پاکپتن : شادی کی تقریب میں زہریلا مشروب پینے سے3بچیاں جاں بحق ہوگئیں ایک بچی کی حالت تشویشناک ہے، ڈی سی پاکپتن نے متعلقہ اداروں سے رپورٹ طلب کرلی۔
تفصیلات کے مطابق پاکپتن کے علاقے عارف والا میں شادی کی تقریب کے موقع پر افسوس ناک واقعہ پیش آیا، زہریلا مشروب پینے سے چار بچیوں کی طبیعت خراب ہوگئی۔
مذکورہ بچیوں کو فوری طور پر ساہیوال ڈسٹرکٹ اسپتال پہنچایا گیا تاہم دوران علاج تین بچیاں جان کی بازی ہار گئیں، ڈاکٹروں کے مطابق ایک بچی کی حالت تشویشناک ہے، جسے آئی سی یو میں رکھا گیا ہے۔
پولیس ذرائع کے مطابق جاں بحق بچیوں کی عمریں 5،6 اور 9 سال ہیں، بچیوں کے نام مریحہ، فاطمہ اور میشا ہیں، زہریلامشروب گاؤں کی ہی مقامی دکان سے خریدا گیا تھا۔
پولیس کا کہنا ہے کہ زہریلامشروب فروخت کرنے والے3دکانداروں کےخلاف مقدمہ درج کرلیا گیا ہے۔ دوسری جانب پنجاب فوڈ اتھارٹی نے مشروب کے نمونہ لینے کے بعد دکانیں سیل کردیں۔
اس حوالے سے ڈی سی پاکپتن احمد کمال مان نے واقعے کا نوٹس لیتے ہوئے متعلقہ اداروں سے رپورٹ طلب کرلی ہے۔
