اسلام آباد: وزیر خارجہ شاہ محمود قریشی سے متحدہ عرب امارات کے ہم منصب نے فون پر رابطہ کر کے ان کی خیریت دریافت کی اور کرونا وائرس کی وبا سے متعلق تبادلہ خیال کیا۔
اے آر وائی نیوز کے مطابق اماراتی وزیر خارجہ عبداللہ بن زاید النہیان نے پاکستان کے وزیر خارجہ شاہ محمود قریشی سے فون پر رابطہ کر کے کرونا وبا سے متعلق صورت حال پر تبادلہ خیال کیا، اماراتی وزیر خارجہ نے کہا کہ آپ کی علالت کی خبر سن کر بہت تشویش ہوئی تھی، خوشی ہے کہ آپ روبہ صحت ہیں۔
اماراتی وزیر خارجہ نے شاہ محمود سے کہا میں آپ کی آواز سننے کا متمنی تھا، کرونا سے متاثر ہونے کا سن کر تشویش ہو گئی تھی۔ فون کر کے خیریت دریافت کرنے پر شاہ محمود قریشی نے اماراتی ہم منصب کا شکریہ ادا کیا۔
وزیر خارجہ نے یو اے ای میں کرونا کے خلاف حکومتی کاوشوں کو سراہا، اور انھیں پاکستان میں کرونا کے خلاف کیے جانے والے اقدامات سے آگاہ کیا، شاہ محمود قریشی نے پاکستان کے لیے طبی معاونت کی فراہمی پر اماراتی ہم منصب کا شکریہ بھی ادا کیا۔
وزیر خارجہ نے مریخ کے لیے پہلے خلائی مشن پر اماراتی وزیر خارجہ کو مبارک باد دی۔ اماراتی وزیر خارجہ نے کہا کہ یو اے ای عالمی تعاون سے کرونا ویکسین کی تیاری میں مصروف ہے۔
دونوں وزرائے خارجہ نے صورت حال معمول پر آنے کے بعد جلد ملاقات پر اتفاق کیا۔
