کراچی( 26 جولائی 2025): ایس آئی یو نے لیاری گینگ شکیل کمانڈر کے دست راست ابوحریرہ کو زخمی حالت میں گرفتار کرلیا گیا۔
تفصیلات کے مطابق ایس آئی یو نے مرزا آدم خان روڈ کے قریب مقابلہ کے بعد لیاری گینگ کمانڈر شکیل عرف بادشاہ کا اہم کارندہ زخمی حالت میں گرفتار کرلیا۔
پولیس حکام کا کہنا ہے کہ ملزم کا ساتھی پولیس پر فائرنگ کرتا ہوا فرار ہوگیا، زخمی ملزم ابوحریرہ سے پستول اور گولیاں برآمد ہوئیں، ایس ایس پی شعیب میمن کے مطابق ملزم شکیل عرف بادشاہ بیرون ملک بیٹھ کر لیاری گینگ آپریٹ کرتا ہے، لیاری گینگ کمانڈر ابو حریرہ کے ذریعے بھتے وصول کراتا تھا۔
ایس ایس پی شعیب میمن نے مزید بتایا کہ ملزم شکیل نے دودھ کے بیوپاری سے تیس لاکھ روپے بھتہ مانگا نہ دینے پر مارنے کی دھمکی دی، جس کا مقدمہ کلری تھانے میں درج ہے، ایس آئی یو کی جانب سے لیاری گینگ کمانڈر شکیل عرف بادشاہ کی گرفتاری کے لیے کوششیں جاری ہیں۔
دوسری جانب ترجمان ایس ایس پی ایس آئی یو کے مطابق ایک اور کارروائی بلدیہ ٹاؤن گلشن مزدور کے علاقے میں کی گئی، جہاں پولیس کا ملزمان سے فائرنگ کا تبادلہ ہوا۔ مقابلے کے دوران دو ملزمان وزیر اور اظہر زخمی حالت میں گرفتار کیے گئے۔
ترجمان کے مطابق گرفتار ملزمان کے قبضے سے دو پستول، موٹر سائیکل، چار لاکھ روپے نقدی اور 60 لاکھ روپے مالیت کی تنزانیہ نامی منشیات برآمد کی گئی۔ دونوں ملزمان کا تعلق لیاری گینگ وار کمانڈر کاشف ڈاڈا اور وسیع اللہ لاکھوں گروہ سے ہے، جو پاک کالونی اور پرانا گولی مار میں منشیات اور بھتہ خوری کا نیٹ ورک چلا رہے تھے۔
