کراچی : پاکستان میں سونے کی فی تولہ سونا تاریخ کی بلند ترین سطح پر پہنچ گئی ، جس کے بعد تمام سابقہ ریکارڈ ٹوٹ گئے۔
تفصیلات کے مطابق عالمی مارکیٹ میں سونے کی قیمتوں میں اضافے کی وجہ سے پاکستان کے صرافہ بازاروں میں بھی سونے کی قیمتوں میں اضافے کا رجحان برقرار ہے۔
صرافہ مارکیٹ میں آج بھی سونے کی قیمت میں بڑا اضافہ ریکارڈ کیا گیا اور فی تولہ قیمت میں 2400 روپے کا اضافہ ہوا، جس کے بعد سونا تاریخ کی بلند ترین سطح 2 لاکھ 57 ہزار 300 روپے فی تولہ پر جا پہنچا۔
10 گرام سونے کی قیمت میں 2057 روپے کا اضافہ ہوا اور 10 گرام سونا 2 لاکھ 20 ہزار 593 روپے پر پہنچ گیا جبکہ چاندی کی فی تولہ قیمت 2 ہزار 900 روپے پر مستحکم رہی۔
عالمی مارکیٹ میں سونا 26 ڈالر کے اضافے سے 2458 ڈالر فی اونس کا ہوگیا۔
خیال رہے سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔ اسے صدیوں سے کرنسی اور دولت کی شکل کے طور پر استعمال کیا جاتا رہا ہے۔ جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گذشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔