Tag: یو اے ای

دبئی: متحدہ عرب امارات کے شہر دبئی میں جعلی ویزے اور امیگریشن دستاویزات تیار کرنے والا گینگ پکڑا گیا، ملزمان نے مختلف سرکاری اداروں اور محکموں کی جعلی مہریں بنوا رکھی تھیں۔

عرب میڈیا کے مطابق دبئی پولیس نے پانچ افراد کو جعلی رہائشی ویزے تیار کرنے اور سرکاری محکموں کی جعلی مہریں استعمال کرنے کے جرم میں گرفتار کرلیا ہے، جعلسازی میں ملوث گروہ کے تین افراد کا تعلق پاکستان جبکہ دو کا بھارت سے بتایا گیا ہے۔

ملزمان نے دبئی کارپوریشن آف ایمبولینس سروسز، دبئی اور شارجہ کے انٹرنیشنل ایئرپورٹس، دبئی ہیلتھ کیئر اتھارٹی اور دبئی میونسپلٹی کی جعلی مہریں بنوا رکھی تھیں۔

یہ جعلساز گروہ پاسپورٹس میں ہیر پھیر کرنے، بڑی تعداد میں جعلی رہائشی ویزے تیار کرنے اور بینک اکاؤنٹس کی جعلی اسٹیٹمنٹس تیار کرنے میں بھی ملوث پایا گیا ہے۔

دبئی پولیس کے مطابق اطلاع ملی کہ ملزمان اپنے پاس موجود جعلی مہروں کی مدد سے لوگوں کو جعلی سرکاری دستاویزات تیار کرکے دیتے ہیں اور بدلے میں بھاری رقوم وصول کرتے ہیں، ملزمان کی تفصیل جاننے کے بعد سرکاری استغاثہ کی جانب سے سرچ وارنٹ حاصل کرکے ملزمان کو گرفتار کیا گیا۔

پولیس کے مطابق ملزمان کے دفتر پر چھاپے کے دوران ان کے زیر استعمال سامان اور سافٹ ویئر قبضے میں لے لیا گیا ہے جبکہ ملزمان کی نشاندہی پر ان لوگوں کو گرفتار کیا گیا ہے جنہوں نے پیسوں کے عوض جعلی امیگریشن دستاویزات تیار کروائی تھیں۔

ملزمان کو عدالت نے ایک، ایک ماہ قید کی سزا سنائی ہے، اس کے علاوہ انہیں ایک ایک ہزار درہم جرمانہ بھی ادا کرنا ہوگا جس کے بعد انہیں ڈی پورٹ کردیا جائے گا۔

دبئی: دو پاکستانی افراد کو النہدہ کے صحرائی علاقے میں پارک کی گئی منی بس چوری کرنے کے الزام میں گرفتار کرلیا گیا۔

عرب میڈیا کے مطابق منی بس فیشن ڈیزائن کمپنی کی ملکیت تھی، کمپنی کے ملازم ڈرائیور نے منی بس صحرائی علاقے میں کھڑی کی اور اپنے گھر چلا گیا، اگلے روز جب وہ اس جگہ پہنچا جہاں اس نے منی بس پارک کی تھی تاہم بس چوری ہوچکی تھی۔

مذکورہ ملازم ڈرائیور نے پریشانی کے عالم میں اپنے مالک کو کمپنی ٹرانسپورٹ کی گمشدگی کی اطلاع دی، مالک خود بھی جائے واردات پر پہنچے اور اس کے بعد پولیس کو منی بس چوری کی اطلاع دی گئی۔

جون 2018 میں پولیس نے صحرائی علاقوں میں پارک کی گئی منی بسوں کی چوری میں ملوث ہونے کے شبے میں دو پاکستانیوں کو گرفتار کیا۔

مزید پڑھیں: دبئی پولیس کی کارروائی، 1کروڑ 40 لاکھ درہم کی ڈکیتی میں ملوث 7 پاکستانی گرفتار

استغاثہ کی جانب سے ان ملزمان کو فیشن ڈیزائننگ فرم کی 45 ہزار درہم کی منی بس چرانے کا ذمہ دار ٹھہرایا گیا ہے، استغاثہ کے مطابق ملزمان نے منی بس کی کھڑکی کا شیشہ توڑا اور پھر تاروں کو جوڑ کر گاڑی اسٹارٹ کرکے لے گئے۔

ملزمان نے اپنے خلاف عائد الزامات کو درست تسلیم کرنے سے انکار کردیا ہے، ملزمان کا کہنا ہے کہ منی بس چوری نہ کرنے کے باوجود انہیں جیل میں قید رکھا گیا۔

ملزمان کا کہنا ہے کہ ان پر مزید کئی منی بسوں کی چوری کا الزام عائد کردیا گیا ہے جبکہ اصل ملزم گرفتار نہیں کیا گیا ہے، ہم لوگوں کی بس ایک ہی خواہش ہے کہ اپنے وطن واپس لوٹ جائیں۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔