اسلام آباد: عالمی بینک کے بورڈ آف ایگزیکٹو ڈائریکٹرز نے پاکستان کیلئے 10 کروڑ ڈالر کی منظوری دے دی ہے۔
عالمی بینک کی جانب سے جاری اعلامیہ کے مطابق رقم پنجاب میں منصوبہ بندی کے پروگرام کے لئے خرچ ہو گی۔ اس اہم پروگرام کا مقصد تولیدی صحت کی دیکھ بھال تک عالمی رسائی حاصل کرنا اور 2030 تک پنجاب میں 60 فیصد خاندان میں منصوبہ بندی کے طریقوں کے استعمال کو بڑھانا ہے۔
عالمی بینک کے اعلامیہ میں کہا گیا ہے کہ منصوبہ بندی پاکستان کی ترقی کے لئے اہم ہے، زیادہ آبادی ترقی کی شرح میں رکاوٹ کا باعث بنتی ہے، آبادی میں اضافے سے غربت میں اضافہ ہوتا ہے۔
بیان کے مطابق پنجاب فیملی پلاننگ پروگرام معیاری خاندانی منصوبہ بندی کی خدمات تک مفت بروقت رسائی فراہم کرے گا۔ اس پروگرام کے زریعے خاندانی منصوبہ بندی کی خدمات کی فراہمی کے نظام میں دیکھ بھال کے معیار کو بھی ادارہ جاتی بنائے گا۔
