کیف : روسی افواج نے ایک بار پھر یوکرین پر حملے تیز کر دیے۔ تازہ بمباری میں کم از کم 5 شہریوں کے ہلاک ہونے کی اطلاع بھی موصول ہو رہی ہے۔
یوکرین پر روسی حملے کئی ماہ سے جاری ہیں، کبھی حملے میں نرمی دیکھنے کو آتی ہے تو کبھی اچانک حملہ تیز کردیا جاتا ہے۔
عالمی سطح پر روس پر زبردست تنقید ہکی جارہی ہے اس کے باوجود جنگ ختم ہونے کا نام نہیں لے رہی۔24 فروری سے جاری اس جنگ میں یوکرین بھی جھکنے کو تیار نظر نہیں آ رہا۔
یوکرینی میڈیا کے مطابق روس کی فوج نے ڈونیتسک اوبلاسٹ میں بکھمٹ اور سیورسک کو نشانہ بنا کر بمباری کی ہے۔ اس حملے میں کئی بےگناہ شہری زخمی ہوگئے ہیں جن کا علاج مقامی اسپتال میں کیا جا رہا ہے۔
میڈیا کے مطابق اس سلسلے میں ابھی تک روس کی طرف سے کوئی بیان سامنے نہیں آیا ہے۔ دونوں ممالک کے درمیان چار ماہ سے زائد عرصہ سے جاری اس جنگ میں سینکڑوں معصوم شہریوں کی جان جا چکی ہے اور ہزاروں زخمی ہوئے ہیں۔
روسی فوج نے یوکرین کے کئی شہر کو کھنڈر میں تبدیل کردیا ہے۔ کئی بلند عمارتیں تباہ ہوگئی ہیں اور سینکڑوں کی تعداد میں گھر ویران ہو چکے ہیں۔ جنگ کی وجہ سے ہزاروں کی تعداد میں لوگ بے گھر بھی ہوئے ہیں۔
