تہران : ایران کے میزائل سے یوکرین مسافر طیارے کی تباہی کی ویڈیو بنا نے والے شخص کو گرفتار کرلیا گیا ، گرفتار شخص کو نیشنل سیکیورٹی کو نقصان پہنچانے کے الزام میں مقدمات کا سامنا کرنا پڑ سکتا ہے۔
تفصیلات کے مطابق ایرانی حکام نے میزائل سے یوکرین مسافر طیارے کو تباہ کرنے کی ویڈیو بنانے والے شخص کو گرفتار کر لیا، گرفتار شخص نے ویڈیو بنا کر سوشل میڈیا پر پوسٹ کی تھی ، یہ کہا جا رہا ہے کہ گرفتار کیے گئے شخص کو نیشنل سیکیورٹی کو نقصان پہنچانے کے الزام میں مقدمات کا سامنا کرنا پڑ سکتا ہے۔
گذشتہ روز امریکی جریدے نیویارک ٹائمز نے دعویٰ کیا تھا کہ ایران کی جانب سے یوکرین کے طیارے کو ایک نہیں بلکہ دو میزائلوں سے نشانہ بنا یا گیا تھا، جاری ویڈیو میں دیکھا جاسکتا تھا کہ طیارے کو ایرانی فوجی اڈے سے صرف 4 میل دور نشانہ بنایا گیا، پہلے ایک میزائل داغا گیا، اس کے بعد فائر کیے گئے میزائل نے طیارے کو نشانہ بنا۔
مزید پڑھیں : ایران نے یوکرین کے مسافر طیارے پر کتنے میزائل داغے؟ نئی ویڈیو سامنے آگئی
اس سے قبل ایران کے میزائل سے تباہ ہونے والے یوکرین کے مسافر طیارے کے حوالے سے ایرانی عدالتی ترجمان نے کہا تھا کہ یوکرین طیارے کے تباہی میں ملوث متعدد افراد کو گرفتارکر لیا گیا ہے۔
یاد رہے ایرانی صدر حسن روحانی کا کہنا تھا طیارے کی تباہی جیسے المناک واقعےکوبرادشت کرنابہت مشکل ہے، واقعے میں ملوث تمام ذمہ دار افراد کو سزائیں دی جائیں گی، خصوصی عدالت اس واقعے کی تحقیقات کرے گی، ایسا نہیں ہے کہ ایک شخص نے ٹریگر دبایا ہو اس واقعے میں اور لوگ بھی ملوث ہیں۔
خیال رہے ایرانی ایرواسپیس کمانڈر علی حاجی زادے نے یوکرین طیارےکی تباہی کی ذمےداری قبول کرتے ہوئے کہا تھا واقعہ پرقوم سے معافی مانگتے ہیں ، یوکرین طیارے کو غلطی سے کروز میزائل سمجھا گیا۔
واضح رہے 8 جنوری کو یوکرین کا طیارہ کو تہران میں تباہ ہوا تھا، جس میں 176 افراد ہلاک ہوگئے تھے ، ہلاک ہونے والوں میں ایرانی، کینیڈین اور دیگر ممالک کے شہری شامل تھے۔
