Tag: یو اے ای

ابوظبی: متحدہ عرب امارات نے اقامے کے اجرا و تجدید اور شناختی کارڈ کے لیے نیا فارم جاری کر دیا ہے۔

تفصیلات کے مطابق یو اے ای نے اقامے کے اجرا و تجدید اور شناختی کارڈ کے لیے ایک ہی فرام متعارف کرا دیا ہے، ان دونوں کاموں کے لیے اب ایک ہی فارم ہوگا۔

خیال رہے کہ اس سے قبل اقامے کے اجرا و تجدید اور شناختی کارڈ کے فارم الگ ہوا کرتے تھے، اب دونوں کام ایک ہی فارم میں جمع کر دیے گئے ہیں، اس فیصلے پر پیر 11 اپریل سے عمل درآمد ہوگا۔

یو اے ای میں شناختی کارڈ، قومیت، کسٹم اور سرحدی سیکیورٹی کے وفاقی ادارے نے امارات میں مقیم غیر ملکیوں کے لیے اقامہ اسٹیکر کا اجرا ختم کر کے اس کی جگہ اقامہ شناختی کارڈ متعارف کرایا ہے۔

اقامہ کے ڈائریکٹر جنرل میجر جنرل سعید الراشدی نے کہا کہ اقامہ اسٹیکر کے اجرا کی منسوخی اور اس کی جگہ اماراتی قومی شناختی کارڈ کے اجرا کا فیصلہ متعدد سہولتوں کے پیکیج کے تحت کیا گیا ہے۔

وفاقی ادارے کے مطابق اسٹیکر کی منسوخی کا فیصلہ کابینہ نے کیا، اس کا مقصد اقامے کے اجرا و تجدید میں آسانی پیدا کرنا ہے، اسمارٹ ایپ کی بدولت ای شناختی کارڈ آسانی سے حاصل کیا جا سکے گا۔

مقیم غیر ملکیوں کے لیے اماراتی شناختی کارڈ کے نئے ایڈیشن میں اقامہ اسٹیکر والی جملہ معلومات موجود ہوں گی۔

دبئی: متحدہ عرب امارات میں تنخواہوں کی ادائیگی میں تاخیر کرنے پر جرمانوں کا اعلان کیا گیا ہے۔

تفصیلات کے مطابق متحدہ عرب امارات کی وزارت انسانی وسائل اور ایمریٹائزیشن موہری نے حکم جاری کیا ہے کہ وہ آجر جو تنخواہیں تاخیر سے ادا کرتے ہیں، جرمانوں کا سامنا کریں گے۔

آجروں کو تنخواہوں کی عدم ادائیگی کی صورت میں تیسرے اور دسویں دن یاددہانی کا نوٹس بھیجا جائے گا اور تنخواہوں کی بروقت ادائیگی میں ناکامی کی صورت میں ان پر جرمانہ ہوگا، جس کے لیے طریقہ کار وضع کر دیا گیا ہے۔

وہ آجر جن کی کمپنی میں 50 یا اس سے زائد ملازمین کام کرتے ہیں، ان کو وزارت کی جانب سے معائنوں کا سامنا ہوگا، اور ان کو انتباہ جاری کیا جائے گا اگر 17 دن گزر جانے کے باوجود تنخواہیں ادا نہ کی گئی ہو۔

الرواد ایڈووکیٹس کے ڈاکٹر حسن الہیس کے مطابق متحدہ عرب امارات میں 2009 سے اجرت کے تحفظ کا نظام فعال ہے، تاہم نئی قرارداد میں تنخواہوں کی عدم ادائیگی کے خلاف سخت اقدامات کو نافذ کرنے کی کوشش کی گئی ہے، تاکہ بہتر تعمیل کو یقینی بنایا جا سکے۔

انھوں نے کہا ملازمت کے معاہدے میں کسی وضاحت سے ہٹ کر اگر مقررہ تاریخ سے 15 دنوں کے اندر ملازمین کو اجرت ادا نہیں کی گئی تو آجر کے خلاف کارروائی عمل میں لائی جائے گی۔

اجرت کے نظام کے مطابق ملازم کی تنخواہ رجسٹرڈ ہونے کے ایک مہینے بعد پہلے دن سے شروع ہوتی ہے، اگر معاہدے میں مقررہ تاریخ کا تذکرہ نہیں کیا گیا ہے کہ تو ملازمین کو ماہ میں کم از کم ایک بار ان کی اجرت موصول ہونی چاہیے۔

وزارت کی جانب سے جاری ہدایات میں یہ بھی کہا گیا ہے کہ وقت پر تنخواہوں کی ادائیگی سے کاروباری استحکام اور ملازمین کی زندگی آسان ہو جاتی ہے، کام کی جگہ پر بھی مثبت اثر پڑتا ہے اور ملازمین کی کارکردگی بہتر ہو جاتی ہے۔

ابوظبی: متحدہ عرب امارات میں ملازمت کرنے والے ایک پاکستانی نے دنیا کے تمام پاکستانیوں کا سر فخر سے بلند کر دیا ہے۔

تفصیلات کے مطابق دس برس سے متحدہ عرب امارات میں مقیم پاکستان کے 35 سالہ شہری منظر عباس نے اپنی ایمانداری اور مہربانی کے سادہ عمل کی بدولت ایک مصری خاندان کو شدید پریشانی سے بچا کر پاکستانیوں کا سر فخر سے بلند کر دیا۔

منظر عباس فوڈ ڈیلیوری رائیڈر ہیں، کمپنی میں بطور ڈرائیور کام کرتے ہیں جو گزشتہ ہفتے شارجہ یونیورسٹی سٹی میں کھانے کا آرڈر دینے کے لیے جا رہے تھے، تو انھیں شارجہ کی امریکن یونیورسٹی جانے والی سڑک کے فٹ پاتھ پر ایک لیڈیز ہینڈ بیگ پڑا نظر آیا۔

جب انھوں نے لاوارث ہینڈ بیگ اٹھا کر دیکھا تو اس میں موٹی نقد رقم کے علاوہ 20 ہزار درہم کا ایک چیک، شناختی کارڈ، اور اہم کاغذات موجود تھے۔

کاغذات پر سے موبائل نمبر نوٹ کر کے منظر عباس نے کالیں شروع کر دیں، دس بارہ کالیں کرکے بھی کوئی جواب نہیں آیا، پھر انھوں نے واٹس ایپ پیغام بھیج دیا کہ آپ کا بیگ مجھے ملا ہے، معلوم ہوا کہ بیگ ہُدا عبدالوہاب نامی مصری خاتون کا تھا، جو بیگ کے کھونے سے اتنی پریشان تھیں کہ موبائل پر آنے والی کالز کا بھی جواب نہیں دے رہی تھیں، جو اسی بیگ سے متعلق تھیں۔

خاتون کے بیٹے میڈیکل اسٹوڈنٹ طارق محمد نے خلیج ٹائمز کو بتایا کہ ہم شدت سے اس بیگ کو تلاش کر رہے تھے، میری والدہ میری بہن کی کالج کی فیس ادا کرنے کے لیے یونیورسٹی گئی ہوئی تھیں۔

عباس نے جس دوسرے نمبر پر واٹس ایپ کیا، وہ دراصل خاتون ہی کی بیٹی کا تھا، جنھوں نے پیغام پڑا تو خوشی سے نہال ہو گئیں، اور والدہ کو بتایا کہ گم شدہ بیگ مل گیا ہے، تب خاتون نے موبائل پر نگاہ کی جہاں انجان نمبر سے کم از کم بارہ کالیں آئی ہوئی تھیں۔

یو اے ای میں 25 برس سے مقیم مصری خاتون نے کہا عباس نے ہمارے لیے جو کچھ کیا ہم اس کے لیے بہت مشکور ہیں۔ طلابات میں کام کرنے والے عباس نے کہا کہ میرے عمل سے اس خاندان کو جو خوشی ملی ہے وہ میرے لیے ایک بڑا تحفہ ہے، جب میں نے بیگ واپس کیا تو اس کے بعد بہت اچھا محسوس کیا۔

ابوظبی: مرکزی بینک نے اپنے ذخائر تک رسائی کے لیے نئے شرائط و ضوابط متعارف کرانے کا اعلان کیا ہے۔

تفصیلات کے مطابق مرکزی بینک اپنے اسٹینڈنگ کریڈٹ اور لیکویڈیٹی انشورنس سہولیات کے لیے نئے عمومی شرائط و ضوابط متعارف کرائے گا، جس کے تحت لائسنس یافتہ مالیاتی ادارے بینک کے ذخائر تک رسائی حاصل کر سکیں گے۔

بینک کا کہنا ہے کہ نئے شرائط و ضوابط یکم مارچ 2022 سے نافذ العمل ہوں گے، جن میں ان سہولیات کو فعال کرنے سے متعلق صوابدیدی اختیارات، اور کولیٹرل مینجمنٹ کے لیے رہنما اصولوں کی وضاحت کی گئی ہے۔

اگر کسی اہل پارٹی کو کاروبار کے لیے فنڈ کی ضرورت پڑ جائے تو وہ اپنی صوابدید پر راتوں رات بینک کے ذخائر کے حصول کے لیے مستقل کریڈٹ سہولیات میں سے کسی ایک تک رسائی حاصل کر سکتی ہے، اس کے لیے وہ کولیٹرلائزڈ فنڈنگ یا مرابحہ ٹرانزیکشنز کا استعمال کرے گی۔

اس کے علاوہ مرکزی بینک غیر معمولی نوعیت کے کسی بھی حقیقی یا ممکنہ مسئلے کی صورت میں ہنگامی لیکویڈٹی انشورنس سہولت کو فعال کر سکتا ہے، جہاں اہل پارٹی کو توسیع شدہ شرائط پر بنک کے ذخائر تک رسائی مل سکتی ہے۔

مرکزی بنک کے گورنر خالد محمد بلامہ نے کہا کہ اہل ضمانت کے سپیکٹرم کی تنظیم نو مرکزی بینک کی طرف سے زیادہ مؤثر مداخلت کو یقینی بنائے گی، تاکہ تناؤ کے وقت مقامی مارکیٹ کے مسائل سے نمٹنے کے لیے اہل پارٹیز کو لیکویڈیٹی فراہم کی جا سکے۔

انھوں نے کہا کہ نئی خصوصیات اسٹینڈنگ کریڈٹ اور لیکویڈیٹی انشورنس کی سہولیات بھی بینک کو مارکیٹ کے تمام حالات سے نمٹنے میں مدد کریں گی۔