کراچی : ماڈل کالونی میں خوفناک ٹریفک حادثہ پیش آیا ہے جس میں تیز رفتار ٹریلر نے چار موٹر سائیکل سواروں کو کچل ڈالا۔
ماڈل کالونی موڑ کے قریب تیز رفتار ٹریلر کی ٹکر سے موٹرسائیکل پر بیٹھے دو بچے موقع پر جاں بحق ہوگئے جبکہ دو افراد شدید زخمی ہوگئے جنہین طبی امداد کیلئے مقامی اسپتال منتقل کیا گیا۔
پولیس حکام کے مطابق حادثے میں جاں بحق ہونے والے بچوں میں 10 سالہ طحہ اور 9 سالہ محمد شاہ شامل ہیں جبکہ زخمی افراد کی شناخت کا عمل جاری ہے۔
افسوس ناک حادثے کے بعد علاقہ مکینوں کی بڑی تعداد گھروں سے نکل آئی اور بھرپور احتجاج کرتے ہوئے ٹریفک کیلیے سڑک بند کردی۔
اس موقع پر مظاہرین کا کہنا تھا کہ ماڈل کالونی موڑ پر ٹریفک حادثات معمول بن گئے،مؤثر حفاظتی انتظامات نہیں کیے جاتے، انہوں نے مطالبہ کیا کہ ماڈل کالونی کے اس موڑ کو بند کیا جائے۔
جناح اسپتال میں جاں بحق ہونے والے بچوں کے محلے داروں کا رش لگ گیا، میڈیا سے گفتگو میں محلے داروں کا کہنا تھا کہ بچے اپنے ماموں کو ائیرپورٹ چھوڑنے گئے تھے، واپسی پر ٹینکر نے ٹکر مار کر جان لے لی۔
اہل محلہ کے مطابق یہ واقعہ رات ساڑھے10بجے کے قریب پیش آیا۔ کئی گھنٹے گزرنے کے بعد بھی لاشیں اسپتال میں بے یار و مددگار ہی پڑی رہیں، کافی دیر تک پولیس کا کوئی نمائندہ جناح اسپتال نہیں پہنچا۔
تازہ ترین اطلاعات کے مطابق علاقہ مکینوں نےاحتجاج ختم کردیا، پولیس سے مظاہرین سے مذاکرات کے بعد متاثرین منتشر ہوگئے اور ٹریفک بحال کر ادیا گیا۔
