اقوام متحدہ کے سیکریٹری جنرل انتونیو گوتریس نے کہا ہے کہ غزہ میں فلسطینی عوام قحط اور شدید انسانی بحران کا سامنا کررہے ہیں۔
تفصیلات کے مطابق سیکریٹری جنرل یو این نےغزہ کی صورتحال کو جنگ کا سب سے ظالمانہ مرحلہ قرار دیا ہے، انتونیو گوتریس نے کہا کہ اسرائیل کی 11 ہفتے کی ناکہ بندی کے باعث فلسطینی بھوکے مررہے ہیں، غزہ کو روزانہ 500 امدادی ٹرکوں کی ضرورت ہے۔
اقوام متحدہ سیکریٹری جنرل انتونیو گوتریس نے کہا کہ غزہ کی 80 فیصد آبادی کو اسرائیلی فوجی زون یا انخلا کے احکامات کا سامنا ہے۔
انھوں نے کہا کہ غزہ میں امدادی تنظیموں کےلیے رسائی خطرناک اور غیرمستحکم ہے، غزہ میں فوری، محفوظ اور مستقل امداد کی رسائی کی ضرورت ہے۔
دریں اثنا اسرائیل میں غزہ جنگ کیخلاف مظاہروں میں اضافہ ہوگیا، 600 افراد نے سرحد پر احتجاج کیا، مظاہرین نے نعرے لگائے کہ کوئی فوجی کوئی قبضہ نہیں، غزہ جنگ فوری بند ہونی چاہیے۔
خبرایجنسی نے بتایا کہ غزہ میں فوجی خدمات سے انکار کرنے والوں کی بھی گرفتاریاں کی جارہی ہیں، اسرائیلی حکومت کی جنگی حکمت عملی کےخلاف عوامی ردعمل بڑھ رہا ہے۔
اسرائیلی حکومت کی جنگی حکمت عملی پر اسرائیلی عوام سیاسی مفادات کا الزام لگا رہے ہیں، جنگ بندی کے خاتمے اور تازہ فوجی کارروائیوں کے بعد اسرائیل میں احتجاج میں شدت آگئی ہے۔
https://urdu.arynews.tv/cruelty-to-palestinians-silent-spectator-antonio-guterres/
