Tag: India

اورنگ آباد: فلم چھاوا کی ریلیز کے بعد بھارتی ریاست مہاراشٹر میں مغل شہنشاہ اورنگزیب عالمگیر کا مقبرہ خطرے میں پڑ گیا ہے، جسے ہندو انتہا پسندوں سے محفوظ رکھنے کے لیے فوج تعینات کر دی گئی ہے۔

بھارتی میڈیا رپورٹس کے مطابق انتہا پسند ہندوؤں کی تنظیم بجرنگ دل نے اورنگ زیب کے مقبرے کو ہٹانے کا مطالبہ کر دیا ہے، جس سے مہاراشٹر میں افراتفری پھیل گئی ہے، حکومت کو مقبرے کی سیکیورٹی بڑھانی پڑ گئی ہے۔

حالات کشیدہ ہونے کے سبب مہاراشٹر حکومت نے حالات کو کنٹرول میں رکھنے کے لیے بعض رہنماؤں پر پابندیاں بھی عائد کر دی ہیں، اور خلد آباد میں واقع مقبرے پر ایس آر پی ایف کا ایک دستہ تعینات کر دیا ہے۔ مقبرے کو ہٹانے کا مطالبہ کرنے والے ملند ایکبوٹے پر 5 اپریل تک چھترپتی سمبھاج نگر ضلع میں داخلے پر پابندی لگا دی گئی ہے۔

کانگریس نے مقبرے کو ہٹانے کی مخالفت کرتے ہوئے وش ہندو پریشد اور بجرنگ دل پر طنز کرتے ہوئے کہا ہے کہ انھیں اسٹنٹ نہیں کرنا چاہیے، ان کا کہنا تھا کہ انتہا پسند اس شان دار تاریخ کو مٹانے کی کوشش کر رہے ہیں۔

بھارت کی زمین ’’گاندھی‘‘ کی اولاد کیلیے غیر محفوظ ہو گئی، پڑ پوتے پر حملہ

رپورٹس کے مطابق یہ تنازع فلم ’’چھاوا‘‘ سے شروع ہوا ہے، جو حال ہی میں ریلیز ہوئی ہے، جس کے بعد مغل شہنشہا اورنگزیب کے بارے میں ایک بحث شروع ہو گئی ہے، یہ فلم مراٹھا سلطنت کے دوسرے حکمران اور چھترپتی شیواجی مہاراج کے بڑے بیٹے سمبھاجی مہاراج کی زندگی پر مبنی تھی۔

فلم میں وکی کوشل نے سمبھاجی کا کردار ادا کیا ہے جب کہ اکشے کھنہ نے اورنگ زیب کا کردار ادا کیا ہے، فلم میں سنبھاجی کی ہمت اور قربانی جب کہ اورنگ زیب کے مظالم کو دکھایا گیا ہے۔ واضح رہے کہ سنبھاجی کو 1689 میں اورنگزیب نے بے دردی سے قتل کر دیا تھا، جسے فلم میں جذباتی انداز میں پیش کرنے کی کوشش کی گئی ہے۔

شاہجہاں پور: بھارت کی ریاست اترپردیش میں ہولی کے پیش نظر مسجدوں کو ترپال سے ڈھک دیا گیا ہے۔

تفصیلات کے مطابق اس بار ہولی اور رمضان کا دوسرا جمعہ ایک ہی دن پڑنے کی وجہ سے احتیاطی تدابیر کے تحت جہاں یو پی کے اکثر اضلاع میں جمعہ کی نماز میں تاخیر کا فیصلہ کیا گیا، وہاں انتظامیہ نے ہولی کے جلوس کے راستے میں آنے والی مساجد کو بھی ترپال سے ڈھک دیا۔

رپورٹس کے مطابق شاہجہاں پور میں 60 سے زائد اور سنبھل میں 10 مساجد کو ڈھانکا گیا، ان میں سنبھل کی تاریخی شاہی جامع مسجد بھی شامل ہے، انتظامیہ کا کہنا ہے کہ یہ قدم امن و امان کو برقرار رکھنے کے لیے اٹھایا گیا ہے، تاکہ مذہبی مقامات کی حفاظت کو یقینی بنانا جا سکے۔

مساجد کو ہولی کے موقع پر پھینکے گئے رنگوں سے محفوظ رکھنے کے لیے علما اور مقامی حکام کے درمیان تفصیلی مشاورت کی گئی تھی، شاہجہاں پور میں ہولی کے موقع پر 10 کلومیٹر طویل جلوس نکالا جاتا ہے، جس میں شریک ہزاروں لوگ اکثر بے قابو ہجوم کی صورت اختیار کر لیتے ہیں۔

رمضان کے پہلے عشرے میں مسجد نبوی ﷺ میں تقریباً ایک کروڑ نمازیوں کی آمد

ضلعی انتظامیہ نے مساجد کو نقصان سے بچانے اور تقریبات کو پرامن رکھنے کے لیے مقامی مذہبی رہنماؤں کے ساتھ مل کر احتیاطی تدابیر کے طور پر مساجد اور دیگر مذہبی مقامات کو ترپال سے ڈھانپنے کا فیصلہ کیا۔

نئی دہلی: بھارت میں شراب پینے والوں کو مفت راشن دینا بند کرنے کا مطالبہ سامنے آیا ہے۔

بھارتی میڈیا رپورٹس کے مطابق پنجاب کی سابق وزیر صحت لکشمی کانتا چاؤلہ نے بدھ کو وزیر خزانہ نرملا سیتا رمن سے مطالبہ کیا کہ ملک میں اربوں روپے کی شراب پی جانے والوں کو مفت راشن دینا بند کیا جائے۔

پروفیسر لکشمی نے مطالبہ کیا کہ انتخابات سے قبل مفت اشیا کی تقسیم کا سلسلہ رکنا چاہیے، پورے ملک میں آٹا اور راشن سستا کیا جائے، صحت کی سہولیات ہر ایک کو مفت دستیاب ہونی چاہئیں، اور ہر بچے کو تعلیم ملے۔

لکشمی کانتا چاؤلہ نے کہا ’’میں حیران ہوں کہ جس ملک میں اربوں روپے کی شراب پی جاتی ہے وہاں کے عوام کو مفت راشن کیوں دیا جاتا ہے؟ بس اتنا کیجیے کہ شراب پینے والوں کو مفت راشن مت دیں، وہ راشن ان غریب بچوں کو دیں جن کے والدین محنت کرنے کے باوجود ہر ماہ 8 سے 9 ہزار روپے ہی کما پاتے ہیں۔‘‘

مندر میں گوشت کس نے رکھا؟ ویڈیو میں اہم انکشاف

سابق وزیر نے جی ایس ٹی ختم کرنے اور میڈیکل انشورنس سستا کرنے کا بھی مطالبہ کیا، انھوں نے کہا عام آدمی پارٹی نے 18 فی صد جی ایس ٹی لگا کر میڈیکل انشورنس کو مہنگا کر دیا ہے، جب کھانے کا انتظام نہ ہو تو حکومت کی جانب سے معیشت کی بہتری کے اعداد و شمار سے ان کا پیٹ نہیں بھر سکتا۔

لکشمی کا کہنا تھا کہ آٹا 45 روپے کلو، چینی 45 روپے کلو، سرسوں کا تیل 200 روپے کلو سے زیادہ ہو گیا ہے، غریبوں کو دال بھی نہیں مل رہی، ایسے میں ان کی یومیہ کمائی 300 روپے سے زیادہ نہیں، تو وہ بچوں کو کیسے پڑھائیں؟ دوسری طرف 80 کروڑ افراد کو حکومت سے مفت راشن ملتا ہے لیکن یہ غریب ان میں شمار بھی نہیں ہوتے۔