ARYNews.tv | Urdu – Har Lamha Bakhabar

Tag: tourism

  • سیاحوں کے لئے اچھی خبر آگئی

    سیاحوں کے لئے اچھی خبر آگئی

    کرا چی : سیاحت کے فروغ کے لئے سول ایوی ایشن نے نجی ائیر لائن کو ٹی پی آر آئی لائسنس جاری کر دیا ، نارتھ ائیر اسلام آباد سے گلگت ، اسکردو، چترال اور گوادر کے لئے فلائیٹ آپریشن شروع کر ے گی۔

    تفصیلات کے مطابق سیاحوں کے لئے اچھی خبر آگئی، سول ایوی ایشن نے نجی ائیر لائن کو ٹی پی آر آئی لائسنس جاری کر دیا ، شعبہ ائیر ٹرانسپورٹ نے نارتھ ائیر کے نام سے لائسنس جاری کیا۔

    سی اے اے کے نئے لائسنس کو ٹورازم پروموشن اینڈ ریجنل انٹیگریشن کا نام دیا ہے، نارتھ ائیر اسلام آباد سے گلگت ، اسکردو،چترال اور گوادر کے لئے فلائیٹ  آپریشن شروع کر ے گی۔

    سی اے اے نے ائیر لائن کو AOC ایئر آپریٹرز کے لائسنس کے اجراء اور تجدید کے نظرثانی شدہ تقاضے بھی جاری کر دیئے اور ایئر آپریٹرز سرٹیفکیٹ کی اقسام تین سے بڑھا کر چار کر دی گئی ہیں، اس لائسنس کیلئے کمپنی کو ایس ای سی پی سے مربوط ہونا چاہئے۔

    سول ایوی ایشن اتھارٹی نے وزیراعظم کے سیاحت کو فروغ دینے کے وڑن کیلئے لائسنس جاری کیا ہے۔

  • سعودی عرب میں سمندری سیاحت کا شاندار ٹور

    سعودی عرب میں سمندری سیاحت کا شاندار ٹور

    ریاض: سعودی عرب نے بحیرہ احمر میں سیاحت کے لیے شاندار ٹور تشکیل دیا ہے اور اس کے لیے بین الاقوامی کروز کمپنی سے معاہدہ کیا ہے۔

    سعودی ویب سائٹ کے مطابق ایم ایس سی کروزز کمپنی جدہ سے سعودی کروز کمپنی کے تعاون سے بحیرہ احمر دریافت کرنے کے لیے نئے سیاحتی پروگرام کرے گی، ایم ایس سی کروزز کا ہیڈ کوارٹر سوئٹزر لینڈ میں ہے۔

    ایم ایس سی کروزز نے کہا کہ ایکم ایس سی میگنفک پر 7 روزہ ٹور جدہ سے روانہ ہوگا اور العقبہ بندرگاہ میں لنگر انداز ہوگا۔ وہاں سے اردنی شہر البترا جائے گا۔

    اس کے بعد مصری بندرگاہ سفاجا پہنچے گا، دورے میں الاقصر میں تاریخی مقامات کی سیر بھی کروائی جائے گی جبکہ کروز الوجہ اور ینبع بندرگاہوں پر بھی سٹیشن کرے گی۔

    سعودی کروز کمپنی نے اپنے بیان میں کہا کہ اس نے ایم ایس سی کروزز کے ساتھ طویل المیعاد شراکت کا پروگرام بنایا ہے۔

    کمپنی کے رکن فواز فاروقی نے کہا کہ ہم مستقبل میں سعودی روٹس پر چلنے والے جہازوں کی تعداد اور حجم بڑھانے کے امکانات دریافت کر رہے ہیں۔

    خیال رہے کہ بحیرہ احمر کے سیاحتی پروگرام نومبر 2021 سے شروع ہوں گے اور ان کا سلسلہ مارچ 2022 تک چلے گا۔

  • سعودی عرب: سیاحت کے فروغ کے لیے اہم کوشش

    سعودی عرب: سیاحت کے فروغ کے لیے اہم کوشش

    ریاض: سعودی عرب میں سیاحت کی بین الاقوامی تنظیم اپنا دفتر قائم کرے گی جس سے مملکت میں سیاحت کو فروغ ملے گا۔

    سعودی ویب سائٹ کے مطابق دارالحکومت ریاض میں عالمی تنظیم سیاحت کا ریجنل آفس قائم کرے گا جو مملکت کی طرف سے عالمی تنظیم کے لیے تحفہ ہوگا۔

    سعودی سرکاری گزٹ ام القریٰ نے جمعے کو یہ اطلاع شائع کی ہے کہ سعودی کابینہ نے عالمی تنظیم سیاحت اور مملکت کے درمیان ریجنل آفس کے حوالے سے ہونے والے معاہدے کی منظوری دی ہے۔

    عالمی تنظیم اور سعودی عرب نے 17 ستمبر 2020 کو تبلیسی سٹی میں معاہدہ کیا تھا جو 10 نکات پر مشتمل ہے۔ اس کے تحت سعودی عرب عالمی تنظیم کو ریجنل آفس کے لیے مفت عمارت مہیا کرے گا البتہ ریاض میں دفتر کی جگہ کا انتخاب فریقین مل جل کر کریں گے۔

    عالمی تنظیم سیاحت ریجنل آفس کے تمام اہلکاروں کا تقرر کرے گی، ڈائریکٹر سمیت تمام اہلکاروں کی تقرری آرگنائزیشن ہی انجام دے گی۔ تمام اہلکار عالمی تنظیم کے سیکریٹری جنرل کی نگرانی میں کام کریں گے۔

  • پاکستان اور سری لنکا کے درمیان سیاحتی شعبے میں فروغ کی کوششیں تیز

    پاکستان اور سری لنکا کے درمیان سیاحتی شعبے میں فروغ کی کوششیں تیز

    اسلام آباد: پاکستان اور سری لنکا کے درمیان سیاحتی شعبے میں فروغ کی کوششیں تیز ہوگئیں، وزیر اعظم کے معاون خصوصی زلفی بخاری اور سری لنکن حکام کے درمیان رابطے میں دونوں ممالک کا سیاحتی شعبے میں تعاون بڑھانے پر اتفاق طے پا گیا۔

    تفصیلات کے مطابق وزیر اعظم عمران خان کے معاون خصوصی برائے امور اوور سیز پاکستانی زلفی بخاری اور سری لنکا کے سیاحتی حکام کا ویڈیو لنک پر رابطہ ہوا۔ سری لنکن ٹور ازم ڈیولپمنٹ اتھارٹی کی چیئر پرسن سے بھی مشاورت ہوئی۔

    ڈیجیٹل ملاقات کے دوران دونوں ممالک کا سیاحتی شعبے میں تعاون بڑھانے پر اتفاق طے پا گیا، مفاہمتی یادداشت کے معاہدوں پر دستخط کی تقریب جلد ہوگی۔

    زلفی بخاری کا کہنا تھا کہ پاکستان اور سری لنکا میں سیاحتی سرگرمیوں کے وسیع مواقع ہیں، دونوں ممالک ٹور ازم کے فروغ کے لیے متفقہ کوششوں پر تیار ہیں، بہت جلد سیاحتی شعبے سے متعلق معاہدوں کو حتمی شکل دیں گے۔

    سری لنکن حکام نے دو طرفہ رابطوں میں تیزی کو خوش آئند قرار دیا ہے۔

  • متحدہ عرب امارت جانے والے سیاحوں کے لیے خوشخبری

    متحدہ عرب امارت جانے والے سیاحوں کے لیے خوشخبری

    ابو ظہبی: متحدہ عرب امارات میں سیاحتی و صحرائی تفریحی دوروں پر سے پابندی اٹھا لی گئی، محکمہ سیاحت نے سیاحوں کے لیے ایس او پیز جاری کردی ہیں۔

    مقامی ویب سائٹ کے مطابق متحدہ عرب امارات میں ادارہ فروغ سیاحت و تجارت نے شارجہ میں سیاحتی اور صحرائی سفر بحال کر دیے ہیں۔

    ٹورسٹ گائیڈز کے مطابق اب مقامی شہریوں اور غیر ملکیوں کو صحرا میں سیر و سیاحت کے پروگرام بنانے کی اجازت دے دی گئی ہے تاہم ایس او پیز کی پابندی کرنا ہوگی۔

    ادارہ فروغ سیاحت کا کہنا ہے کہ سیاحوں، ملاقاتیوں، ملازم پیشہ افراد، مقامی شہریوں اور مقیم غیرملکیوں کو صحت و سلامتی کے ضوابط کی پابندی کرنا ہوگی۔

    ادارے کے سربراہ خالد المدفع نے کہا کہ شارجہ کے حکام نے صحرائی اور سیاحتی تفریحی دوروں سے پابندی اٹھا کر تمام سیاحتی سرگرمیوں کی راہ بحال کردی ہے۔

    انہوں نے کہا کہ سب کچھ بتدریج بحال ہوجائے گا، اس حوالے سے ادارہ فروغ سیاحت نے ایس او پیز گائیڈ بھی جاری کر دی ہے۔

  • لاہور کے بعد راولپنڈی میں بھی ڈبل ڈیکر بسیں متعارف کروانے کا اعلان

    لاہور کے بعد راولپنڈی میں بھی ڈبل ڈیکر بسیں متعارف کروانے کا اعلان

    لاہور: وزیر اعلیٰ پنجاب سردار عثمان بزدار کا کہنا ہے کہ چاہتے ہیں کہ پنجاب پاکستان کا سیاحتی مرکز بنے، لاہور کے بعد راولپنڈی میں بھی ڈبل ڈیکر بسوں کو متعارف کروا رہے ہیں۔

    تفصیلات کے مطابق وزیر اعلیٰ پنجاب سردار عثمان بزدار کا کہنا ہے کہ آج کا دن سیاحت کے حوالے سے اہم ہے، ورلڈ بینک کے تعاون سے 83 کروڑ روپے سے 6 نئی سڑکیں بنائی جا رہی ہیں، سیاحت پر ورلڈ بینک کا فوکس ہے۔

    عثمان بزدار کا کہنا تھا کہ پہلے مرحلے میں چکوال میانوالی کو فوکس کیا جا رہا ہے، اس کے بعد روہتاس اور لاہور قلعے پر کام کیا جائے گا۔ والڈ سٹی اتھارٹی 4.5 ارب سے شہر میں کام کر رہی ہے۔

    انہوں نے کہا کہ اوکاڑہ میں چاکر اعظم رند کے مقبرے پر کام شروع کر دیا گیا، 176 ریسٹ ہاؤسز کی آن لائن بکنگ ہو رہی ہے۔ لاہور کے بعد راولپنڈی میں بھی ڈبل ڈیکر بسوں کو متعارف کروا رہے ہیں۔

    وزیر اعلیٰ کا کہنا تھا کہ ٹور ازم ڈپارٹمنٹ کے فنڈز میں کمی نہیں آنے دیں گے، محکمہ آبپاشی کی جانب سے ٹور ازم ڈپارٹمنٹ کو اثاثے منتقل کیے ہیں، سیاحت کے ساتھ ثقافت کو بھی پروموٹ کریں گے۔

    انہوں نے کہا کہ چاہتے ہیں پنجاب پاکستان کا سیاحتی مرکز بنے، سیاحت سے بہت زرمبادلہ کمایا جا سکتا ہے۔

  • دبئی سیاحت میں یورپ کو بھی پیچھے چھوڑ گیا

    دبئی سیاحت میں یورپ کو بھی پیچھے چھوڑ گیا

    ابو ظہبی: متحدہ عرب امارات کا شہر دبئی سیاحت میں مشرق وسطیٰ اور یورپی ممالک کو بھی پیچھے چھوڑ گیا، ایک سال میں غیر ملکی سیاحوں نے دبئی میں اربوں ڈالر خرچ کر ڈالے۔

    بین الاقوامی ویب سائٹ کے مطابق اقوام متحدہ کے ماتحت عالمی ادارہ سیاحت نے کہا ہے کہ گزشتہ سال غیر ملکی سیاحوں نے دبئی میں 80 ارب درہم خرچ کیے، ڈالر میں یہ رقم 21 ارب 800 ملین بنتی ہے۔

    رپورٹ میں کہا گیا کہ غیر ملکی سیاحوں نے سنہ 2018 کے دوران 21 ارب 375 ملین ڈالر (78.6 ارب درہم) خرچ کیے تھے، سیاحت کے شعبے میں دبئی مشرق وسطیٰ کے تمام ملکوں پر سبقت لے گیا ہے۔

    مشرق وسطیٰ کے دس ممالک میں غیر ملکی سیاحوں نے جتنا خرچ کیا اس کا 27 فیصد دبئی میں خرچ کیا گیا۔

    عالمی ادارہ سیاحت نے اپنی سالانہ رپورٹ میں بتایا کہ دبئی گزشتہ برسوں کے دوران غیر ملکی سیاحوں کا پسندیدہ ترین شہر بنتا جارہا ہے۔ یہاں غیر ملکی سیاح گزشتہ سال کے مقابلے میں آنے والے سال میں زیادہ خرچ کر رہے ہیں۔

    رپورٹ کے مطابق گزشتہ سال 16.7 ملین غیر ملکی سیاح دبئی پہنچے جبکہ اس سے ایک سال قبل 2018 میں دبئی آنے والے غیر ملکی سیاحوں کی تعداد 15.9 ملین تھی۔

    رپورٹ میں کہا گیا کہ دبئی مشرق وسطیٰ ہی نہیں بلکہ جنوبی کوریا، پرتگال، یونان، سنگا پور، ہالینڈ، سوئیڈن، روس، بیلجیئم اور ڈنمارک جیسے ملکوں کو بھی پیچھے چھوڑ گیا ہے۔

  • 10 روز میں 6 لاکھ سے زائد سیاحوں کی شمالی علاقہ جات آمد

    10 روز میں 6 لاکھ سے زائد سیاحوں کی شمالی علاقہ جات آمد

    پشاور: خیبر پختونخواہ کے محکمہ سیاحت کا کہنا ہے کہ 13 سے 21 اگست تک 6 لاکھ سیاحوں نے سیاحتی علاقوں کا رخ کیا، سیاحتی مقامات پر ایس او پیز پر عملدر آمد یقینی بنایا جارہا ہے۔

    تفصیلات کے مطابق خیبر پختونخواہ میں محکمہ سیاحت نے مرتب کردہ اعداد و شمار جاری کردیے، لاک ڈاؤن کھلنے کے بعد پختونخواہ کے بالائی 6 اضلاع میں سیاح غیر معمولی تعداد میں پہنچے۔

    محکمہ سیاحت کا کہنا ہے کہ 13 اگست سے 21 اگست تک 6 لاکھ 27 ہزار 995 سیاحوں کی آمد ہوئی۔

    اعداد و شمار کے مطابق سوات میں سب سے زیادہ 3 لاکھ 56 ہزار 400 سیاح آئے جبکہ 65 ہزار 350 سیاحوں نے مانسہرہ کا رخ کیا۔

    محکمہ سیاحت کا کہنا ہے کہ لوئر چترال میں 9 ہزار 800 اور لوئر دیر میں 3 ہزار 460 سیاح پہنچے، اپر دیر میں 3 ہزار 389 سیاحوں کی آمد ہوئی۔

    خیال رہے کہ ملک میں کرونا وائرس کی صورتحال کنٹرول ہونے کے بعد 8 اگست سے سیاحتی مقامات کھول دیے گئے تھے، سیاحتی مقامات پر ایس او پیز پر عملدر آمد یقینی بنایا جارہا ہے۔

    کرونا وائرس نے نہ صرف پاکستان بلکہ دنیا بھر کی سیاحت کو متاثر کو متاثر کیا ہے، اقوام متحدہ کے مطابق رواں سال سیاحت میں 80 فیصد تک کمی سے کم از کم 10 کروڑ ملازمتوں کو خطرہ لاحق ہے۔

  • نو ماسک نو ٹورازم پالیسی اپنائی جائے: اسد عمر کی ہدایت

    نو ماسک نو ٹورازم پالیسی اپنائی جائے: اسد عمر کی ہدایت

    اسلام آباد: وفاقی وزیر برائے منصوبہ بندی اسد عمر کا کہنا ہے کہ کرونا وائرس کا پھیلاؤ روکنے کے لیے ٹورازم سیکٹر کے لیے ایس او پیز کی تیاری ناگزیر ہے، نو ماسک نو ٹورازم پالیسی اپنائی جائے۔

    تفصیلات کے مطابق وفاقی وزیر برائے منصوبہ بندی اسد عمر کی زیر صدارت نیشنل کمانڈ اینڈ آپریشن سینٹر (این سی او سی) کا اجلاس ہوا، اجلاس میں صوبائی حکام نے ویڈیو لنک پر کرونا وائرس کی صورتحال اور حکومتی اقدامات پر بریفنگ دی۔

    اجلاس میں ایس او پیز کے ساتھ ٹورازم سیکٹر کی بحالی کے امور پر بھی غور کیا گیا۔

    اسد عمر کا کہنا تھا کہ سیاحتی مقامات پر کرونا ایس او پیز کی خلاف ورزیاں رپورٹ ہو رہی ہیں جو کہ افسوسناک ہیں، سیاحتی مقامات پر ایس او پیز پر عمل نہ کرنے سے کرونا وائرس پھیل سکتا ہے۔

    اجلاس میں خیبر پختونخواہ اور گلگت بلتستان کے حکام کو سیاحتی گائیڈ لائنز کی تیاری کی ہدایت کردی گئی، اسد عمر کا کہنا تھا کہ کرونا وائرس کا ہھیلاؤ روکنے کے لیے ٹورازم سیکٹر کے لیے ایس او پیز کی تیاری ناگزیر ہے۔

    انہوں نے کہا کہ آزاد کشمیر، پختونخواہ اور گلگت بلتستان کے سیاحتی مقامات انتہائی اہم ہیں، مقامی حکومتیں ایس او پیز پر سختی سے عملدرآمد کروائیں۔

    اسد عمر نے مزید کہا کہ سیاحتی مقامات پر آنے والے لوگ ماسک کا استعمال لازمی کریں، نو ماسک نو ٹورازم پالیسی اپنائی جائے۔

  • سعودی عرب: سیاحتی مقامات کی رونقیں بحال

    سعودی عرب: سیاحتی مقامات کی رونقیں بحال

    ریاض: سعودی عرب میں کرونا وائرس کا لاک ڈاؤن ختم ہوجانے کے بعد اندرون ملک واقع سیاحتی مقامات کی رونقیں بحال ہوگئیں، مقامی شہری جوق در جوق ان مقامات کا رخ کر رہے ہیں۔

    سعودی ویب سائٹ کے مطابق سعودی شہریوں نے مقامی سیاحت میں دلچسپی کے بعد دیہی مقامات کا رخ کرنا شروع کر دیا ہے جہاں درجہ حرارت بھی شہروں کے مقابلے میں قدرے کم ہوتا ہے۔

    سعودی عرب کے شہر طائف، الباہا اور ابہا سیاحوں کی دلچسپی کا مرکز بنے ہوئے ہیں، حکام کی جانب سے پارکس یا دیگر تفریحی مقامات پر کرونا وائرس سے بچاؤ کی تدابیر پر سختی سے عمل کو یقینی بنایا جا رہا ہے۔

    سعودی ادارہ برائے سیاحتی ترقی کے نائب صدر ولید الحامدی کا کہنا ہے کہ جنوب مغرب میں واقع صوبہ عسیر اپنے دلکش مقامات اور تمام تر سہولیات کے ساتھ ملک بھر سے آنے والے سیاحوں کی مہمانی کے لیے تیار ہے۔

    انہوں نے بتایا کہ عسیر کے گورنر کی ہدایات کے مطابق کئی کمیٹیاں تشکیل دی گئی ہیں جو موسم گرما کا فائدہ اٹھاتے ہوئے سیاحتی سرگرمیوں کی کامیابی اور تفریحی سہولیات کی فراہمی کو یقینی بنائیں گی۔

    نائب صدر کا کہنا ہے کہ صوبہ عسیر کی انتظامیہ کی کوشش ہے کہ کرونا وائرس سے متعلق تمام ہدایات کو مدنظر رکھتے ہوئے لاجواب سیاحتی ماڈل اپنایا جائے۔

    ان کے مطابق اس سیاحتی ماڈل پر عمل درآمد کے لیے 4 ہزار رضا کاروں پر مشتمل ٹیم کی ٹریننگ کی گئی ہے، جو وبا کے اختتام تک فرائض سر انجام دیتے رہیں گے۔