Tag: یو این اجلاس

  • آدابِ مجلس نہیں جانتے تو نکل جاؤ، اسرائیلی سفیر کو یو این اجلاس سے باہر نکال دیا گیا

    آدابِ مجلس نہیں جانتے تو نکل جاؤ، اسرائیلی سفیر کو یو این اجلاس سے باہر نکال دیا گیا

    نیویارک: اقوام متحدہ میں اسرائیل کے سفیر جلعاد أردان کو جنرل اسمبلی میں ایرانی صدر کے خطاب کے دوران رکاوٹ ڈالنے کی کوشش مہنگی پڑ گئی۔

    غیر ملکی میڈیا رپورٹس کے مطابق اقوام متحدہ کے سیکیورٹی اہلکاروں نے منگل کو اقوام متحدہ میں اسرائیل کے سفیر کو ایرانی صدر ابراہیم رئیسی کی تقریر پر احتجاج کرنے کے لیے جنرل اسمبلی ہال سے باہر نکالنے کے فوراً بعد حراست میں لے لیا۔

    ابراہیم رئیسی جنرل اسمبلی سے خطاب کر رہے تھے کہ جلعاد أردان نے ان کی تقریر کے دوران خلل ڈالتے ہوئے شور شرابا کیا، اور پوسٹر لہرایا، جسے ویڈیو میں بھی دیکھا جا سکتا ہے، تاہم ایرانی صدر نے اسرائیلی سفیر کی حرکت کا نوٹس لیے بغیر سکون سے تقریر جاری رکھی۔

    اسرائیلی سفیر کی حرکت پر فوری طور پر سیکیورٹی کو طلب کیا گیا، جس نے انھیں حراست میں لے کر اسمبلی سے باہر نکال دیا، اسرائیلی سفیر کو جنرل اسمبلی اجلاس سے نکالنے کی ویڈیو سوشل میڈیا پر وائرل ہو گئی ہے۔

    غیر ملکی میڈیا کا کہنا ہے کہ یہ واضح نہیں تھا کہ سفیر کو کیوں حراست میں لیا گیا تھا، تاہم بعد میں انھیں رہا کر دیا گیا۔

  • یو این اجلاس: وزیر اعظم نے کرونا کے لیے 10 نکاتی پلان پیش کر دیا

    یو این اجلاس: وزیر اعظم نے کرونا کے لیے 10 نکاتی پلان پیش کر دیا

    اسلام آباد: وزیر اعظم عمران خان نے اقوام متحدہ کے خصوصی اجلاس سے ورچوئل خطاب میں کرونا سے نمٹنے کے لیے 10 نکاتی ایمرجنسی پلان پیش کر دیا۔

    تفصیلات کے مطابق وزیر اعظم پاکستان نے یو این خصوصی اجلاس سے ورچوئل خطاب میں کہا کہ کرونا وبا کے خاتمے تک غریب ملکوں کے قرض معطل اور پس ماندہ ملکوں کے قرضے معاف کیے جائیں۔

    وزیر اعظم نے کہا قرضوں میں ریلیف کرونا کے خاتمے تک جاری رکھا جائے، اور امیر ملکوں کی جانب سے مدد کے وعدوں پر عمل درآمد کرایا جائے۔

    انھوں نے کہا قرضوں کی ری اسٹرکچرنگ کی جائے، کم شرح سود پر قلیل المدتی قرضے فراہم کیے جائیں، کرونا سے نمٹنے کے لیے 500 ارب ڈالر کا خصوصی پیکج مختص کیا جائے۔

    انھوں‌ نے مزید کہا کہ دوسری جنگ عظیم کے بعد کرونا وائرس نے دنیا میں بڑی تباہی مچائی ہے، امیر ملکوں نے معیشت بچانے کے لیے ٹریلین ڈالرز خرچ کیے، لیکن ترقی پذیر ملک معیشت کو سنبھالا دینے کے قابل نہیں ہیں۔

    وزیر اعظم نے ترقی پذیر ملکوں سے دولت کی غیر قانونی منتقلی فوری روکنے کا بھی مطالبہ کیا، انھوں نے کہا کرپٹ سیاست دانوں اور مجرموں کی جانب سے چرائے گئے اثاثوں کو فوری طور پر ان ملکوں کو واپس کیا جائے ۔

    عمران خان نے کہا کرونا کی پہلی لہر میں ہماری حکمت عملی کامیاب رہی، پاکستان میں کرونا پر قابو پانے کے لیے اسمارٹ لاک ڈاؤن متعارف کرایا گیا۔