Tag: یوکرین

کیف: یوکرین نے کہا ہے کہ اس کے چرنوبل نیوکلیئر پاور پلانٹ پر روسی ڈرون سے حملہ ہوا ہے، جس سے پلانٹ کے حفاظتی خول کو جزوی نقصان پہنچا ہے۔

غیر ملکی میڈیا رپورٹس کے مطابق یوکرین کے صدر وولودیمیر زیلنسکی نے دعویٰ کیا ہے کہ ایک روسی ڈرون نے چرنوبل کے جوہری ری ایکٹر پر حفاظتی شیلڈ کو نشانہ بنایا ہے۔

یوکرینی صدر نے دعویٰ کیا ہے کہ گزشتہ شب ایک روسی ڈرون چرنوبل نیوکلیئر پاور پلانٹ کے حفاظتی خول سے ٹکرایا، حفاظتی خول چرنوبل نیوکلیئر پاور پلانٹ سے نکلنے والی تابکاری کو روکنے کے لیے تیار کیا گیا ہے، حادثے کے مقام پر رات بھر کی آگ لگی رہی تاہم اب اس پر قابو پا لیا گیا ہے۔

اقوام متحدہ کے نیوکلیئر واچ ڈاگ (IAEA) نے کہا ہے کہ چرنوبل کے اندر اور باہر تابکاری کی سطح معمول کے مطابق اور مستحکم تھی، تاہم بعد میں پلانٹ کے چیف انجینئر اولیگزینڈر ٹیٹرچوک نے کہا کہ تابکار مادوں کے رسنے کا امکان ’’اب موجود ہے۔‘‘

یوکرینی فضائیہ کے مطابق گزشتہ شب روس نے 133 ڈرونز سے یوکرین کے شمالی علاقوں پر حملہ کیا، جہاں چرنوبل نیوکلیئر پلانٹ واقع ہے۔ تاہم روس نے چرنوبل پر حملہ کرنے والے کسی بھی دعوے کی تردید کی ہے، اور کہا ہے کہ اس کی فوج یوکرین کے جوہری ڈھانچے پر حملہ نہیں کرتی اور ’’ایسا کوئی بھی دعویٰ حقیقت سے مطابقت نہیں رکھتا۔‘‘

انٹرنیشنل اٹامک انرجی ایجنسی، جو دنیا بھر میں جوہری حفاظت پر نظر رکھتی ہے، نے ایک بیان میں کہا کہ فائر سیفٹی کے عملے اور گاڑیوں نے دھماکے کے بعد چند منٹوں کے اندر اندر آگ پر قابو پانے کی کارروائی شروع کر دی تھی، نیز واقعے میں کوئی جانی نقصان نہیں ہوا۔

ٹرمپ اور پیوٹن ملاقات کی میزبانی، سعودی عرب کا اظہار مسرت

یاد رہے کہ 1986 میں چرنوبل میں ہونے والے ایک تباہ کن دھماکے کے بعد ہوا میں تابکار مادّے پھیل گئے تھے، جس سے پورے یورپ میں صحت عامہ کی ہنگامی صورت حال پیدا ہو گئی تھی، اس واقعے کی وجہ سے آس پاس کی آبادی میں کینسر کی شرح میں اضافہ ہو گیا تھا۔ اس پلانٹ پر ایک ریڈی ایشن شیلڈ بنائی گئی ہے جو 275 میٹر چوڑی اور 108 میٹر لمبی ہے اور اس کی تعمیر پر 1.6 ارب ڈالر لاگت آئی ہے۔