Tag: یو اے ای

دبئی: متحدہ عرب امارات کے شہر دبئی میں 50 ہزار درہم رشوت ٹھکرانے والے پولیس افسر کو ترقی دے دی گئی۔

خلیج ٹائمز کی رپورٹ کے مطابق دبئی میں 50 ہزار درہم رشوت لینے سے انکار پر حکام کی جانب سے ترقی دے دی گئی، پولیس افسر کو اس کی ایمانداری پر سرٹیفکیٹ بھی دیا گیا۔

دبئی پولیس چیف میجر جنرل عبداللہ خلیفہ المری کے مطابق پولیس افسر محمد عبداللہ بیلا نے بھاری رشوت لینے سے صاف انکار کیا۔

رپورٹ کے مطابق دبئی کے علاقے الموہسنا میں پولیس افسر کو گینگ کی جانب سے شراب کی فروخت نہ روکنے پر 30 ہزار درہم ایڈوانس اور گاڑی کی رشوت دی گئی اور کہا گیا کہ 50 ہزار درہم ہر ماہ ادا کیے جائیں گے۔

مزید پڑھیں: دبئی میں پاکستانی شہریوں کو لوٹنے والا جعلی پولیس اہلکاروں کا گینگ گرفتار

دبئی پولیس کے فیس بک پیج کے مطابق دبئی پولیس چیف کی جانب سے محمد عبداللہ کو سرٹیفکیٹ اور ترقی کے علاوہ نقد رقم بھی بطور انعام دی گئی۔

پولیس افسر نے دبئی پولیس چیف کا شکریہ ادا کیا اور کہا کہ میرے لیے یہ بہت ہی اعزاز کی بات ہے، میرے اعتماد میں اضافہ ہوا ہے، عبداللہ کے ساتھی پولیس اہلکاروں کا کہنا تھا کہ وہ نہایت ہی ایمانداری اور جانفشانی سے اپنی خدمات انجام دیتے ہیں۔

واضح رہے کہ دو روز قبل دبئی پولیس نے پاکستانی شہریوں سے کروڑوں روپے ہتھیانے والے جعلی پولیس اہلکاروں کے 7 رکنی گینگ کو گرفتار کیا تھا، گروہ نے پاکستانیوں سے 3.5 ملین درہم کی رقم لوٹی تھی۔

گرفتار ملزمان میں 39 سالہ اماراتی، 38 سالہ شامی شہری شامل تھے جبکہ دیگر 5 ملزمان کا تعلق دیگر ممالک سے تھا۔

دبئی: متحدہ عرب امارات میں پاکستانیوں سے کروڑوں روپے لوٹنے والے جعلی پولیس اہلکاروں کو دبئی پولیس نے گرفتار کرلیا۔

گلف نیوز کی رپورٹ کے مطابق دبئی پولیس نے پاکستانی شہریوں سے کروڑوں روپے ہتھیانے والے جعلی پولیس اہلکاروں کے 7 رکنی گینگ کو گرفتار کرلیا، گروہ نے پاکستانیوں سے 3.5 ملین درہم کی رقم لوٹی تھی۔

گرفتار ملزمان میں 39 سالہ اماراتی، 38 سالہ شامی شہری شامل ہیں جبکہ دیگر 5 ملزمان کا تعلق دیگر ممالک سے ہے۔

چار پاکستانی شہریوں کی جانب سے ملزمان کے خلاف درخواست دائر کی گئی تھی جس پر پولیس نے کامیاب کارروائی کرتے ہوئے ملزمان کو حراست میں لیا۔

رپورٹ کے مطابق جنوری میں پاکستانی شہری اپنی گاڑی میں سفر کررہے تھے کہ پولیس وردی میں ملبوس ملزمان نے ان سے شناخت دکھانے کے بہانے رقم ہتھیا لی تھی۔

متاثرہ پاکستانی شہریوں کا کہنا ہے کہ ملزمان نے خود کو پولیس آفیسر ظاہر کیا اور ہماری رقم کے بارے میں شواہد پوچھنے لگے تاہم رقم اپنے پاس رکھ لی اور کہا کہ یہ پیسے مقدمے کے ہیں فیصلہ آنے کے بعد واپس ملیں گے۔

انہوں نے کہا کہ رہائی پانے کے بعد مذکورہ پولیس اسٹیشن گئے اور اپنے خلاف درج مقدمے کی تفصیلات معلوم کیں تو پتہ چلا کہ ان کے خلاف تو کوئی مقدمہ درج ہی نہیں ہوا ہے جس پر وہ حیران رہ گئے اور وہیں اپنے ساتھ ہونے والے واقعے کی رپورٹ درج کرائی۔

پولیس نے ملزمان کے قبضے سے لوٹی گئی رقم برآمد کرلی، کیس کا فیصلہ 2 اپریل کو سنایا جائے گا۔

دبئی: متحدہ عرب امارات کی کمپنی نے سانحہ کرائسٹ چرچ کا جشن منانے والے نوجوان کو ملازمت سے برطرف کرتے ہوئے ڈی پورٹ کردیا۔

این ڈی ٹی وی کی رپورٹ کے مطابق گزشتہ ہفتے سانحہ کرائسٹ چرچ میں 50 مسلمانوں کی شہادت پر جشن منانے والے نوجوان کو اماراتی کمپنی نے نوکری سے برطرف کرتے ہوئے ڈی پورٹ کردیا۔

سیکیورٹی کمپنی ٹرانس گارڈ کی جانب سے نوجوان اور ملک کا نام ظاہر نہیں کیا گیا ہے، نوجوان نے سوشل میڈیا ویب سائٹ فیس بک پر سانحہ کرائسٹ چرچ میں مسلمانوں کی شہادت پر خوشی کا اظہار کیا تھا۔

کمپنی کے منیجنگ ڈائریکٹر گریک وارڈ کا کہنا ہے کہ ہمارے یہاں سوشل میڈیا پر کسی بھی قسم کے مذہب مخالف پروپیگنڈے پر زیرو ٹالرنس پالیسی پر عمل کیا جاتا ہے، اس طرح کے عمل پر کوئی بھی ہو نوکری سے برطرف اور ڈی پورٹ کیا جائے گا۔

سیکیورٹی کمپنی نے تصدیق کی کہ متحدہ عرب امارات حکومت کی جانب سے اس شخص کو ڈی پورٹ کیا گیا ہے۔

مزید پڑھیں: برطانیہ چھوڑ دو، مانچسٹر کی جامع مسجد میں انتہا پسند کی کال

واضح رہے کہ دنیا بھر سے کرائسٹ چرچ میں مسلمانوں کی شہادت پر تعزیت کا اظہار کیا جارہا ہے، نیوزی لینڈ کی وزیراعظم جیسنڈا آرڈرن نے بھی جمعے کے روز آذان کو تمام ٹی وی چینل پر براہ راست نشر کرنے کا اعلان کیا ہے۔

چند روز قبل آسٹریلوی دہشت گرد کی جانب سے نیوزی لینڈ کی دو مساجد پر اندھا دھند فائرنگ کے نتیجے میں 50 نمازی شہید ہوگئے تھے جن میں 9 پاکستانی شامل تھے جبکہ ایک پاکستانی شہری کی حالت تشویشناک ہے۔

یاد رہے کہ آج دو پاکستانی شہریوں کی نماز جنازہ ادا کردی گئی ہے اور ان کو نیوزی لینڈ کے قبرستان میں سپرد خاک کردیا گیا ہے۔

خیال رہے کہ دہشت گرد کو نیوزی لینڈ کی پولیس نے دو مسجد میں فائرنگ کرنے کے بعد تیسرے ہدف کی جانب بڑھنے کی کوشش کرنے پر گرفتار کیا تھا، اس پر چند روز میں فرد جرم عائد کی جائے گی۔

ابوظبی: متحدہ عرب امارات کی ریاست العین میں خاتون کو پلاسٹک سرجری کروا کر شوہر کو سرپرائز دینا اہلیہ کو مہنگا پڑ گیا۔

عرب میڈیا کے مطابق اماراتی ریاست العین میں خاتون نے شوہر کو سرپرائز دینے کے لیے چہرے کی پلاسٹک سرجری کروائی تاکہ وہ اور جاذب النظر دکھائی دے تاہم شوہر کو بیوی کی یہ تبدیلی پسند نہیں آئی اور اس نے خاتون کو طلاق دے دی۔

رپورٹ کے مطابق خاتون کا شوہر دو ماہ کی ٹرپ پر کسی دوسرے ملک میں موجود تھا خاتون نے واپسی پر اسے سرپرائز دینے کے لیے العین کے اسپتال سے سرجری کرائی اور چہرے سے رنکلز کا خاتمہ کیا۔

عدالت میں شوہر نے موقف اختیار کیا کہ مجھے ’نیچرل بیوٹی‘ پسند ہے اور پلاسٹک سرجری کرانے والی خاتون سے سخت نفرت ہے۔

یہ واضح نہیں ہوسکا ہے کہ پلاسٹک سرجری کروانے کے بعد خاتون کے چہرے پر کیا اثرات نمودار ہوئے تھے۔

 مزید پڑھیں: دبئی: موبائل میں بیلنس لوڈ نہ کروانے پر بیوی نے طلاق مانگ لی

خاتون کا کہنا تھا کہ مجھے ڈاکٹرز نے پلاسٹک سرجری کروانے کا کہا تھا اگر انہیں یہ عمل پسند نہیں ہے تو میں ان سے معافی مانگتی ہوں لیکن خاتون شوہر کو قائل کرنے میں ناکام رہیں۔

خاتون کے شوہر نے طلاق کے لیے العین کی فیملی کورٹ میں درخواست دائر کی، فریقین کے درمیان صلح کی ہر ممکن کوشش کی گئی جس میں ناکامی کے بعد خاتون کو طلاق دے دی گئی۔

واضح رہے کہ معمولی باتوں پر عرب امارات میں طلاق کوئی نئی بات نہیں ہے چند ماہ سے امارات میں طلاق اور خلع کے رجحان میں اضافہ دیکھنے میں آیا ہے۔

یاد رہے کہ گزشتہ سال دسمبر میں اماراتی خاتون نے شوہر کی جانب سے موبائل میں 50 درہم کا بیلنس لوڈ نہ کروانے پر خلع مانگ لی تھی۔