Tag: شیخ رشید

کوئٹہ: مچھ بلوچستان میں گیارہ کان کنوں کے لرزہ خیز قتل کے بعد دھرنا دینے والے مظاہرین کے ساتھ وفاقی وزیر داخلہ شیخ رشید کے مذاکرات ناکام ہو گئے۔

اے آر وائی نیوز کے مطابق سانحہ مچھ کے مظاہرین نے دھرنا ختم کرنے سے انکار کر دیا، مظاہرین نے مطالبہ کیا ہے کہ وزیر اعظم عمران خان دھرنے میں خود تشریف لائیں، تب تک دھرنا جاری رہے گا۔

وفاقی وزیر داخلہ شیخ رشید نے کوئٹہ دھرنے کے شرکا سے خطاب میں کہا سانحہ مچھ پر شرمندہ ہوں، یقین دلاتا ہوں دہشت گرد نہیں بچیں گے، متاثرین کی مالی مدد بھی کی جائے گی اور ان کو 25،25 لاکھ روپے دیے جائیں گے۔

شیخ رشید نے مظاہرین سے کہا کہ 3 سے 4 دن میں ان کی وزیر اعظم سے ملاقات کراؤں گا، واقعے سے متعلق جوڈیشل کمیٹی کا بھی اعلان کرتا ہوں، انھوں نے مزید کہا کہ آپ کا پیغام وزیر اعظم تک پہنچاؤں گا، لواحقین سے درخواست ہے کہ شہدا کی تدفین کر دیں۔

11 کان کنوں کا قتل : سانحہ مچھ کا مقدمہ نامعلوم افراد کے خلاف درج

قبل ازیں، وزیر داخلہ شیخ رشید سانحہ مچھ کے لواحقین کے دھرنے میں پہنچے تو ان کے ہمراہ ڈپٹی اسپیکر قومی اسمبلی قاسم سوری، صوبائی وزیر داخلہ میر ضیا لانگو بھی موجود تھے، انھوں نے کا کہا کہ وزیر اعظم عمران خان نے مجھے فوری کوئٹہ پہنچنے کی ہدایت کی تھی، یقین دلاتا ہوں کہ حملہ آور بچ نہیں سکیں گے، سانحہ مچھ متاثرین کو صوبائی حکومت 15 لاکھ، وفاق 10 لاکھ روپے دے گا۔

انھوں نے مظاہرین سے خطاب میں کہا کہ دہشت گرد مچھ پر 4 بار حملہ کر چکے ہیں، یقین دلاتا ہوں کہ یہ مجرم نہیں بچنے والے، لواحقین کے جو مطالبات ہیں وزیر اعظم کے سامنے رکھیں گے، وزیر اعظم نے کہا تھا کہ میرا جہاز لے کر جاؤ اور تعزیت کرو، وزیر اعظم کا خصوصی پیغام لے کر یہاں آیا ہوں، امید ہے آپ لوگ وزیر اعظم کی درخواست کو رد نہیں کریں گے۔

اسلام آباد: وفاقی وزیر داخلہ شیخ رشید نے کہا ہے کہ پی ڈی ایم کا لانگ مارچ اسلام آباد آتا ہے تو میں اسے بطور وزیر داخلہ ڈیل کروں گا، فضل الرحمان لانگ مارچ میں مدرسوں کے طلبہ کو لے کر آئیں گے، طلبہ کو کہیں گے کہ اسلام اور اسلام آباد میں فرق کریں۔

ان خیالات کا اظہار وہ اے آر وائی نیوز کے پروگرام اعتراض ہے میں کر رہے تھے، انھوں نے کہا فضل الرحمان ایسی باتیں کر رہے ہیں جو عالم دین کے شایان شان نہیں، یہ منہ اور مسور کی دال، یہ استعفوں کی باتیں کر رہے تھے، جیسے انھوں نے استعفے دیے ویسے یہ پنڈی بھی جائیں گے، پہلے اسلام آباد تو آئیں۔

شیخ رشید نے کہا میں یہ نہیں کہوں گا کہ پی ڈی ایم کو بیرونی فنڈنگ ہو رہی ہے، لیکن پی ڈی ایم اور بھارت کا پاکستان کے خلاف مؤقف تقریباً ایک جیسا ہے، پاک افواج کے پیچھے پاکستان کی عوام سیسہ پلائی دیوار کی طرح ہیں۔

وزیر داخلہ نے کہا نواز شریف کا پاسپورٹ ری نیو نہیں ہوگا کیوں کہ مجھے ہدایت دی گئی ہے، عمران خان سے پوچھ کر ہی نواز شریف کے پاسپورٹ پر بیان دیا ہے، ان کے پاسپورٹ کی میعاد ختم ہو رہی ہے تو انھیں آنا چاہیے، وہ بیمار ہیں تو علاج کیوں نہیں کرا رہے۔

شیخ رشید نے کہا عمران خان چاہتے ہیں یہ سینیٹ الیکشن میں حصہ نہ لیں، لیکن میں چاہتا ہوں یہ سینیٹ الیکشن میں حصہ لیں، عمران خان کو سینیٹ میں اکثریت ملی تو 72 گھنٹے میں وہ ترامیم کر دیں گے، ن لیگ اور جے یو آئی کا بس چلے تو سینیٹ اور ضمنی انتخاب کا بائیکاٹ کر لیں لیکن لکھ کر رکھ لیں ن لیگ بھی سینیٹ کے الیکشن میں حصہ لے گی۔

انھوں نے مزید کہا کہ یہ دونوں پارٹیاں کسی بھی طرح چاہتی ہیں حکومت چلی جائے، لیکن اندر سے ایسی آوازیں اٹھیں گی کہ اپنے ہی فیصلوں پر عمل نہیں کر سکیں گے، دونوں پارٹیاں مجبوری میں سینیٹ اور ضمنی انتخاب میں حصہ لیں گی، اپوزیشن میں لاہور جلسے کے بعد وہ دم خم نہیں ہے، اپوزیشن کے پاس لانگ مارچ کے علاوہ اور کوئی راستہ نہیں بچا، اپوزیشن صرف لانگ مارچ کا فیصلہ کرےگی باقی فیصلے یہ نہیں کر سکتے۔

شیخ رشید نے کہا گرینڈ ڈائیلاگ ہو رہے ہیں یا نہیں اس کا مجھے علم نہیں، ہاں میں چاہتا ہوں کہ ڈائیلاگ ہوں، سیاست دان کبھی بھی مذاکرات کے راستے بند نہیں کرتا، اسٹیبلشمنٹ بھی کبھی بھی نہیں چاہے گی کہ ڈائیلاگ نہ ہوں، لیکن اپوزیشن کہتی ہے عمران خان سے مذاکرات نہیں کریں گے، تو وہ کس سے مذاکرات کرے گی؟