لاہور :ڈاکٹرعارف تجمل کا کہنا ہے نوازشریف کی پرانی رپورٹس کا جائزہ لیا جائے گا، اگر نئے ٹیسٹ کرانے پڑے تو کرائیں گے ، جناح اسپتال میں تمام ٹیسٹوں کی سہولت موجود ہے۔
تفصیلات کے مطابق پرنسپل علامہ اقبال میڈیکل کالج ڈاکٹرعارف تجمل نے میڈیا سےگفتگو کرتے ہوئے کہا نواز شریف کے نئے ٹیسٹ کرانے پڑے تو کرائیں گے، جناح اسپتال میں آنیوالا ہر مریض ہمارے لئے اہم ہے، دیگر مریضوں کو دی جانیوالی سہولتیں نواز شریف کو دی جارہی ہیں۔
ڈاکٹرعارف کا کہنا تھا کہ نوازشریف کی پرانی رپورٹس کا جائزہ لیاجائے گا ، وہ ایک جگہ سیٹل ہوگئے تو بورڈ اپنا کام شروع کرےگا، گائنی یونٹ میں رکھنے کا فیصلہ انتظامیہ معاملات دیکھ کر کیا جائے گا۔
انھوں نے مزید کہا نواز شریف کے ساتھ سیکیورٹی ہے اس کی وجہ سے انتظامات کرنے پڑے، جناح اسپتال میں تمام ٹیسٹوں کی سہولت موجود ہے۔
یاد رہے وزیراعظم نواز شریف کو سخت سیکیورٹی کے حصار میں کوٹ لکھپت جیل سےجناح اسپتال پہنچایا گیا ، پروفیسرعارف تجمل کا کہنا تھا کہ اسپتال میں ہر علاج کی سہولت ہے،چیک اپ سے پہلےکچھ کہناقبل ازوقت ہے، کارڈیالوجی کی سہولت ہے اور اچھے پروفیسرز ہیں۔
مزید پڑھیں : نوازشریف کوٹ لکھپت جیل سے جناح اسپتال منتقل
جناح اسپتال منتقل کرنےسے جیل کے ڈاکٹرزنے نوازشریف کا طبی معائنہ کیا، ان کا بلڈ پریشر،شوگرسمیت دیگرٹیسٹ کیےگئے ، ڈاکٹرز کے مطابق نوازشریف کو آج بھی ہلکا بخار ہے۔
محکمہ داخلہ پنجاب نے کوٹ لکھپت جیل میں قید نواز شریف کو جناح اسپتال منتقل کرنے کا نوٹیفیکیشن جاری کیا تھا۔
دوسری جانب لاہور پولیس نے نواز شریف کی اسپتال منتقلی اور سیکیورٹی کیلئے پلان تشکیل دے دیا ہے، اسپتال میں تین شفٹوں میں اہلکار تعینات کئے جائیں گے، ایک ڈی ایس پی، دو انسپکٹر اور 80 اہلکار ایک شفٹ میں تعینات ہوں گے۔
ایلیٹ فورس اور سادہ لباس میں الگ الگ نفری تعینات ہو گی اور سیکیورٹی کے انچارج ایس پی ماڈل ٹاؤن علی وسیم ہوں گے، نوازشریف کےکمرےکوسب جیل ڈکلیئرکردیاجائےگا اور وارڈکےباہرجیل عملہ تعینات ہوگا۔
صرف حکومت کے تشکیل کردہ ڈاکٹرز کے بورڈ کو کمرہ تک رسائی ہو گی اورنواز شریف کے کمرے کو جانے والے راستے پر تمام ڈاکٹرز اور رشتہ داروں کی تین جگہ چیکنگ کی جائے گی۔
