Tag: یو اے ای

ابوظبی: یو اے ای میں ایئر لائنز اور ٹریولنگ ایجنسیوں نے عید الفطر کی تعطیلات پر بین الاقوامی پروازوں کے لیے خصوصی پیکجز کا اعلان کر دیا۔

تفصیلات کے مطابق متحدہ عرب امارات میں فضائی کمپنیوں نے عید پر فضائی سفر کے لیے خصوصی پیکجز متعارف کرا دیے، پیکجز کا آغاز 1200 درہم سے کیا گیا ہے۔

ان پیکجز میں ٹکٹ، ہوٹل میں رہائش، بکنگ کی فیس اور مفت انشورنس کی سہولتیں شامل ہیں، ٹریولنگ ایجنسیوں کا کہنا ہے کہ عید الفطر کی تعطیلات پر آفرز کا مقصد لوگوں کو سفر پر آمادہ کرنا ہے، قیمتیں ایسی ہیں کہ زیادہ سے زیادہ لوگ سفر کا پروگرام بنا سکتے ہیں۔

پیکجز کے مطابق جارجیا کے شہر تبلیسی کے لیے 1300 درہم ٹکٹ مع تین رات ہوٹل میں قیام، جب کہ بریفان کے لیے 1600 درہم کا ٹکٹ رکھا گیا ہے، جس میں 4 راتیں ہوٹل میں رہائش بھی شامل ہے۔

قاہرہ کے لیے 1900 درہم کا پیکج متعارف کرایا گیا ہے جس میں فائیو اسٹار ہوٹل میں قیام بھی شامل ہے، بلغراد کے لیے 2228 درہم کا پیکج ہے، زنجبار کے لیے 3 رات قیام اور سفر کا پیکج 2149 درہم پر مشتمل ہے، جب کہ مالدیپ کے لیے 3700 درہم کا پیکج متعارف کرایا گیا ہے۔

ٹریول کمپنیوں کا کہنا ہے کہ سفری پابندیوں میں کمی پر نئے پیکجز دراصل لوگوں کو سفر کے لیے آمادہ کرنے کے لیے پیش کیے جا رہے ہیں۔

امارات: ابوظبی ٹریفک پولیس نے خبردار کیا ہے کہ اسٹارٹ حالت میں گاڑی چھوڑنے پر 500 درہم جرمانہ ہوگا۔

تفصیلات کے مطابق ابوظبی میں اب گاڑی اسٹارٹ حالت میں چھوڑنے پر پانچ سو درہم جرمانہ کیا جائے گا، ٹریفک پولیس نے تنبیہ کی ہے کہ معمولی نوعیت کے کام کے لیے بھی گاڑی اسٹارٹ حال میں نہ چھوڑیں۔

ٹریفک پولیس کے مطابق قانون کی شق نمبر 70 کے تحت گاڑی کو پارک کرنے کے بعد اسے اسٹارٹ حالت میں چھوڑنا قانون کی خلاف ورزی ہے۔

ابوظبی ٹریفک پولیس نے اس سلسلے میں گاڑی مالکان کو سختی سے ہدایت جاری کی ہے کہ معمولی نوعیت کا کام کیوں نہ ہو، جاتے وقت گاڑی کو اسٹارٹ حالت میں نہ چھوڑا جائے۔

واضح رہے کہ بعض لوگ دکان سے کچھ خریدنے یا اے ٹی ایم سے رقم نکالنے کے لیے جاتے ہیں تو گاڑی کو اسٹارٹ حالت میں چھوڑ دیتے ہیں، جس سے گاڑی چوری کا امکان بڑھ جاتا ہے۔

ٹریفک پولیس نے ڈرائیورز کو قوانین پر سختی سے عمل کرنے کی ہدایت کرتے ہوئے کہا ہے کہ گاڑی پارک کرنے کے بعد اسے اسٹارٹ حالت میں نہ چھوڑیں، بالخصوص جب گاڑی میں چھوٹے بچے تنہا بیٹھے ہوں۔

خیال رہے کہ گاڑی کو غیر مناسب مقام پر پارک کرنا بھی قانون شکنی ہوتی ہے، جس پر چالان کیا جاتا ہے۔

ابوظبی: متحدہ عرب امارات کے دارالحکومت ابوظبی میں چین کی کرونا ویکسین تیار کی جائے گی، ویکسین کو حیات ویکس کا نام دیا جائے گا۔

تفصیلات کے مطابق یو اے ای نے چین کی کرونا ویکسین کی تیاری سے متعلق اہم فیصلہ کیا ہے، رواں سال کے آخر تک ابوظبی کی ایک نئی فیکٹری میں سائنو فارم کی کرونا ویکسین کی تیاری شروع کر دی جائے گی۔

اس ویکسین کی تیاری کے لیے ابوظبی کی ٹیکنالوجی کمپنی گروپ 42 (G42) نے چینی کمپنی سائنو فارم کے ساتھ اشتراک کیا ہے۔

ویکسین کی تیاری کے اس منصوبے کو خلیجی خطے میں چینی سفارت کاری کی توسیع قرار دیا جا رہا ہے، جب کہ یو اے ای کی معیشت میں اس سے تنوع پیدا ہونے میں بھی مدد ملے گی۔

خیال رہے کہ ویکسین تیار کرنے والا یہ پلانٹ خلیفہ انڈسٹریل زون آف ابوظبی میں تعمیر کیا جا رہا ہے، اس میں 3 فِلنگ لائنز اور 5 آٹومیٹڈ پیکیجنگ لائنز ہوں گی۔

اس پلانٹ میں ایک سال کے دوران کرونا ویکسین کی 20 کروڑ خوراکیں تیار کی جائیں گی، جب کہ اس پروڈکشن لائن میں ابتدائی طور پر ایک ماہ میں 20 لاکھ خوراکیں تیار کی جا سکیں گی۔

پیر کو بتایا گیا کہ متحدہ عرب امارات میں تیار ہونے والی اس ویکسین کو حیات ویکس (Hayat-Vax) کا نام دیا جائے گا، تاہم یہ بیجنگ انسٹی ٹیوٹ آف بائیولوجیکل پروڈکٹ کی ویکسین ہے جس کی امارات نے دسمبر میں منظوری دی تھی۔

ابوظبی: دنیا بھر میں کرونا وائرس سے محفوظ رہنے کے لیے کرونا ویکسی نیشن جاری ہے، ایسے میں متحدہ عرب امارات میں ایک اہم فیصلہ سامنے آیا ہے۔

امارات کی قومی فضائی کمپنی ایمریٹس نے اپنے عملے سے کہا ہے کہ وہ پہلی فرصت میں کرونا ویکسین لگوا لیں یا ہر ہفتے ڈیڑھ سو درہم ادا کریں۔

فضائی کمپنی ایمریٹس کا کہنا ہے کہ یہ پابندی کرونا وائرس کے پھیلاؤ کو روکنے کے مؤثر اور محفوظ ترین وسیلے ویکسین کی اہمیت اجاگر کرنے کے لیے لگائی گئی ہے۔

امارات ایئر نے بیان میں کہا کہ جن کارکنان نے اب تک کرونا ویکسین نہیں لی ہے انھیں یکم اپریل 2021 سے اپنے خرچ پر ہر ہفتے پی سی آر کرانا ہوگا۔

بیان کے مطابق امارات ایئر کے 5 ہزار کارکنان اب تک کرونا ویکسین لے چکے ہیں، جن میں پائلٹس، ایئر ہوسٹس اور دیگر فضائی عملہ شامل ہے، جب کہ الامارات گروپ کے کارکنان بھی ہزاروں کی تعداد میں ویکسین لگوا چکے ہیں۔

یاد رہے کہ دبئی میں کرونا ٹیسٹ کی فیس 150 درہم کے لگ بھگ ہے، اس فیس میں لیبارٹری ٹیسٹ، رزلٹ رپورٹ سمیت تمام اخراجات شامل ہیں۔

الامارات گروپ نے ویکسین کی سہولت کلینکس میں مہیا کر رکھی ہے جب کہ ویکسین سینٹرز میں بھی یہ سہولت دستیاب ہے۔

ابوظبی: متحدہ عرب امارات کی شیخ زاید جامع مسجد کے فانوس اسلامی فن تعمیر کا شاہ کار ہیں، اس مسجد میں دنیا کے 7 منفرد، بڑے اور شان دار فانوس نصب ہیں۔

یو اے ای میں واقع جامع الشیخ زاید الکبیر کے نام سے دنیا کی اس عظیم اور حسین ترین جامع مسجد کو دیکھنے کے لیے آنے والے سیاح ان فانوسوں کو دیکھ کر اسلامی آرٹ کی داد دیے بنا نہیں رہ سکتے۔

دل چسپ امر یہ ہے کہ مسجد کے فانوسوں اور قالینوں کے ڈیزائن میں ایسی ہم آہنگی کا اہتمام کیا گیا ہے، کہ فانوس کے ٹکڑے دیکھنے میں رنگین قطروں جیسے لگتے ہیں، اور زائرین کو ایسا لگتا ہے کہ یہ کسی بھی وقت قالین پر گر جائیں گے، دوسری طرف قالین، فانوس کے رنگوں کو منعکس کرنے والے حوض کا تاثر دیتا ہے۔

اس جامع مسجد کے بڑے ہال میں 3 گنبد ہیں، جن میں دیو ہیکل تین فانوس لگے ہوئے ہیں، ان سے چھوٹے سائز کے 4 فانوس وی آئی پی ہال، الذھور ہال اور بڑے ہال کے پہلو میں واقع ہالز میں آویزاں کیے گئے ہیں۔

رپورٹ کے مطابق بڑے فانوس کا وزن 12 ٹن کے لگ بھگ ہے، اس کا قطر 10 میٹر ہے، اونچائی 15.5 میٹر ہے جب کہ بڑے ہال میں اس سے چھوٹے حجم کے 2 فانوسوں میں ہر ایک کا وزن 8 ٹن، اونچائی 12.5 میٹر اور قطر 7 میٹر ہے، ان میں 9 ہزار 500 بلب لگے ہوئے ہیں۔

جامع مسجد کے اہل کار سالم السویدی کا کہنا ہے کہ ان فانوسوں کی صفائی، تزئین و مرمت پر 45 افراد کی ٹیم مامور ہے، جب کہ ڈیڑھ مہینے تک روزانہ 12 گھنٹوں تک ان کی صفائی کی جاتی رہی۔ ان کا کہنا تھا فانوسوں کی تجدید کا کام جدید ترین عالمی معیار کے مطابق انجام دیا گیا ہےاور شیخ زاید جامع مسجد کے جمالیاتی عناصر مربوط سائنٹیفک سسٹم کے تحت ترتیب دیے گئے ہیں۔

ابوظبی: متحدہ عرب امارات نے کرونا ویکسین سے تحفظ فراہم کرنے والی چین کی تیار کردہ ویکسین کا اندراج کر لیا۔

تفصیلات کے مطابق اماراتی وزارت صحت نے بیجنگ انسٹی ٹیوٹ آف بائیولوجیکل پروڈکٹ کی انسداد کو وِڈ 19 ویکسین کے باضابطہ اندراج کا اعلان کر دیا ہے۔

یو اے ای میڈیا کے مطابق سینوفرم سی این بی جی کی جانب سے درخواست کی گئی تھی، جس پر یو اے ای میں ویکسین کا اندراج کیا گیا، اس عمل سے یہ بھی ظاہر ہوتا ہے کہ متحدہ عرب امارات کے صحت حکام ویکسین کی محفوظ افادیت کے حوالے سے پُر اعتماد ہیں۔

واضح رہے کہ اس اعلان سے وزارت صحت نے محکمہ صحت ابوظبی کے تعاون سے سینوفرم سی این بی جی کے تیسرے مرحلے کے تجربات کا جائزہ بھی لیا تھا، واضح رہے کہ ٹرائلز میں بیجنگ انسٹی ٹیوٹ آف بائیولوجیکل پروڈکٹ کی یہ ویکسین کرونا انفیکشن کے خلاف 86 فی صد مؤثر ثابت ہوئی تھی۔

یو اے ای کے نائب صدر نے کرونا ویکسین لگوا لی

ٹرائلز سے یہ بھی پتا چلتا ہے کہ اس ویکسین میں اینٹی باڈی کو نیچرلائز کرنے کی 99 فی صد اور بیماری کی روک تھام میں 100 فی صد تاثیر موجود ہے۔

یاد رہے کہ اس ویکسین کو ستمبر سے ایمرجنسی استعمال کی اجازت بھی دی گئی تھی تاکہ کو وِڈ 19 کے خلاف فرنٹ لائن پر کام کرنے والے طبی عملے کو تحفظ فراہم کیا جا سکے، ویکسین کے استعمال سے طبی عملے کی مؤثر طریقے سے حفاظت ممکن ہوئی۔