے کے لئے اقدامات سامنے آئے، ذرائع نے بتایا کہ یوٹیلیٹی اسٹورزکارپوریشن نے چینی کی خریداری کیلئے نیا ٹینڈر جاری کردیا ہے۔

ذرائع کا کہنا ہے کہ اوپن ٹینڈر 40 ہزار میٹرک ٹن چینی کی خریداری کیلئے جاری کیا گیا، ٹینڈر کے تحت لفافہ بندبولیاں 13اکتوبرکو طلب کرلیا اور بولیاں اسی روزکھولی جائیں گی۔

ذرائع یوٹیلیٹی اسٹورز نے کہا ہے کہ چینی کااسٹاک تقریباًڈھائی ہزارمیٹرک ٹن رہ گیا ہے، خریداری نہ کی گئی توچینی کےایک اوربحران کا خدشہ پیدا ہوگا اور کارپوریشن کواس وقت چینی کی خریداری میں مشکلات کا سامنا ہے۔

،ذرائع یوٹیلیٹی اسٹورز کے مطابق حالیہ ٹینڈرزمیں چینی کی خریداری میں کامیابی حاصل نہیں ہوسکی ہے ، یوٹیلیٹی اسٹورزنےچینی کا حالیہ ٹینڈر مہنگی بولی کے باعث منسوخ کردیا تھا۔

یوٹیلیٹی اسٹورز نےآخری ٹینڈر میں 130 روپے فی کلو کےحساب سے چینی خریدی تھی۔