Tag: طالبان

واشنگٹن: کیا افغانستان میں ایسے علاقے موجود ہیں جہاں دہشت گرد گروپ پنپ رہے ہیں؟ مارکو روبیو نے انٹرویو میں اس حوالے سے کئی انکشافات کیے ہیں۔

امریکی وزیر خارجہ مارکو روبیو کا کہنا ہے کہ افغانستان میں ایسے علاقے موجود ہیں، جہاں حکومت کا کنٹرول نہیں ہے اور وہاں دہشت گرد گروپوں کے پنپنے کے مواقع موجود ہیں۔

سابق صحافی کیتھرین ہیریج کے ساتھ سوشل میڈیا پلیٹ فارم X پر ایک انٹرویو کے دوران مارکو روبیو نے کہا کہ آج اور 10 سال پہلے کے درمیان فرق یہ ہے کہ اب اس زمین پر امریکی موجود نہیں ہیں، جو انھیں ہدف بنائیں اور ان کا پیچھا کریں۔

مارکو روبیو نے کہا کہ القاعدہ اور اسلامک اسٹیٹ کے کچھ معاملات میں طالبان امریکا سے تعاون کرتے ہیں، جب کہ دیگر معاملات میں نہیں کرتے۔ انھوں نے انکشاف کیا کہ اسلامک اسٹیٹ خراسان وسطی ایشیائی ریاستوں سے اپنے لیے بھرتیاں کر رہی ہے۔

امریکی امداد کی معطلی کے بعد افغانستان معاشی بحران کا شکار

امریکی وزیر خارجہ کا کہنا تھا کہ طالبان نے ملک میں ایک ایسا ماحول قائم کر رکھا ہے جو دہشت گرد گروپوں کو اپنے ٹھکانے اور تربیتی کیمپ بنانے میں معاونت فراہم کرتا ہے۔

واضح رہے کہ امریکی امداد کی معطلی سے افغانستان معاشی بحران کا شکار ہو گیا ہے اور اس کی اقتصادی ترقی میں 7 فی صد تک کمی متوقع ہے۔ ایک رپورٹ کے مطابق افغانستان دنیا کے ان 8 ممالک میں سے ایک ہے جس کی معیشت کا بڑا حصہ امریکی امداد پر منحصر ہے۔ 2021 میں افغان زر مبادلہ کے ذخائر 9.4 بلین ڈالر تھے، جنھیں طالبان کے قبضے کے بعد عالمی اداروں نے منجمد کر دیا تھا۔

سینٹر فار گلوبل ڈیولپمنٹ کے مطابق افغانستان کی 35 فی صد غیر ملکی امداد یو ایس ایڈ (USAID) کی جانب سے فراہم کی جاتی ہے، طالبان کے قبضے کے بعد گزشتہ تین سالوں میں امریکا نے افغانستان کو 3 ارب ڈالر سے زائد مالی امداد فراہم کی ہے۔

افغان طالبان کے جبری دور حکومت اور سنگین ترین عوامی صورت حال پر SIGAR کی رپورٹ جاری کر دی گئی، جس میں کہا گیا ہے کہ افغانستان سے امریکی انخلا کے بعد سے تقریباً 3.71 بلین ڈالر کی امداد خرچ کی گئی، افغان طالبان نے خواتین کی ملازمتوں بشمول این جی اوز، صحت اور دیگر شعبوں میں ملازمتوں پر بھی پابندی عائد کر رکھی ہے۔

افغانستان میں امریکا کی امدادی کارروائیوں کے حوالے سے اسپیشل انسپیکٹر جنرل فار افغان ری کنسٹرکشن (SIGAR) کی تازہ ترین رپورٹ جاری کی گئی ہے، رپورٹ کے مطابق ’’اگست 2021 میں افغانستان سے امریکی انخلا کے بعد سے تقریباً 3.71 بلین ڈالر کی امداد خرچ کی گئی ہے۔‘‘

خرچ امداد کا 64.2 فی صد اقوام متحدہ کی ایجنسیوں، UNAMA اور ورلڈ بینک کے زیر انتظام افغانستان ریزیلینس ٹرسٹ فنڈ کے ذریعے تقسیم کیا گیا ہے، 1.2 بلین ڈالر اضافی امدادی فنڈنگ بھی جاری کرنے کے لیے دستیاب ہے۔

رپورٹ کے مطابق امریکا میں منجمد کیے گئے افغان مرکزی بینک کے 3.5 ارب ڈالر کے اثاثے سوئٹزرلینڈ میں قائم افغان فنڈ میں منتقل کیے گئے، منتقل کیا گیا 3.5 ارب ڈالر، اب سود کے ساتھ 4 ارب ڈالر ہو چکا ہے، تشویش ناک امر یہ ہے کہ اتنی بڑی امداد کے باوجود افغان طالبان کی جابرانہ پالیسیاں جاری ہیں، اور افغان طالبان نے تاحال خواتین کی تعلیم پر پابندیاں عائد کر رکھی ہیں۔

رپورٹ کے مطابق نیکی کی ترویج اور برائی کی روک تھام کے لیے نافذ کی جانے والے نام نہاد ’اخلاقیات‘ قانون نے مرد و خواتین کے طرز عمل پر پابندیاں بڑھا دی ہیں، ان پابندیوں کی بدولت بین الاقوامی سطح کے انسانی ہمدردی کے پروگراموں کے تحت امداد کی تقسیم میں مشکلات پیش آ رہی ہیں۔

صدر ڈونالڈ ٹرمپ کے 20 جنوری 2025 کے ایگزیکٹو آرڈر کے تحت افغانستان میں جاری منصوبوں سمیت تمام امریکی و غیر ملکی امداد کی نئی ذمہ داریاں اور تقسیم 90 دن کے لیے روک دی گئی ہیں، رپورٹ میں مزید بتایا گیا ہے کہ افغانستان میں موجود سنگین صورت حال کا شکار 16.8 ملین لوگوں کے لیے اقوام متحدہ نے 2025 کے لیے 2.42 بلین ڈالر امداد کی درخواست کی ہے۔

افغانستان میں اتنی بڑی تعداد میں بھوک کے شکار لوگوں کے باوجود افغان طالبان امدادی کوششوں میں رکاوٹیں ڈال رہے، افغانستان میں ISIS-K اور القاعدہ کی موجودگی نے سیکیورٹی خطرات کو بھی بڑھا دیا ہے، رپورٹ کے مطابق 2024 میں پاکستان میں افغان سرزمین سے 640 دہشت گردانہ حملوں کی وجہ سے پاک افغان تعلقات بھی کشیدگی کا شکار ہیں، جس کے باعث پاکستان سے لاکھوں کی تعداد میں غیر قانونی افغان شہری ملک بدر بھی کیے گئے۔

طالبان کے دور اقتدار میں ایک منظم طریقے سے خواتین کو سیاسی، سماجی اور تعلیمی زندگی سے خارج کر دیا گیا ہے، افغانستان میں موجود 4 کروڑ سے زائد کی آبادی سنگین صورت حال کا شکار ہے، جب کہ افغان طالبان افغانستان کی تعمیر نو میں مکمل طور پر ناکام ہو چکے ہیں۔