Tag: یوکرین

لندن: یوکرین F-16 جنگی طیاروں کی ضرورت پر زور دے رہا ہے تاہم مغربی اتحادیوں نے اس سے منہ پھیر لیا ہے۔

تفصیلات کے مطابق برطانوی میڈیا نے کہا ہے کہ مغربی اتحادی یوکرین کو F-16 اور دیگر لڑاکا طیاروں‌ کی فراہمی کے خیال سے پیچھے ہٹ گئے ہیں۔

دی گارڈین نے رپورٹ کیا کہ ’’ایسا لگتا ہے کہ گزشتہ 24 گھنٹوں کے دوران مغربی اتحادی یوکرین کو F-16 اور دیگر جنگی طیاروں کی فراہمی سے پیچھے ہٹ گئے ہیں۔‘‘

برطانیہ نے یہ بھی کہا ہے کہ یوکرین کو مغربی جنگی طیاروں کی فراہمی عملی نہیں ہے، ڈاؤننگ اسٹریٹ کے ترجمان نے کہا کہ ’’یہ جدید ترین پارٹس پر مشتمل طیارے ہیں، انھیں یوکرین بھیجنا ہمارے خیال میں عملی نہیں ہے۔‘‘

روس نے یوکرینی گاؤں پر قبضہ کر لیا

ترجمان نے مزید کہا کہ وزیر اعظم رشی سناک یہ سمجھتے ہیں کہ اس جنگ میں ’طویل تعطل‘ سے روس کو فائدہ ہوگا، اس لیے وہ یوکرین کی تیز تر مدد کے حامی ہیں۔

یاد رہے کہ امریکی صدر جو بائیڈن سے جب پیر کو وائٹ ہاؤس میں پوچھا گیا کہ کیا امریکا یوکرین کو F-16 طیارے فراہم کرے گا، تو انھوں نے محض ’نہیں‘ میں جواب دیا۔

یوکرینی صدر ولودیمیر زیلنسکی کے سب سے سینئر مشیر نے پیر کو کہا کہ پولینڈ یوکرین کو ایف سولہ لڑاکا طیاروں کی فراہمی کے لیے تیار ہے۔ آندری یرماک نے کہا کہ وارسا سے موصول ٹیلی گرام میں یوکرین کو اس حوالے سے مثبت اشارے ملے ہیں۔

ادھر یوکرین کا کہنا ہے کہ وہ جنگی طیاروں کے سلسلے میں لابنگ جاری رکھے گا، یوکرین کا کہنا ہے کہ مغرب نے ٹینکوں کی فراہمی کے سلسلے میں بھی پہلے انکار کیا تھا، یوکرینی وزیر دفاع اولیکسی ریزنکوف نے پیرس کے دورے پر کہا کہ ’’شروع میں ہر قسم کی امداد ’نہیں‘ کے مرحلے سے گزر چکی ہے۔‘‘

یوکرینی وزیر خارجہ دمیترو کولیبا کے مطابق یوکرین کو توقع ہے کہ 12 ممالک کے اتحاد سے انھیں ترسیل کی پہلی کھیپ میں 120 سے 140 تک ٹینک ملیں گے، پہلی قسط میں جرمن لیوپرڈ 2، برٹش چیلنجر 2 اور یو ایس ایم 1 ابرامز ٹینک شامل ہوں گے۔ انھوں نے کہا کہ یوکرین فرانسیسی لیکرک ٹینکوں کی سپلائی کو بھی بہت اہمیت دے رہا ہے۔

واضح رہے کہ یوکرین کے ساتھ اعلانیہ طور پر جن بھاری ٹینکوں کا وعدہ کیا گیا ہے ان کی تعداد 321 ہے۔