رائے پور : بھارتی فوجی نے فائرنگ کرکے اپنے ہی پانچ ساتھیوں کو موت کے گھاٹ اتاردیا، اہلکار نے خود کو بھی گولی مار کر زندگی کا خاتمہ کرلیا، واقعے میں دو فوجی بھی زخمی ہوئے۔
تفصیلات کے مطابق بھارتی ریاست چھتیس گڑھ میں ڈیوٹی پر تعینات بھارتی فوجی کی فائرنگ سے پانچ ساتھی اہلکار ہلاک ہوگئے۔؎
واقعے میں دو فوجی شدید زخمی ہوئے جنہیں طبی امداد کیلئے اسپتال منتقل کردیا گیا جہاں دونوں کی حالت تشویشناک ہے، بھارتی فوجی نے جوانوں کو قتل کرنے کے بعد گولی مار کر خود کشی کرلی۔
اس حوالے سے بھارتی میڈیا کا کہنا ہے کہ کانسٹیبل مسعود الرحمان نے اپنے ساتھی اہلکاروں پر سرکاری رائفل سے فائرنگ کردی، تمام اہلکار تبت بارڈر کی خصوصی سیکورٹی پر مامور تھے۔
فائرنگ کرنے والے اہلکار کا تعلق مغربی بنگال سے تھا، بھارتی میڈیا کے مطابق اب تک واقعے کی وجوہات سامنے نہیں آئیں تاہم اسباب کا تعین کرنے کیلیے انکوائری کمیٹی تشکیل دے دی گئی ہے۔
واضح رہے کہ سال 2018 کے دوران 80 بھارتی فوجی اہلکاروں نے خود کشی کی جبکہ جنوری 2007 سے اب تک مقبوضہ کشمیر میں خود کشی کرنے والے بھارتی اہلکاروں کی تعداد 440 ہوگئی ہے۔
یاد رہے جولائی مین بھارت میں ریلوے ٹریک سے ملنے والی آرمی افسر کی لاش معمہ بن گئی تھی ، مقامی انتظامیہ تاحال یہ طے کرنے سے قاصر ہے کہ آیا اس افسر نے خود کشی کی ہے یا اسے قتل کیا گیا ہے۔
مزید پڑھیں : مقبوضہ کشمیر میں ایک اور بھارتی فوجی نے خود کشی کر لی
بتایا جارہا تھا کہ کیپٹن پوری کی پوسٹنگ بھارتی مقبوضہ جموں اور کشمیر کے علاتے پلواما میں کردی گئی تھی جس کے سبب وہ خوش نہیں تھا اور وہاں نہیں جانا چاہتا تھا۔
